Alang sa mga Ginikanan

Pagtinguha sa Espirituhanong Giya

Minahal nga mga Ginikanan,

Niini nga isyu sa magasin, tulo ka Kinatibuk-ang Awtoridad mipaambit og mga pagtulon-an ug personal nga mga kasinatian sa pamilya kon unsaon sa pagtinguha, pagpangita, ug pagsunod sa espirituhanong giya.

Mga Panaghisgotan sa Ebanghelyo

Mosalig sa Atong mga Pagpamatuod

Sa pahina 4, si Elder Ronald A. Rasband mipaambit og istorya gikan sa iyang family history sa pagtudlo sa baroganan nga ang atong Manluluwas dili motalikod kanato. Basaha kini nga artikulo ug hisgoti kon sa unsang paagi nga ang unang mga Santos misalig sa ilang mga pagpamatuod kang Jesukristo ug sa plano sa Langitnong Amahan sa kaluwasan.

Pakigtambag uban sa Ginoo

Sa pahina 30, si Elder Patricio M. Giuffra mihulagway kon sa unsang paagi niya, isip usa ka tin-edyer nga kinabig sa Simbahan, mihukom nga moserbisyo og misyon ug mopadayon og edukasyon sa kolehiyo. Dayon siya mipaambit sa iyang tubag sa pangutana, Unsay imong buhaton kon ang personal nga pagpadayag moabot nga masukwahi sa sentido komon?

Pagdawat og Giya gikan sa Espiritu

Sa unsang paagi nga kita mas hingpit nga makabenepisyo gikan sa gasa sa Espiritu Santo sa atong mga kinabuhi? Si Elder José A. Teixeira misuhid niini nga hilisgotan sa pahina 40. Basaha ang iyang artikulo ug hisgoti unsaon sa pagdawat og mas abunda nga giya gikan sa Espiritu.

Dali, Sunod Kanako Kalingawan sa Pamilya

Pamalandongi ang Dalan

Mga Panultihon 3–4

1. Pagbutang og litrato sa Manluluwas sa usa ka bahin sa dako nga hawan o kwarto.

2. Barog sa atbang nga bahin sa kwarto. Pulipuliha sa pagtaptap ang mga mata sa matag sakop sa pamilya, ituyok-tuyok sila, ug dayon susiha kon sila makalakaw ba padulong sa litrato ni Jesukristo nga walay bisan unsa nga tabang.

3. Basaha ang Mga Panultihon 4:26–27.

Panaghisgotan: Unsa nga matang sa tabang ang gihatag nato niini nga kinabuhi aron magsubay kita sa dalan nga padulong ni Jesukristo? Alang sa dugang nga panaghisgotan, basaha ang Mga Panultihon 3:5–6. Unsa kaha nga mga aksiyon ang atong gikinahanglan aron makasalig sa Ginoo uban sa atong tibuok mga kasingkasing?

Gisumiter ni Mitzi Schoneman

Gikan sa Alang sa Kalig-on sa mga Kabatan-onan nga Magasin

Ang mga magasin sa kabatan-onan niining bulana naghisgot kon unsaon sa Ginoo sa pagtabang kanato karon, sa unsang paagi nga ang usa ka batan-ong lalaki nakat-on og mga leksiyon gikan sa iyang mga ginikanan, ug sa mga pagtulon-an ni Elder Soares mahitungod kon sa unsang paagi nga si Jesukristo makadasig sa uban sa pagtabang nato.

Gikan sa Higala nga Magasin

Ang Higala niining bulana motabang sa inyong mga anak nga makat-on mahitungod sa mga pagtulon-an ni Isaias, makasabot ngano nga kita mogamit og limpyo nga pinulongan, ug makakita kon sa unsang paagi nga ang kabataan makatabang sa paghimo og mga video sa Basahon ni Mormon.