“Amahan, Palihog Tabangi Ko,” Liahona, Sept. 2022.
Digital Lamang: Mga Hulagway sa Hugot nga Pagtuo
Amahan, Palihog Tabangi Ko
Sa pagkakaron nagtan-aw mi sa artista nga nagdala sa papel ni Jesukristo nga mikunsad gikan sa langit, ako nasayod nga ang Manluluwas mao ang tubag sa akong mga pagsulay.
Niadtong Hulyo 2021, nakadawat ko og panalangin nga motrabaho isip usa ka extra sa bag-ong mga video sa Basahon ni Mormon, gihimoan og pelikula diha sa silangang kabukiran sa Springville, Utah, USA. Naghimo mi og pelikula sa mga talan-awon nga nahitabo human sa “dako ug hilabihan nga kalaglagan” (tan-awa sa 3 Nephi 8:11–12) diha sa Bag-ong Kalibotan, nga nagpamatuod sa Pagkalansang sa Manluluwas diha sa Krus sa Daang Kalibotan.
Atol sa paghimo sa pelikula, ang akong igsoong lalaki nga si Byron naghigda sa higdaanan sa ospital didto sa California, USA, samtang ang akong bag-ong apo nga babaye naghigda sa higdaanan didto sa ospital sa Siyudad sa Salt Lake, Utah. Si Byron himatyon tungod sa kanser, ug ang akong apo nga babaye, natawo nga dunay seryoso nga depekto sa pagkatawo, wala gilaoman nga mabuhi.
Sa dihang ang akong bana ug ako miabot sa among motel human sa ikaduha nga adlaw sa paghimo og pelikula, ang akong igsoong babaye mitawag nako, nabalaka bahin ni Byron.
“Wala ko masayod unsay nanghitabo” miingon siya. “Si Byron wala motubag sa iyang telepono o sa iyang mga mensahe.”
Sa akong lima ka igsoon, ako ang labing suod ni Byron. Siya ang ikaduhang anak, ug ako ang kinamanghoran. Siya sa kasagaran ang moatiman nako sa gamay pa ko. Nagtubo mi sa kasarangan nga mga kahimtang sa Guatemala. Kami walay telebisyon, apan kami aduna sa usag usa. Pobre mi, apan malipayon mi.
Gimingaw ko ni Byron sa dihang mibalhin siya ngadto sa Estados Unidos, nanghinaot nga makatabang sa among pamilya sa pinansyal nga paagi. Nakakita siya og trabaho isip usa ka drayber sa bus sa usa ka kompaniya sa turismo. Paglabay sa katuigan, mibalhin ko ngadto sa Estados Unidos, naminyo, ug nagpasakop sa Ang Simbahan ni Jesukristo sa mga Santos sa Ulahing mga Adlaw. Human sa akong bunyag, ang akong mga ginikanan mipasakop usab sa Simbahan. Sa dihang ang akong bana ug ako nanimuyo sa habagatang Utah, makita nako si Byron kon siya magdala og mga turista ngadto sa visitors’ centers sa St. George Utah Temple ug sa Salt Lake Temple.
“Butang nga Espesyal Kaayo”
Sa dihang nakigsulti ko ni Byron mahitungod sa Simbahan, miingon siya nako, “ang mga Santos sa Ulahing mga Adlaw adunay butang nga espesyal kaayo. Kon ako makigsulti sa mga tawo sa visitors’ centers, akong makita nga sila mga buotan, mahigalaon nga mga tawo.” Miuyon siya nga makigkita sa full-time nga mga misyonaryo, apan siya kanunay nga nagtrabaho ug hapit na lang nga wala sa balay.
Kaduha, si Byron malampusong gitambalan alang sa kanser sa tilaokan. Niadtong 2020, bisan pa niana, ang kanser mibalik. Niadtong Hunyo 2021, maglisod na kaayo siya nga mobiyahe ngadto sa Guatemala alang sa usa ka bulan nga reunion sa pamilya. Ang among amahan namatay sayo nianang tuiga, ug ang among inahan namatay niadtong 2015, upat ka tuig human sila nasilyo sa Guatemala City Guatemala Temple. Ang pagkakita sa iyang mga igsoon sa kataposan nga higayon mao ang kataposan nga mainampoong pangandoy ni Byron.
