I Le Asō

Saunia e Elder Ronald A. Rasband

O Le Korama a Aposetolo e Toasefululua

O loo faia e lo tatou perofeta soifua lana vaega e faalolovaia le lalolagi i le Tusi a Mamona. E tatau ona tatou mulimuli i lana taitaiga.

Ou uso e ma tuafafine pele, i le Tusi a Mamona o le fasifuaitau “i le asō”¹ o loo faaaoga soo e valaaulia ai le gauai atu i fautuaga, folafolaga, ma aoaoga. Na apoapoai e le Tupu o Peniamina le nuu, i lana lauga faaiu, “Faalogo mai i a’u upu o le a ou tautala atu ai ia te outou i le asō; “ ia tatala mai o outou taliga ina ia mafai ona outou lagona mai, ma o outou loto ina ia mafai ona outou malamalama, ma o outou mafaufau ina ia mafai ona tatalaina o mealilo a le Atua i la outou vaai.”² O le konafesi aoao o se faatulagaga foi faapena. Ua tatou o mai e faalogo i fautuaga “i le asō,” ina ia mafai ona tatou “faamaoni i taimi uma”³ i le Alii ma Lana talalelei. Ua malosi le uuna’ia o au “i le asō,” i le taua o le toefaafou o la tatou tuuto atu i le Tusi a Mamona, lea na ta’ua e Iosefa Samita “e aupito sili ona sa’o nai lo se isi lava tusi i le fogaeleele.”⁴

Ua ou uuina i lo’u lima se kopi o le Tusi a Mamona. O la’u lomiga tuai o le 1970, ma e pele ia te au. O ona foliga ua leaga ma masaesae, ae e leai se isi tusi e taua i lo’u olaga ma la’u molimau nai lo le tusi lenei. O le faitauina, na ou maua ai se molimau e ala i le Agaga e faapea, o Iesu Keriso o le Alo o le Atua,⁵ o Ia o lo’u Faaola,⁶ ma o nei tusitusiga paia o afioga a le Atua,⁷ ma o le talalelei ua toefuatai mai.⁸ Ua gotouga na upumoni i totonu ia te au. E pei ona fai mai le perofeta o Nifae, “Ua fiafia loʼu agaga i mea a le Alii.”⁹

Agavale i le taumatau: O Elder Ronald A. Rasband, faifeautalai talavou; Peresitene Harold Wilkinson, peresitene o le Misiona o Setete i Sasae; ma Elder Marion D. Hanks, Fitugafulu Au Pulega Aoao.

O le talaaga lea o la’u tusi. A o avea o se faifeautalai talavou, sa ou talia le fautuaga a Elder Marion D. Hanks, o lē sa asiasi atu ia i matou i le Misiona a Setete i Sasae. Sa avea muamua o ia ma peresitene o le Misiona a Peretania, ma o le toalua o ana faifeautalai o loo susū atu i luga o le tulaga i le asō: o o’u Uso pele o Elder Jeffrey R. Holland ma Elder Quentin L. Cook.¹⁰ E pei lava ona sa ia faia i ana faifeautalai i Egelani, sa ia lu’iina i matou e faitau se kopi e le’i makaina o le Tusi a Mamona ia le itiiti ifo i le faalua. Sa ou taliaina le lu’i. O le faitauga muamua sa tatau ona ou faailogaina pe vasevase mea uma e faasino pe molimau ai ia Iesu Keriso. Sa ou faaaogaina se peni mumu, ma sa ou vasevaseina le tele o faaupuga. O le taimi lona lua, na fai mai Elder Hanks e faailoga ia mataupu faavae ma aoaoga faavae autu o le talalelei, ma o le taimi lea, sa ou faaaoga ai le lanumoana e faailoga ai mau. Sa ou faitauina faalua le Tusi a Mamona, e pei ona fautuaina mai, ona toe faitauina foi lea faalua ma faaaoga ai le samasama ma le uliuli e faailoga ai fuaitau sa tumatila mai ia te au.¹¹ E pei ona outou tagai mai, e tele ni faailoga na ou faia.

