O Iesu Keriso o le Malosiaga o le Autalavou

Saunia e Elder Dieter F. Uchtdorf

O Le Korama a Aposetolo e Toasefululua

Faalagolago ia Iesu Keriso. O le a Ia taitai oe i le ala saʼo. O Ia o lou malosiaga.

I le saunia ai mo lenei savali i le asō, sa ou lagonaina ni uunaiga malolosi e talanoa atu i tamaitai talavou ma alii talavou.

Ou te talanoa atu foi ia i latou sa talavou muamua, e oo lava ia i latou ua le mafai ona toe manatua moni taimi na talavou ai.

Ma ou te talanoa atu ia i latou uma e alolofa i o tatou tagata talavou ma mananao ia i latou ia manuia i le olaga.

Mo le tupulaga faiae, ua i ai sa’u sāvali ua faapitoa lava mo outou mai lo tatou Faaola, o Iesu Keriso.

O le Sāvali a le Faaola ia te Oe

A’u uo talavou pele, pe ana faapea o loo i ai iinei le Faaola i le taimi nei lava, o le a Sana fetalaiga ia te outou?

Ou te talitonu o le a Ia amata e ala i le faailoa atu o Lona alofa loloto mo outou. Atonu Na te fetalai atu i ni upu, ae o le a tafe atu foi ma le malosi tele—mai le tau na ona i ai o Ia iinei—lea o le a lē mafaaseseina, ae o le a oo atu i le ta’ele o lou loto, ma faatumulia ai lou agaga atoa!

Ae, ona tatou te vaivai uma ma lē atoatoa, atonu o le a tolotolo atu ni popolega i lou mafaufau. Atonu o le a e manatuaina ni mea sese na e faia, o taimi na e lolo atu ai i faaosoosoga, o mea e te moomoo ma’imau pe a na e lē faia—pe moomoo foi sa lelei atu ona e faia.

O le a lagonaina e le Faaola mea na, ma ou te talitonu o le a Ia faamautinoa atu ia te oe i ni upu na Ia fetalaia i tusitusiga paia:

“Aua tou te matatau.”¹

“Aua le Masalosalo.”²

“Ia outou loto tetele.”³

“Aua le atuatuvale o outou loto.”⁴

Ou te lē manatu o le a Ia faia ni ‘alofaga mo au mea sese. Na te lē faaitiitia foi. Leai, o le a Ia faatonu oe ia e salamo—ia lafoai ese au agasala, ia sui, ina ia mafai ona Ia faamagalo ia te oe. O le a Ia faamanatu atu ia te oe le 2,000 tausaga talu ai na Ia ave ai na agasala i Ona lava luga ina ia mafai ona e salamo ai. O le vaega lena o le fuafuaga o le fiafia na faameaalofa mai ia i tatou mai lo tatou Tama Faalelagi alofa.

Atonu o le a faasino atu e Iesu ia te oe au feagaiga ma Ia—lea na osia ina ua e papatiso ma toefaafouina i taimi taitasi e te taumafa ai i le faamanatuga—ua e maua ai se fesootaiga faapitoa ma Ia. O le ituaiga o fesootaiga ua faamatalaina e tusitusiga paia o le amo faatasi, lea, faatasi ai ma Lana fesoasoani, e mafai ai ona e amoina soo se avega.⁵

Ou te talitonu e finagalo le Faaola o Iesu Keriso ia te oe ia e vaai, lagona, ma iloa o Ia o lou malosiaga. O lena malosiaga faatasi ma Lana fesoasoani, e leai ai ni tapulaa i mea e mafai ona e ausiaina. O lou gafatia e lē faatapulaaina. E finagalo o Ia e te vaai ia te oe lava ia i le ala o loo Ia silasila mai ai ia te oe. Ma e ese tele lena mea mai le ala e vaai atu ai le lalolagi ia te oe.