Paglabay sa duha ka semana human siya makabalik ngadto sa California, naospital siya. Karon na-coma na siya.
Wala ko makaapil sa reunion tungod kay ang akong anak nga babaye nga si Angie nagkinahanglan sa akong tabang ug suporta. Niadtong Hunyo 3, ang iyang unang anak, si Athena, natawo nga dunay diaphragmatic hernia. Ang mga doktor miopera kaniya paglabay sa tulo ka adlaw. Wala sila magdahom nga siya mabuhi.
Maayo gani, ang akong bana ug ako diha sa duol atol niining panahon sa pagsulay. Matag hapon human sa akong trabaho sa pag-video sa Basahon ni Mormon, si Angie mobiya sa iyang pagbantay sa ospital ug moapil namo diha sa among motel, diin kami mohupay niya ug mag-ampo alang ni Athena.
“OK ra ang tanan”
Sa akong pag-abot sa dapit nga himoan sa video sa adlaw human sa tawag sa telepono sa akong igsoong babaye, ako naluya ug naguol. “Amahan, palihog tabangi ko,” ako nag-ampo. “Daghan kaayong lisod nga mga butang ang nahitabo sa akong kinabuhi.”
Sa wala pa magpundok ang mga artista ug mga extra aron maghimo sa pelikula sa eksena diin ang nabanhaw nga Manluluwas mikunsad gikan sa langit (tan-awa sa 3 Nephi 11:8), giingnan mi nga maghunahuna mahitungod Kaniya ug unsa ang kahulogan Niya ngari kanamo. Samtang naningkamot ko sa pagpamalandong bahin sa Manluluwas atol sa eksena, ang akong mga hunahuna mibalhin ngadto sa akong pamilya. Sa akong hunahuna nakita nako ang akong amahan, akong inahan, ug si Byron. Niana gayod nga higayona, nadungog nako ang tingog ni Byron.
“OK ra ang tanan,” miingon siya. “Ok ra ko.”
Gibati nako ang paglaom ug kahupayan, ingon og ako anaa gayod sa yuta nga Bountiful sa dihang miabot si Jesus aron sa pagtudlo ug pag-ayo sa mga tawo, nagpakita kanila sa Iyang lawas. Nasayod ko nga Siya ang tubag sa akong mga pagsulay, nga Siya ug ang Amahan anaa diha alang kanako, ug nga ang mga butang nahitabo tungod sa usa ka rason.
Nianang gabhiona, akong nahibaloan nga ang Dios mikuha na ni Byron. Mapasalamaton ko sa hugot nga pagtuo nga akong nabatonan nga makita nako siya ug ang akong mga ginikanan pag-usab. Mapasalamaton usab ako nga ang Dios midungog sa among mga pag-ampo alang ni Athena. Human siya migahin og 88 ka adlaw nga nagpaayo sa neonatal intensive care unit, sa kataposan nadala na namo siya sa balay.
Daghan namo nga miapil sa bag-ong mga video sa Basahon ni Mormon mibati sa Espiritu ug pagkalig-on sa among mga pagpamatuod. Samtang ako naghunahuna mahitungod niana nga kasinatian ug nagtan-aw sa umaabot, ako nangutana sa akong kaugalingon, “Gibuhat ba nako ang tanan aron makaandam alang sa Ikaduhang Pag-anhi sa Manluluwas ug mahimong takos diha sa Iyang presensya?”
Ang pag-apil sa mga video usa ka dakong panalangin sa akong kinabuhi. Nasayod ko nga ang uban mapanalanginan usab samtang sila mobasa sa Basahon ni Mormon ug motan-aw sa mga video sa Basahon ni Mormon.