Sa matuai tele atu isi mea i a’u faitauga nai lo le na ona faailogaina o mau. O faitauga taitasi o le Tusi a Mamona, mai luma i tua, sa faatumuliaina ai au i se alofa maoae i le Alii. Sa ou lagonaina se molimau ua matuai maua’a o le moni o Ana aoaoga ma le ala e faaaoga ai “i le asō.” E fetaui lelei lenei tusi ma lona faaulutala, “O Se Tasi Molimau ia Iesu Keriso.”¹² Faatasi ai ma lena suesuega ma le molimau faaleagaga na mauaina, sa avea ai au o se faifeautalai o le Tusi a Mamona, ma se soo o Iesu Keriso.¹³

“I le asō,” o se tasi o faifeautalai silisili o le Tusi a Mamona o Peresitene Russell M. Nelson. Ina ua faatoa valaauina o ia o se Aposetolo fou, sa ia tuu atu se folasaga i Accra, Kana.¹⁴ Sa i ai i le aofia malo faaaloalogia, e aofia ai se tupu faaleituaiga Aferika, lea sa avea ma ana faamatalaupu. O le tupu o se tagata a’oa’o faamaoni o le Tusi Paia ma e alofa i le Alii. I le maea ai o le saunoaga a Peresitene Nelson, sa alu atu i ai le tupu, o lē sa fesili atu i le faaPeretania sa’o lelei, “O ai ea oe?” Sa faamatala atu e Peresitene Nelson o ia o “se Aposetolo faauuina a Iesu Keriso.”¹⁵ O le isi fesili a le tupu o le “O le a se mea e mafai ona e aoao mai ia te au e uiga ia Iesu Keriso?”¹⁶

Sa aapa ifo Peresitene Nelson i le Tusi a Mamona ma susu’e i le 3 Nifae 11. Sa faitau faatasi e Peresitene Nelson ma le tupu le lauga a le Faaola ia sa Nifae: “Faauta, o A’u o Iesu Keriso, o le na molimau i ai perofeta o le a sau i le lalolagi. … O A’u o le malamalama ma le ola o le lalolagi.”¹⁷

Sa tauaao atu e Peresitene Nelson i le tupu lena kopi o le Tusi a Mamona, ma sa tali atu le tupu: “Sa ono mafai ona e foai maia ni taimane ma ni penina, ae e leai ma se mea e sili atu lona taua ia te a’u nai lo lenei malamalama faaopoopo e uiga i le Alii o Iesu Keriso.”¹⁸

E le na o le pau lena o se faataitaiga o le ala e faasoa atu ai e lo tatou perofeta pele le Tusi a Mamona. Ua ia tauaao atu kopi o le Tusi a Mamona i le faitau selau o tagata, ma tuuina atu e le aunoa lana molimau ia Iesu Keriso. Pe a feiloai Peresitene Nelson ma malo valaaulia, peresitene, tupu, ao o malo, taitai o pisinisi ma faalapotopotoga ma isi faatuatuaga eseese, pe fai i le laumua o le Ekalesia po o o latou lava nuu, na te tauaao atu lava ma le migao lenei tusi o mau paia ua faaalia. Semanu e mafai lava ona ia tuuina atu ni mea se tele e afifi ma faalipine e pei ona masani ai, ia e mafai ona tuu i luga o se laulau po o se kesi po o totonu o kapeneta e fai ma faamanatu o ana asiasiga. Nai lo lena, na te tuu atu le mea e sili ona pele ia te ia, e sili atu nai lo penina ma taimane, e pei ona sa faamatala e le tupu faaleituaiga.

“O upumoni o le Tusi a Mamona,” na saunoa ai Peresitene Nelson, “ua i ai le mana e faamalolo ai, faamafanafana, toefuatai, fesoasoani, faamalosia, faatoafimalie, ma faafiafia o tatou agaga.”¹⁹ Ua ou matauina a o uumau nei kopi o le Tusi a Mamona i lima o i latou e mauaina mai lo tatou perofeta a le Atua. E leai se isi meaalofa e sili atu.

Talu ai nei sa la feiloai ai ma le masiofo a le peresitene o le malo o le Au Gambia i lona ofisa ma sa tauaao atu ma le lotomaualalo se Tusi a Mamona. E le’i gata ai iina. Sa ia susueina ona itulau e faitau ai faatasi ma ia, e aoao atu ma molimau atu ai ia Iesu Keriso, o Lana Togiola, ma Lona alofa i fanau uma a le Atua—i nofoaga uma.

O loo faia e lo tatou perofeta soifua lana vaega e faalolovaia le lalolagi i le Tusi a Mamona.²⁰ Ae e le mafai ona tatalaina na o ia faitotoa e faalolovaia ai. E tatau ona tatou mulimuli i lana taitaiga.