O le a tautino mai le Faaola, i ni faaupuga mautinoa, o oe o se afafine po o se atalii o le Atua Silisiliese. O lou Tama Faalelagi o le tagata aupito silisili ona mamalu i le atulaulau, tumu i le alofa, olioli, mama, paia, malamalama, alofatunoa, ma le upumoni. Ma e i ai le aso e finagalo ai o Ia e te mautofi i mea uma o loo ia te Ia.⁶

O le mafuaaga lena ua outou i ai i luga o le lalolagi—e a’oa’o, tuputupu a’e, ma alualu i luma ma avea ma mea uma na foafoa ai oe e lou Tama i le Lagi e te avea ai.

Ina ia mafai lenei mea, na Ia auina mai ai Iesu Keriso e avea ma ou Faaola. O le faamoemoega lena i tua atu o Lana fuafuaga sili o le fiafia, Lana Ekalesia, Lana perisitua, o tusitusiga paia—mea uma.

O le tou taunuuga lena. O le tou lumanai lena. O le tou filifiliga lena!

Upumoni ma Filifiliga

I le fatu o le fuafuaga a le Atua mo lou fiafia o lou mana e filifili ai.⁷ O le mea moni, e finagalo lou Tama Faalelagi ia e filifili le olioli e faavavau faatasi ma Ia, ma o le a Ia fesoasoani ia te oe ia ausia, ae o le a Ia lē faamalosia lava oe.

O lea, Na te faataga ai oe e filifili: Malamalama po o le pouliuli? Lelei po o le leaga? Olioli po o le faanoanoa? Ola e faavavau po o le oti faaleagaga?⁸

E foliga mai o se filifiliga faigofie, a ea? Ae peitai, o iinei i le lalolagi, e foliga mai e faigata atu i lo le mea e tatau ona i ai.

O le faafitauli, tatou te lē vaai i mea i taimi uma i le manino e pei ona tatou mananao i ai. Sa faatusatusa e le Aposetolo o Paulo lena mea i le vaai “faanenefu i le faata.”⁹ E tele na’ua le fenumia’i i le lalolagi e uiga i le mea e sa’o ma le mea e sese. E mimilo le mea moni ia avea ai le leaga e foliga i le lelei ma le lelei ia foliga i le leaga.¹⁰

Ae a e saili ma le naunautai i le upumoni—upumoni e faavavau ma lē masuia—o le a manino atili au filifiliga. Ioe, o le a i ai pea ou faaosoosoga ma tofotofoga ia te oe. E tutupu pea mea leaga. O mea e iso ai. O mea matautia. Ae e mafai lava ona e puleaina pe a e iloaina po o ai oe, pe aisea ua e i ai iinei, ma pe a e faatuatuaina le Atua.

O fea la e te maua ai le upumoni?

O loo i ai i totonu o le talalelei a Iesu Keriso. Ma o le atoaga o lena talalelei o loo aoaoina i totonu O Le Ekalesia a Iesu Keriso o le Au Paia o Aso e Gata Ai.

Na fetalai Iesu Keriso, “O A’u nei le ala, ma le upu moni, ma le ola: e le alu atu lava se tasi i le Tama, pe a le ui mai ia te au.”¹¹

Pe a i ai ni au filifiliga taua e faia, o Iesu Keriso ma Lana talalelei toefuataiina o le filifiliga aupito silisili lea. A i ai ni au fesili, o Iesu Keriso ma Lana talalelei toefuataiina o tali aupito silisili ia. Pe a e lagonaina le vaivai, o Iesu Keriso lou malosiaga.

Na te avatua le malosi i ē ua vaivai; a o ē ua leai se malosi, na te faatuputele i ai le malosi.

O i latou e faatalitali i le Alii o le a faafouina e Lona malosi.¹²

Mo Le Malosi o le Autalavou

Ina ia fesoasoani ia te oe ia maua le Ala ma ia fesoasoani ia te oe ia faia le mataupu faavae a Keriso ma faatosinaga e taiala i lou olaga, ua saunia e Le Ekalesia a Iesu Keriso o le Au Paia o Aso e Gata Ai se punaoa fou, se lomiga toefaafouina o le Mo le Malosi o le Autalavou.

