“Elder Ezra Taft Benson Nagbisita sa mga Santos didto sa Poland,” Liahona, Sept. 2022.
Mga Istorya gikan sa Mga Santos, Volume 3
Elder Ezra Taft Benson Nagbisita sa mga Santos didto sa Poland
Gisangonan sa Unang Kapangulohan, si Elder Benson sa Korum sa Napulog Duha ka Apostoles ang nagdumala sa mga paningkamot sa kahupayan sa Simbahan didto sa Europe human sa Ikaduhang Gubat sa Kalibotan. Sa iyang 11 ka bulan didto, siya mibiyahe og sobra sa 60,000 ka milya (96,000 km). Sa iyang luyo mao ang mga nangaguba sa gubat sa Warsaw, Poland.
Mga litrato sa maayong kabubut-on sa Church History Library, Siyudad sa Salt Lake
Sa usa ka maanindot nga gabii sa Dominggo sa ting-init niadtong 1946, si Ezra Taft Benson ug ang duha ka kauban sa pagbiyahe nagsakay subay sa labihan ka mingaw nga kadalanan sa Zełwągi, Poland. Ang libaongon nga kadalanan ug kusog nga ulan ang nakapalisod sa mga nagbiyahe sa tibuok adlaw, apan ang bati nga panahon sa kataposan nawala ra samtang ang kalalakin-an hapit na moabot sa ilang padulngan.
Ang Zełwągi kanhi kabahin sa Germany ug nailhan nga Selbongen. Ang nasyonal nga mga utlanan nausab human sa gubat, hinoon, ug kadaghanan sa sentro ug silangang Europe anaa na ubos sa pagdumala sa Soviet Union. Niadtong 1929, ang naglambo nga Selbongen Branch mitukod sa labing una nga meetinghouse sa mga Santos sa Ulahing mga Adlaw didto sa Germany. Apan human sa unom ka tuig nga gubat, ang mga Santos diha sa lungsod naglisod sa panginabuhi.1
Ang kasayoran nga si Elder Benson anaa na sa Poland morag usa ka milagro. Kay walay telepono nga magamit didto sa Poland, siya ug ang iyang mga kauban naglisod sa pagkontak sa mga opisyales nga makatabang nila sa pagkuha og mga papeles aron makasulod sa nasod. Human lamang sa daghang pag-ampo ug balik-balik nga pagkontak sa gobyerno sa Poland nga ang apostol nakakuha sa gikinahanglan nga mga visa.2
Samtang hapit na moabot ang jeep sa karaan nga meetinghouse sa Zełwągi, kadaghanan sa mga tawo sa dalan nagkatibulaag ug nanago. Gihunong ni Elder Benson ug sa iyang mga kauban ang sakyanan atubangan sa gambalay ug misaka. Gipailaila nila ang ilang kaugalingon ngadto sa usa ka babaye sa duol ug nangutana kon sila aduna bay nakita nga chapel sa mga Santos sa Ulahing mga Adlaw. Ang mga mata sa babaye napuno sa mga luha sa kahupayan. “Ang mga kaigsoonan ania na!” siya misinggit sa pinulongan nga German.
Diha-diha dayon ang mga tawo nanggawas gikan sa gisirad-an nga mga pultahan, nanghilak ug nangatawa sa kalipay. Ang Zełwągi nga mga Santos wala nay kontak gikan sa kinatibuk-an nga mga lider sa Simbahan sulod sa tulo ka tuig, ug nianang buntaga daghan nila ang nagpuasa ug nag-ampo nga adunay mobisita nga misyonaryo o lider sa Simbahan. Sulod sa pipila ka oras, hapit usa ka gatos nga mga Santos ang nagpundok aron maminaw sa apostol nga mamulong.
Samtang namulong si Elder Benson ngadto sa mga Santos, duha ka armado nga Polish nga mga sundalo ang misulod sa chapel. Ang kongregasyon nangahadlok, apan ang apostol miagda sa mga sundalo sa pagpanglingkod duol sa atubangan sa lawak. Sa iyang pakigpulong, siya mipasabot og maayo sa kaimportante sa kalingkawasan ug kagawasan. Ang mga sundalo naminaw og maayo, nagpabilin sa ilang gilingkoran alang sa panapos nga kanta, ug mibiya nga walay nahitabo. Human niana, si Elder Benson nakighimamat sa presidente sa branch ug nagbilin og pagkaon ug kwarta alang sa mga Santos, mipaniguro nila nga daghan pang tabang ang moabot.3
Wala madugay human niana, si Elder Benson misulat sa Unang Kapangulohan. Siya nadasig nga makita nga miabot ang tabang sa Simbahan sa mga Santos didto sa Europe apan nabalaka mahitungod sa kalisdanan nga padayong giatubang sa mga Santos.
“Tingali ang daghang benepisyo sa talagsaong programa sa welfare sa Simbahan ngadto niini ug sa uban natong mga Santos didto sa Europe mahimong dili gayod mahibaloan,” siya misulat, “apan daghang kinabuhi sa walay pagduhaduha ang naluwas, ug ang hugot nga pagtuo ug kaisog sa daghan sa atong maunongon nga mga miyembro nalig-on gayod.”4
Mga miyembro sa Simbahan didto sa Selbongen, Germany (giusab ang ngalan og Zełwągi, Poland, human sa gubat), nagpundok sa gawas sa ilang chapel niadtong mga 1930.