O le musuia ai i lana faataitaiga, sa ou taumafai ai e faasoa atu ma le lotomaualalo ma le naunautai atili le Tusi a Mamona.

Talu ai nei, sa ou alu ai i se tofiga i Mozambique. O loo tauivi tagatanuu o lenei atunuu matagofie ma le mativa, leaga le soifua maloloina, leai ni galuega, o afā, ma faaletonu tau upufai. Sa faamamaluina au i le feiloai ai ma le peresitene o le atunuu, o Filipe Nyusi. I lana talosaga, sa ou tatalo ai mo ia ma lona malo, ma sa ou tau atu ia te ia o loo tatou fauina se malumalu o Iesu Keriso²¹ i lona atunuu. I le faaiuga o la ma feiloaiga, sa ou tuu atu ai ia te ia se kopi o le Tusi a Mamona i le faaPotukale, o lana gagana masani. A o ia taliaina ma le lotofaafetai le tusi, sa ou molimau atu e uiga i le faamoemoe ma folafolaga mo lona nuu, o loo maua i afioga a le Alii o loo i ona itulau.²²

I se isi taimi, na ma feiloai atu ai ma loʼu toalua o Melanie, i le Tupu o Letsie III o Lesoto ma lana masiofo i lo la maota.²³ Mo i maʼua, o le tumutumuga o le ma asiasiga o le tuuina atu lea ia i laʼua o se kopi o le Tusi a Mamona ona faasoa atu lea i ai o laʼu molimau. Pe a ou toe tepa i tua i lena aafiaga ma isi, e oo mai i loʼu mafaufau se fuaiupu o tusitusiga paia o aso e gata ai: “Ina ia mafai ona folafola atu le atoatoaga o laʼu talalelei i e vaivai ma e faatauvaa i tuluiga o le lalolagi, ma i luma o tupu ma pule.”²⁴

Na ou faasoa atua le Tusi a Mamona i le Amepasa o Inita i Malo Aufaatasi i Sineva, o Indra Pandey²⁵; ma Lana Afioga Paia Peteriaka Patolomaio²⁶ o le Ekalesia o Eastern Orthodox; ma i le tele o isi. Sa ou lagonaina le faatasi mai o le Agaga o le Alii ma i matou a o ou tuulima atu ia i laʼua lenei “maʼa ʼauʼau o la tatou tapuaiga”²⁷ ma tuuina atu laʼu molimau ia Iesu Keriso, le maatulimanu o lo tatou faatuatuaga.²⁸

O lenei, uso e ma tuafafine, tou te le tau o i Mozambique po o Initia e feiloai ai ma tupu ma taitai e avatu ai i se tasi lenei tusi o aoaoga ma folafolaga paia. Ou te valaaulia outou i le asō, e tuu atu se Tusi a Mamona i au uo ma aiga, o au uo mamae i le galuega, o lou faiaoga soka, po o le tamaloa o faatau fua o faatoaga i le tou maketi. Latou te manaomia afioga a le Alii o loo maua i lenei tusi. Latou te manaomia tali i fesili o le olaga i aso faisoo ma le ola e faavavau a sau. Latou te manaomia ona iloa le ala o feagaiga ua faataatia i o latou luma ma le alofa tumau o le Alii mo i latou. O loo i ai uma i le Tusi a Mamona.

Pe a e tuu atu ia i latou se Tusi a Mamona, ua e tatalaina o latou mafaufau ma loto i le afioga a le Atua. E le tau manaomia ona e feaveaʼia ni kopi lolomi o le tusi. E mafai ona faigofie ona e faasoa atu mai lau telefoni feaveaʼi mai le vaega o tusitusiga paia i le polokalama o le Gospel Library.²⁹

Mafaufau ia i latou uma e mafai ona faamanuiaina e ala i le talalelei i o latou olaga, ona auina atu lea ia i latou o se kopi o le Tusi a Mamona mai lau telefoni. Manatua ia faaaofia ai lau molimau ma le auala ua faamanuia ai e lenei tusi lou olaga.