Mo le silia ma le 50 tausaga, ua avea pea le Mo Le Malosi o le Autalavou ma se taiala mo augatupulaga o talavou o le Au Paia o Aso e Gata Ai. Ou te teuina lava se kopi i la’u taga, ma ou te faasoaina atu i tagata e fiailoa o tatou tulaga faatonuina. Ua toe faafouina ma toe faaauleleiina ia taulima lelei atili ai luitau ma faaosoosoga o o tatou aso. O le lomiga fou o le Mo Le Malosi o le Autalavou o loo maua i luga o le initoneti i gagaga eseese e 50 ma o le a maua foi i pepa lolomi. O le a avea ma fesoasoani tele mo le faia o filifiliga i lou olaga. Faamolemole ia uumauina e pei o sa oe lava ia ma faasoa atu i au uo.

O lenei lomiga fou o le Mo Le Malosi o le Autalavou o loo soāulutalaina i le O Se Taiala mo le Faiga o Filifiliga.

Ina ia matuā manino, o le taiala aupito silisili e mafai ona e maua gofie mo le faiga o filifiliga, o Iesu Keriso. O Iesu Keriso o le malosiaga o le autalavou.

O le faamoemoega o le Mo Le Malosi o le Autalavou o le faasino atu lea o oe ia te Ia. E aoao ai oe i upumoni e faavavau o Lana talalelei toefuataiina—upumoni e uiga i le po o ai oe, po o ai o Ia, ma mea e mafai ona e ausiaina faatasi ma Lona malosiaga. E aoao ai oe i le auala e fai ai filifiliga amiotonu e fua i na upumoni e faavavau.¹³

E taua foi le iloa o mea e le faia e le Mo Le Malosi o le Autalavou. Na te lē faia ni faai’uga mo oe. Na te lē avatua ia te oe se “ioe” po o se “leai” e uiga i filifiliga uma atonu e te feagai ai. O le Mo Le Malosi o le Autalavou e taulai atu i le faavae mo au filifiliga. E taulai atu i tulaga faatauaina, mataupu faavae, ma aoaoga faavae nai lo amioga patino uma.

O le Alii, e ala mai i Ana perofeta, na taialaina pea i tatou i lena itu. O loo Ia aioi mai ia i tatou ia “faateleina lo [tatou] gafatia faaleagaga e maua ai faaaliga.”¹⁴ O loo Ia valaauliaina i tatou ia “faalogo ia te Ia.”¹⁵ O loo Ia valaau mai ia i tatou ia mulimuli atu ia te Ia i auala maualuluga atu ma paia atu.¹⁶ Ma o loo tatou aoao i se ala faigofie i vaiaso uma i le Sau, Mulimuli Mai ia te Au.

Ou te manatu e mafai e le taiala ona avatu ia te outou ni lisi uumi o laei e lē tatau ona ofu ai, upu e lē tatau ona tautatala ai, ma ata e lē tatau ona matamata ai. Ae pe o le a fesoasoani moni lena mea i se ekalesia i le lalolagi atoa? Pe o le a saunia moni ea oe e se auala faapena mo se olaga atoa o le soifuaga faaKeriso?

