Ang Akong Tubag sa Basahon ni Mormon

Ni Annie Wong, Hong Kong, China

Naningkamot ko og maayo aron “matarong” si Mama Wong, apan ang iya lamang nga gikinahanglan mao ang yano, gamhanang pulong sa Dios.

inahan ug anak nga babaye — Si Mama Wong ug si Annie

Human ako nabunyagan niadtong Hunyo 2002, akong gipaambit ang akong tinuohan ngadto sa akong inahan. Bisan kon si Mama Wong kanunay nga motambong sa simbahan kuyog nako, siya dili gusto nga makat-on pa og dugang.

Sa kataposan, 10 ka tuig ang milabay, si Mama Wong mipili nga magpabunyag. Naghinamhinam ko. Subo lang, pipila ka tuig ang milabay, mihunong siya sa pagpalig-on sa iyang pagpamatuod ug mihimo og mga pasumangil sa dili pagtambong sa simbahan.

Giawhag nako siya nga moadto sa simbahan, apan misangpot lamang kana sa panagbingkil. Kadugayan, mihunong ko sa pagpamugos niya aron dili madaot ang among relasyon.

Atol sa Oktubre 2019 nga kinatibuk-ang komperensiya, si Presidente Russell M. Nelson midapit sa mga miyembro sa Simbahan sa “paghimo og [atong] kaugalingong plano” aron sa pagpalig-on sa atong pagpamatuod bahin sa Pagpahiuli.¹ Samtang naghunahuna ko niini nga pagdapit, ako kusganong mibati nga ako kinahanglang dunay buhaton aron mas mahimong maayo ang mga butang tali ni Mama Wong ug nako.

Alang sa akong Bag-ong Tuig nga resolusyon, ako mipasalig sa akong kaugalingon nga mobasa sa Basahon ni Mormon uban ni Mama Wong. Sa higayon nga moingon siya nga sakit ang iyang mata, moingon ko, “Maminaw ra ka.” Kon moingon siya nga manghugas siya sa mga plato, mosunod ko niya sa kusina ug mopadayon sa pagbasa og kusog.

Ang nahitabo si Mama Wong naminaw diay og maayo ug nahinumdoman unsay akong gibasa. Paglabay sa panahon, siya na lang ang mibasa sa iyang kaugalingon. Wala madugay siya misulti nako nga ang usa ka ordinaryo nga tawo dili makasulat sa Basahon ni Mormon. Siya wala magduhaduha nga ang basahon mao ang pulong sa Dios. Alang nako, ang makita siya gikan sa pagkadili interesado ngadto sa pagkagusto nga mobasa ug mohatag og pagpamatuod bahin sa Basahon ni Mormon usa ka milagro.

Human nabunyagan si Mama Wong, nabalaka ko nga mipasakop lang siya sa Simbahan tungod nako. Apan karon siya adunay iyang kaugalingong pagpamatuod. Sulod sa mga katuigan naningkamot ko nga “matarong” siya, apan ang iya lamang nga gikinahanglan mao ang yano, gamhanang pulong sa Dios.

Mapasalamaton ko sa buhing propeta nga kanunayng naghatag nato og tukma sa panahon nga giya. Kon kita mobuhat sa unsay iyang gitudlo, daghang panalangin ang mosunod. Kini nga kasinatian mipakita nako kon unsa gayod ka dako ang tinguha sa Ginoo nga mopanalangin nato. Ang akong gihimo mao lamang ang pagbasa og pipila ka kapitulo ngadto sa akong inahan gikan sa Basahon ni Mormon. Dayon ang Ginoo mao na ang mihimo sa uban!