Aʼu uo pele, i le avea ai o se Aposetolo a le Alii, ou te valaaulia outou e mulimuli i lo tatou perofeta pele, o Peresitene Nelson, i le faalolovaia o le lalolagi i le Tusi a Mamona. Ua matua tele naua le manaomia; ua manaomia lo tatou gaoioi nei loa. Ou te folafola atu o le a e auai i “le galuega aupito sili i le lalolagi,” o le faapotopotoina o Isaraelu,³⁰ a o musuia oe e aapa atu ia i latou o e ua “taofia mai le upumoni ona ua latou le iloa le mea e maua ai.”³¹ Latou te manaomia lau tautinoga ma le molimau pe na faapefea ona suia e lenei tusi lou olaga ma faalatalata atili ai oe i le Atua, Lona filemu,³² ma Ana “tala o le olioli tele.”³³

Ou te molimau atu e faapea e ala i le mamanu paia na saunia ai le Tusi a Mamona i Amerika anamua ia oo mai e folafola atu le afioga a le Atua, ia aumaia agaga i le Alii o Iesu Keriso ma Lana talalelei toefuatai “i le asō.” I le suafa o Iesu Keriso, amene.

Faamatalaga

1. Tagai i le Iakopo 2:2–3; Mosaea 2:14, 30; 5:7; Alema 7:15; ma le tele o isi mau i le Tusi a Mamona.

2. Mosaea 2:9.

3. Alema 53:20.

4. Aoaoga a Peresitene o le Ekalesia: Iosefa Samita (2007), 68. O le faamatalaga atoa na tuuina mai e Iosefa Samita i le aso 28 Novema, 1841, i le aufono a Aposetolo e Toasefululua: “Sa ou ta’u atu i le usoga o le Tusi a Mamona o le tusi e silisili ona sao i tusi uma o le lalolagi, ma o le maaauau o la tatou tapuaiga, ma e sili atu ona latalata le tagata i le Atua e ala i le usita’ia o ona mataupu, nai lo se isi lava tusi”. O le tusi faasino autu i le “saʼo” e mafai ona ave le faamalo i le faaaliga na maua i lona faaliliuga ma le aoaoga faavae autu o loo aoao mai i le Tusi a Mamona lea ua sili atu lona faavaeina nai lo se isi lava tusi o upumoni “manino ma le taua” o le talalelei (tagai i le 1 Nifae 13:40).

5. Tagai i le “O Le Keriso Soifua: O Le Molimau a Aposetolo,” o se tautinoga mai le Au Peresitene Sili ma le Korama a Aposetolo e Toasefululua, 1 Ianuari, 2000: “Matou te tuuina atu la matou molimau, o Ana Aposetolo ua faauuina—o Iesu o le Keriso Soifua, o le Alo tino ola pea o le Atua. O Ia o le Tupu silisili o Emanuelu, o loo tu i le taimi nei i le itu taumatau o Lona Tama. O Ia o le malamalama, o le ola, ma le faamoemoe o le lalolagi. O Lona ala o le auala e tau atu i le fiafia i lenei olaga ma le ola e faavavau i le lalolagi a sau. Ia faafetaia le Atua mo le meaalofa lē mafaatusalia o Lona Alo paia lea” (ChurchofJesusChrist.org).

6. Tagai Isaia 49:26; 1 Nifae 21:26; 22:12; Mataupu Faavae ma Feagaiga 66:1.

7. E maua le afioga a le Atua i totonu o tusitusiga paia. Mo se faataitaiga, i le Tusi a Mamona, na fesili ia Lamana ma Lemuelu, “O le a le uiga o le ai uʼamea?” e faasino i le miti a Liae. Na tali atu Nifae, “O le afioga lea a le Atua; o i latou uma o e faalogo foi i le afioga a le Atua, ma taofi mau i ai, e le fano i latou e faavavau; e le mafai foi e tofotofoga ma u fanafana mu a le ita mai ona manumalo ia te i latou e oo i le tauaso, e taitaiese ai i latou i le malaia” (1 Nifae 15:23–24).

8. Tagai i le “Le Toefuata’iga o le Atoatoaga o le Talalelei a Iesu Keriso: O Se Folafolaga o le Faamanatuina o le Lua Seneturi i le Lalolagi,” lea e aofia ai mea nei: “Matou te tautino atu o Le Ekalesia a Iesu Keriso o le Au Paia o Aso e Gata Ai, na faatulagaina i le aso 6 o Aperila, 1830, o le Ekalesia a Iesu Keriso i le Feagaiga Fou ua toefuatai mai. O lenei Ekalesia ua taula i le soifuaga ato’atoa o lona ma’a tulimanu, o Iesu Keriso, ma i Lana Togiola lē i’u ma le Toetu moni. Ua toe vala’auina e Iesu Keriso ia Aposetolo ma tu’u atu ia i latou le pule o le perisitua. Ua Ia vala’aulia i tatou uma ia ō mai ia te Ia ma Lana Ekalesia, ia maua le Agaga Pa’ia, o sauniga o le faaolataga, ma ia maua le olioli tumau. … Matou te ta’utino atu ma le fiafia e aga’i pea i luma le Toefuata’iga folafolaina e ala i faaaliga faifai pea. O le a lē toe tutusa lava le lalolagi, auā o le a ‘faapotopoto faatasi [e le Atua] mea uma ia tasi ia Keriso’ (Efeso 1:10)” (ChurchofJesusChrist.org).