Sa saunoa Iosefa Samita, “Ou te aoao ia i latou mataupu faavae sa’o, ona latou pulea lea o i latou lava.”¹⁷

Ma na ta’u atu e le Tupu o Peniamina i lona nuu i le Tusi a Mamona, “E le mafai ona ou ta’u atu ia te outou mea uma e mafai ona outou faia ai le agasala; ona ua tele ala ma auala eseese, ua matua tele lava e le mafai ona ou faitauina.”¹⁸

Sa faaauau le saunoaga a le Tupu o Peniamina, “Ae o le mea lenei e mafai ona ou taʼu atu ia te outou, … vaavaaia outou lava, ma o outou mafaufauga, ma a outou upu, ma a outou galuega, ma tausi i poloaiga a le Atua, ma tumau pea i le faatuatua i … lo tatou Alii, e oo lava i le iuga o o outou ola.”¹⁹

E sese ea le i ai o tulafono? E leai. Tatou te manaomia uma lava [tulafono] i aso uma. Ae e sese le taulai atu na o tulafono i lo le taulai atu i le Faaola. E manaomia ona e iloa ia aisea ma faapefea ona iloilo lea o taunuuga o au filifiliga. E manaomia ona tuu atu lou faalagolago ia Iesu Keriso. O le a Ia taitai oe i le ala saʼo. O Ia o lou malosiaga.²⁰

O le Mana o le Aoaoga Faavae Moni

O le Mo Le Malosi o le Autalavou e tuusa’o lava le tautinoina o le mataupu faavae a Iesu Keriso. E tuusa’o lava le valaauliaina o oe e fai ni filifiliga e fua i le mataupu faavae a Keriso. Ma e tuusa’o lava i le faamatalaina o faamanuiaga ua folafola mai e Iesu Keriso ia i latou o e mulimuli i Ona Ala.²¹

Na aoao mai Peresitene Russell M. Nelson: “Afai o lou manao silisili o le faamuamua o le Atua [i lou olaga], … e tele faaiuga o le a faigofie atu ona fai. … E tele faafitauli o le a lē avea ma ni faafitauli! E te iloa le auala sili e teuteu ai oe lava ia. E te iloa po o a mea e matamata ma faitau ai, po o fea e faaalu ai lou taimi, ma po o ai tou te fegalegaleai. E te iloa le mea e te manao e ausia. E te iloa le ituaiga o tagata e te … manao moni lava e avea ai.”²²

O Se Tulaga Faatonuina Maualuga Atu

E maualuluga tele tulaga faatonuina a Iesu Keriso mo ē e mulimuli ia te Ia. Ma o le valaaulia ia saili ma le naunautai i Lona finagalo ma ola i Ana upumoni, o le tulaga faatonuina silisili lea ona maualuga!

O filifiliga taua faaletino ma faaleagaga e lē tatau ona fua pau i mea e fiafia i ai le tagata lava ia, pe o mea e talafeagai pe lauiloa.²³ E lē o fetalai mai le Alii, “Fai soo se mea e te manao i ai.”

O loo Ia fetalai mai, “Ia faamuamua le Atua.”

O loo Ia fetalai mai, “Sau, mulimuli mai ia te au.”²⁴

O loo Ia fetalai mai, “Ola i se auala paia atu, maualuga atu, ma sili ona faatagata matua.”

O loo Ia fetalai mai, “Tausi a’u poloaiga.”

O Iesu Keriso o lo tatou faataitaiga atoatoa, ma e tatou te tauivi ma le malosi atoa o o tatou agaga e mulimuli ia te Ia.

A’u uo peleina, se’i o’u toe fai atu, ana faapea o loo tu le Faaola iinei i le asō, o le a Ia faailoa atu Lona alofa lē uma mo outou, Lona talitonuga atoa ia te outou. O le a Ia ta’u atu ia te outou e mafai ona outou faia lenei mea. E mafai ona outou atia’eina se olaga olioli ma fiafia ona o Iesu Keriso lou malosiaga. E mafai ona outou maua le talitonuga, filemu, saogalemu, fiafia, ma le auai ai i le taimi nei ma le faavavau, ona o le a outou maua mea uma ia Iesu Keriso, i Lana talalelei, ma i Lana Ekalesia.

Ou te molimau atu ai ma le faamaoni i nei mea i le avea ai ma se Aposetolo a le Alii o Iesu Keriso ma tuu atu ia te outou la’u faamanuiaga faamaoni i le lotofaafetai loloto ma le alofa mo outou, i le suafa o Iesu Keriso, amene.

Faamatalaga

1. Luka 5:10; 8:50; 12:7; Mataupu Faavae ma Feagaiga 38:15; 50:41; 98:1.

2. Mataupu Faavae ma Feagaiga 6:36

3. Mataio 14:27; Ioane 16:33; Mataupu Faavae ma Feagaiga 61:36; 68:6; 78:18.

4. Ioane 14:1, 27.

5. Tagai i le Mataio 11:28–30.

6. Tagai i le Mataupu Faavae ma Feagaiga 84:38.

7. Atonu e mafai ona e faapea sa mamanuina le fuafuaga a le Tama e faataga ai oe e faailoa ou manaoga e ala i au filifiliga, ina ia mafai ona e mauaina ia taunuuga atoa o mea e te manao ai. E pei ona aoao mai Elder Dale G. Renlund, “O le sini a lo tatou Tama Faalelagi i tulaga faamatua, o le le tuu atu lea i Ana fanau ia faia le mea sa’o; ae o le tuu atu lea i Lana fanau e filifili e fai le mea sa’o ma mulimuli ane avea e faapei o Ia” (“Ina Filifili Ia Outou i le Aso Nei,” Liahona, Nov. 2018, 104).

8. Tagai i le 2 Nifae 2:26–27.

9. 1 Korinito 13:12.

10. Tagai i le Isaia 5:20.

11. Ioane 14:6.

12. Tagai i le Isaia 40:29–31.

13. I le avea ai ma Au Paia o Aso e Gata Ai, ua tele ina lauiloa i tatou mo mea tatou te faia ma mea e lē faia—o a tatou amioga. E mafai ona lelei lenei mea, ae e sili atu ona lelei le lauiloa mo mea tatou te iloa (o upumoni ia e uunaia a tatou amioga) ma mo lē tatou te iloa (le Faaola—ma le auala e uunaia ai e lo tatou alofa mo Ia a tatou amioga).

14. Russell M. Nelson, “Faaaliga mo le Ekalesia, Faaaliga mo o Tatou Olaga,” Liahona, Me 2018, 96.

15. Tagai ia Russell M. Nelson, “Faalogo ia te Ia,” Liahona, Me 2020, 88-92.

16. O le auala e faavae-i-mataupu-faavae o le taiala fou o le Mo Le Malosi o le Autalavou e ogatusa ma isi ta’imua talu ai nei na faalauiloa e le Ekalesia a le Faaola, e aofia ai le Tala’i La’u Talalelei, auaunaga, le mataupu aoaoina e faatotonugalemu-i-le-aiga o le Sau, Mulimuli Mai ia te Au, le polokalama a Tamaiti ma le Autalavou, Aoao Atu i le Ala a le Faaola, atoa ai ma le Tusitaulima Aoao fou. Ua manino lava, o loo atiaeina e le Alii lo tatou gafatia faaleagaga. O loo Ia faaalia le faatuatuaga faateleina i Lona nuu o le feagaiga i aso e gata ai.

17. Aoaoga a Peresitene o le Ekalesia: Iosefa Samita (2007), 284.

18. Mosaea 4:29. I se ala lava e tasi, o le mea lea sa taumafai le Au Faresaio i aso o Iesu e fai. I lo latou naunautaiga e taofi tagata mai le soliga o tulafono, sa latou tuufaatasia ai le faitau selau o tulafono e fua i lo latou malamalamaaga e uiga i tusitusiga paia. O le mea sa sese i le Au Faresaio, sa latou manatu lava o le a lavea’ia i latou e a latou tulafono. Ona oo lea ina ua afio mai le Faaola, sa latou le’i iloaina o Ia.