9. 2 Nifae 4:16.

10. Tagai ia Quentin L. Cook, “Be Not Weary in Well-Doing” Brigham Young University devotional, Aug. 24, 2020), speeches.byu.edu; Eliza Smith-Driggs, “This Week on Social: How to Develop a Love for the Lord, Yourself and Others,” Church News, July 17, 2020, thechurchnews.com.

11. Faitauga lona tolu, samasama: lalolagi i le tino mai po o le taatiaga faalefaafanua; lona fa o faitauga, uliuli: talatalaga o le Tusi a Mamona.

12. “O Se Tasi Molimau ia Iesu Keriso” na faaopoopo e avea ma soaulutala i lomiga uma o le Tusi a Mamona. Na faia e taitai o le Ekalesia le suiga o le igoa ina ia saga faamamafa atili ai le faamoemoega o le tusi e pei ona ta’ua i le itulau faaulutala: “Ma faatalitonu ai foi Iutaia ma Nuuese o Iesu o le Keriso, le Atua faavavau, e faaalia o ia lava i atunuu uma.”

13. O le avea ai ma se soo o Iesu Keriso o se faailoaga lea o lo tatou alofa mo Ia. Ua papatisoina soo; latou te tauaveina i o latou luga le suafa o Iesu Keriso; latou te taumafai e mulimuli ia te Ia e ala i le taliaina o Ona uiga faaleatua e pei ona faamatala e le Aposetolo o Peteru: “Ia outou matua faamalosi ai lava, ina ia faaopoopoina le amio lelei i lo outou faatuatua; ia faaopoopo foi le poto i le amio lelei; ia faaopoopo foi le le gaoia i le poto; ma ia faaopoopo le onosai i le le gaoia; o le amio Atua foi i le onosai; ia faaopoopo foi le alofa i le au uso i le amio Atua; o le alofa foi i le alofa i le au uso” (2 Peteru 1:5–7; tagai foi i le Tala’i La’u Talalelei: O Se Taiala o le Galuega Faafaifeautalai [2019], 121–32).

14. O Peresitene Russell M. Nelson, o se fomai tipitipi lauiloa o le fatu ao lei vaalauina i le Korama a Aposetolo e Toasefululua i le 1984, sa ia tuuina atu se folasaga i le aoga faafomai i Accra, Kana, i le 1986 e uiga i le talafaasolopito o le taotoga o le fatu. Na faatalanoa mulimuli ane e le aufaasalalau, sa ia faamatala ai sa i ai o ia iina “o se auauna a le Alii e fesoasoani [i tagata] ia avea ma tagatanuu silli atu, e fausia aiga malolosi, ia maua le fiafia moni ma ia manuia i le laueleele.” Sa toe foi o ia i Accra, Kana, i le aso 16 Novema, 2001, mo le suatiaina o le eleele mo le Malumalu o Accra Kana (tagai “Ground Broken for First Temple in West Africa,” Church News, Nov. 24, 2001, thechurchnews.com).

15. Tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 5.1.1.1: “I o tatou taimi, e valaauina e le Alii ni tamalii e ala mai i le Peresitene o le Ekalesia e faauuina o Aposetolo ma ia auauna atu i le Korama a Aposetolo e Toasefululua (tagai i le Mataupu Faavae ma Feagaiga 18:26–28)” (ChurchofJesusChrist.org).

16. Tagai ia Russell M. Nelson, “O Le Tusi a Mamona: Faamata e Faape’i Lou Olaga e aunoa ma Ia?,” Liahona, Nov. 2017, 60.

17. 3 Nifae 11:10–11.