19. Mosaea 4:30; faaopoopo le faamamafa.

20. O le isi mafuaaga e manaomia ai se auala e faavae-i-mataupu-faavae i aso nei ona o le faateleina o le eseesega o aganuu o le Ekalesia a le Alii. O mataupu faavae e faavavau ma mo tagata uma. O tulafono patino po o le faaaogaaga o na mataupu faavae e talafeagai lelei i nisi o nofoaga ae lē talafeagai i isi nofoaga. O Iesu Keriso e tuufaatasia i tatou faatasi ai ma upumoni e faavavau na Ia aoao mai, e tusa lava pe eseese le faaaogaaga patino i le aluga o taimi ma le tele o aganuu. O le faafitauli la i le lisiina o mea uma e fai ma mea e lē faia e lē na’o le lē talafeagai ma le lē gafataulimaina. O le faafitauli, na te aveesea lo tatou taulaiga mai le Puna moni o lo tatou malosi, lo tatou Faaola, o Iesu Keriso.

21. E tele tausaga ua tuanai, na saunoa mai ai Peresitene Boyd K. Packer i nei upu mamana: “O mataupu faavae moni, a malamalama i ai, e suia ai uiga ma amioga. O le suesueina o mataupu faavae o le talalelei o le a vave ona faaleleia ai le amio nai lo le suesuega o le amio lea o le a faaleleia ai le amio” (“Aua le Fefe,” Liahona, Me 2004, 79).

    Sa aoao mai e Peresitene Ezra Taft Benson se upumoni talitutusa: “E galue le Alii mai totonu i fafo. E galue le lalolagi mai fafo i totonu. … Atonu e mafai e le lalolagi ona suia amioga a tagata, ae e mafai e Keriso ona suia le natura o le tagata” (“Born of God,” Ensign, Nov. 1985, 6).

    Ina ua vaaia e le perofeta o Alema o le Tusi a Mamona le amioleaga i le lalolagi na siomia o ia, sa ia liliu atu i le afioga a le Atua ona sa ia iloa “sa i ai sona uiga mamana tele atu i luga o mafaufau o tagata nai lo le pelu, po o se isi lava mea, ua oo ia te i latou—o lea na manatu ai Alema e tatau ona latou faataitaia le mana o le afioga a le Atua” (Alema 31:5).

22. Russell M. Nelson, “Ia Faamuamua le Atua,” Liahona, Nov. 2020, 94. Na faamalamalama mai e Peresitene Nelson lenei auala ina ua ia aoaoina i tatou e uiga i le faamamaluina o le aso Sapati: “A o ou laitiiti, sa ou suesue i galuega a isi tagata na tuufaatasia ni lisi o mea e fai ma mea e lē faia i le Sapati. O se taimi mulimuli ane sa ou iloa ai mai tusitusiga paia o la’u amio ma o’u uiga i le Sapati o le a avea ma se faailoga i le va o a’u ma lo’u Tama Faalelagi. Faatasi ai ma lena malamalamaaga, sa ou le toe manaomia ni lisi o mea e faia ma mea e lē faia. Pe a manaomia ona ou faia se faaiuga pe o se gaoioiga na talafeagai pe leai foi mo le Sapati, e na o lo’u fesili lava ia te a’u, ‘O le a le faailoga ou te manao e avatu i le Atua?’ O lena fesili e matua ta’u manino mai ai lava a’u filifiliga e uiga i le aso Sapati” (“O Le Sapati o se Aso Fiafia,” Liahona, Me 2015, 130).

23. Sa aoao mai Elder David A. Bednar e faapea “e fesoasoani foi mataupu faavae o le amiotonu ia i tatou e vaavaai ai i talaatu o mea e faatauaina e le tagata lava ia ma naunauga faapitoa o le tagata lava ia e ala i le tuuina mai o le vaaiga taua i upumoni e faavavau a o tatou faatautaia tulaga eseese, luitau, faaiuga, ma aafiaga o le olaga nei” (“O Mataupu Faavae o La’u Talalelei,” Liahona, Me 2021, 123–24).

24. Luka 18:22.