18. Russell M. Nelson, “O Le Tusi a Mamona: Faamata e Faape’i Lou Olaga e aunoa ma Ia?,” 61.

19. Russell M. Nelson, “O Le Tusi a Mamona: Faamata e Faape’i Lou Olaga e aunoa ma Ia?,” 62.

20. Tagai i le Mose 7:62.

21. Na fofogaina mai le Malumalu o Beira Mozambique i le aso 4 Aperila, 2021, e Peresitene Russell M. Nelson. E silia ma le afa miliona tagata e nonofo i Beira, lea e taoto i le talafatai o le Sami Initia.

22. Faataitaiga o le faamoemoe ma folafolaga i le Tusi a Mamona e aofia ai le 2 Nifae 31:20; Iakopo 4:4–6; Alema 13:28–29; 22:16; 34:41; Eteru 12:32; Moronae 7:41; 8:26.

23. Na feiloai Elder ma Sister Rasband ma le aigatupu i le aso 10 Fepuari, 2020, ina ua malaga i se tofiga i Aferika e faapaia le Malumalu o Durban Aferika i Saute.

24. Mataupu Faavae ma Feagaiga 1:23.

25. Sa feiloai Elder Rasband ma le Amepasa o Indra Mani Pandey, Sui Mautu o Initia i Malo Aufaatasi ma Isi Faalapotopotoga Faavaomalo i Sineva, a o i ai i se tofiga i le Fonotaga o Faatuatuaga Eseese i Bologna, Italia, i le aso 17 Setema, 2021.

26. Sa feiloai Elder Rasband ma Lana Afioga Paia o le Sui Peteriaka Patolomaia o le Ekalesia Eastern Orthodox, a o i ai i se tofiga i le Fonotaga a Faatuatuga Eseese i Bologna, Italia, i le aso 13 Setema, 2021.

27. Aoaoga: Iosefa Samita, 64. O se maaauau o se maa faaofuofu i le pito i luga o se faitotoa faaofuofu, na te lokaina faatasi isi maa. Na faamatala e le Perofeta o Iosefa Samita o le Tusi a Mamona “o le maa‘au‘au lea o la tatou tapuaiga” ona o lona taua i le tuufaatasia o le Ekalesia e ala i mataupu faavae ma sauniga. Ua avea le Tusi a Mamona o se “maa‘au‘au” mo olaga o tagata o le ekalesia, e fesoasoani ai ia latou tutumau mausali i luga o le ala o feagaiga.

28. Tagai i le Efeso 2:19–20. O Iesu Keriso o le maatulimanu autu o la tatou Ekalesia, lea o loo tauaveina Lona suafa. E faapei lava ona faafaatusa le tuuina o se maatulimanu i le malumalu i le maa autu e fatu ai le tulimanu o le faavae o le maota o le Atua, o Iesu Keriso foi o le maatulimanu o lo tatou faatuatuaga ma lo tatou faaolataga. Na Ia ofoina mai Lona soifua ina ia mafai ona tatou ola; e leai se tasi e tutusa ma Ia i le malosi, i le faamoemoega, po o le alofa.

29. E mafai ona e faasoa atu mai lau telefoni feaveai. O se tasi ala o le tatala lea o le polokalama o le Gospel Library, alu i le aofaga o “Scriptures,” ona ta la‘ia lea o le “Faasoa Loa” i le pito i luga. Pe i totonu o le polokalama o le Tusi a Mamona, e mafai ona e ta le aikona “Share”, lea e faaali mai ai faailo faatekinolosi lea e faigofie i se uo ona faasolo ma faaaoga ai lana telefoni.

30. Russell M. Nelson, “Faamoemoe o Isaraelu” (faigalotu a le autalavou i le lalolagi atoa, 3 Iuni, 2018), HopeofIsrael.ChurchofJesusChrist.org. “I le aso 3 o Iuni, 2018, sa valaaulia ai e Peresitene Russell M. Nelson ma lona faletua o Wendy W. Nelson, le autalavou e ‘lesitala i le ‘autau talavou a le Alii’ ma fai so latou sao i ‘le lu’i aupito sili, le faamoemoe silisili, ma le galuega silisili i le lalolagi.’ Ma o le a le lu‘i silisili? O le faapotopotoina o Isaraelu” (Charlotte Larcabal, “A Call to Enlist and Gather Israel,” New Era, Mar. 2019, 24).

31. Mataupu Faavae ma Feagaiga 123:12.

32. Tagai i le 2 Nifae 4:27; Mosaea 4:3; 15:18; Alema 46:12.

33. 1 Nifae 13:37.