Mulimuli ia Iesu Keriso i Tulagaaao o le Faatuatua
E mafai ona tauaveina e Keriso i tatou i le asō e oo i taimi faigata. Na Ia faia mo uluai paionia, ma Na Te faia foi i le taimi nei mo i tatou taitoatasi.
Faafetai, i le aufaipese, mo le lagiina o le “Faatuatua i Tulagaaao Uma.” O le musika ma upu o lena pese na tusia i le 1996 e Brother Newell Dayley1 i tapenaga mo le faamanatuina o le 150 tausaga o le taunuu mai o uluai paionia i le Vanu o Sate Leki i le 1847.
E ui ina sa tusia lenei pese e tapenapena ai mo lena sauniga faamanatu; ae o lana fe’au e faatatau i le lalolagi atoa.
Ou te fiafia lava pea i le tali:
Ma le faatuatua i la’a uma, tatou te mulimuli ia Keriso, le Alii;
Ma faatumulia i le faamoemoe e ala i lona alofa mama, tatou te pepese ai ma le faamoemoe e tasi.2
Uso e ma tuafafine, ou te molimau atu a tatou mulimuli ia Iesu Keriso ma tulagaaao o le faatuatua, e i ai le faamoemoe. E i ai le faamoemoe i le Alii o Iesu Keriso. E i ai le faamoemoe mo tagata uma i lenei olaga. E i ai le faamoemoe e faatoilalo ai mea sese, o o tatou faanoanoaga ma tauiviga, ma o tatou tofotofoga ma fitaituga. E i ai le faamoemoe i le salamo ma le faamagaloina ma i le faamagalo atu o isi. Ou te molimau atu e i ai le faamoemoe ma le filemu ia Keriso. E mafai ona Ia tauaveina i tatou i le asō e oo i taimi faigata. Na Ia faia mo uluai paionia, ma Na Te faia foi i le taimi nei mo i tatou taitoatasi.
O le tausaga lenei e faailoga ai le 175 tausaga o le taunuu mai o uluai paionia i le Vanu o Sate Leki, lea sa afua ai ona ou tomanatu i o’u augatama, o nisi o i latou sa savavali mai Navu i le Vanu o Sate Leki. E i ai matua matutua o o’u matua sa savalia laufanua valevalenoa i lo latou talavou. O Henry Ballard sa 20 ona tausaga;3 o Margaret McNeil sa 13;4 ma Iosefa F. Samita, o lē na avea mulimuli ane ma Peresitene lona ono o le Ekalesia, sa na o le 9 ona tausaga ina ua ia taunuu i le Vanu o Sate Leki.5
Sa feagai i latou ma pu’eomala o ituaiga uma i le ala, e pei o taumalulu ma’ati’ati, o ma’i, ma le le lava o meaai ma lavalava. Mo se faataitaiga, ina ua ulufale Henry Ballard i le Vanu o Sate Leki, sa fiafia o ia i le vaai atu i le “Nuu o le Folafolaga” ae sa nofo ma le fefe ne’i vaai atu se tasi ia te ia ona o ofu sa ia ofuina ua masaesae ma sa le ufiufia ai lona tino. Sa lafi o ia i tua o pupuvao i le aso atoa seia oo ina pogisa. Ona ia alu lea i se fale ma aioi atu mo ni lavalava ina ia mafai ai ona faaauau lana malaga ma saili ona matua. Sa ia faafetai i le Atua ona ua taunuu i lona aiga i le lumanai ma le saogalemu.6
Sa mulimuli matua o o’u matua matutua ia Iesu Keriso ma tulagaaao o le faatuatua i o latou tofotofoga taitasi. Ou te faafetai lava i lo latou le fiu gofie. O o latou tulagaaao o le faatuatua ua faamanuiaina ai a’u ma isi tupulaga mulimuli mai, e pei foi o o outou tulagaaao o le faatuatua i le asō o le a manuia ai a outou fanau.
O le upu paionia o se nauna ma o se veape foi. I le avea ai o se nauna e mafai ona faauigaina o se tagata o lē na muai maua pe nofoia se laueleele fou. O le avea o se veape e mafai ona faauigaina e tatala pe tapena le ala mo isi e mulimuli ai.7
A ou mafaufau i paionia o ē na saunia le ala mo isi, e muamua lava o’u mafaufau i le Perofeta o Iosefa Samita. O Iosefa o se paionia aua o ona tulagaaao o le faatuatua na taitai ai o ia i se vao o laau lea na ia tootuli ai e tatalo ma sa tatalaina ai le ala mo i tatou e maua ai le atoaga o le talalelei a Iesu Keriso. O le faatuatua o Iosefa e “fesili i le Atua”8 i lena taeao o le tautotogo i le 1820, na tatala ai le ala mo le Toefuataiga o le atoaga o le talalelei a Iesu Keriso lea na aofia ai perofeta ma aposetolo sa valaauina e toe galulue i le fogaeleele.9 Ou te iloa o Iosefa Samita o se perofeta a le Atua. Ou te iloa o ona tulagaaao e tumu i le faatuatua na taitai ai o ia e tootuli i luma o le Atua le Tama ma Lona Alo Pele, o Iesu Keriso.
O tulagaaao o le Perofeta o Iosefa Samita na mafai ai e ia ona avea ma meafaigaluega a le Alii i le aumaia o le Tusi a Mamona, o se isi lea molimau ia Iesu Keriso ma Lona alofa tunoa togiola.
E ala atu i le faatuatua o Iosefa Samita ma le faapalepale i le fesaga’i ai ma faigata ma tetee ogaoga, na mafai ai ona avea o ia o se meafaigaluega i aao o le Alii i le toe faatuina o le Ekalesia a Iesu Keriso i le lalolagi.
I le taimi o le konafesi aoao talu ai, sa ou talanoa ai e uiga i le ala na faamanuiaina ai a’u i le avea ai ma faifeautalai faamisiona. Sa faamanuiaina au a o ou aoao atu e uiga i le fuafuaga mamalu a lo tatou Tama Faalelagi, le Uluai Faaaliga Vaaia a Iosefa Samita, ma lona faaliliuga o le Tusi a Mamona. O nei aoaoga ma aoaoga faavae ua toefuatai mai na taialaina ai o’u tulagavae o le faatuatua i le aoaoina o i latou o e sa loto e faalogologo i le savali o le Toefuataiga o le talalelei.
O o tatou faifeautalai i ona po nei, o paionia ia o aso nei aua ua latou faasoa atu lenei savali mamalu i tagata i le salafa o le lalolagi, ma tatalaina ai le ala mo fanau a lo tatou Tama Faalelagi ia iloa o Ia ma Lona Alo, o Iesu Keriso. O le taliaina o le talalelei a Iesu Keriso e tatalaina ai le ala mo tagata uma e sauniuni ai ma mo le mauaina o sauniga ma faamanuiaga o le Ekalesia ma le malumalu.
O le konafesi talu ai, na toefaamautu mai ai e Peresitene Russell M. Nelson, “ua poloaiina e le Alii ia alii talavou uma e agavaa, ma malolosi e sauniuni mo, ma auauna atu i se misiona” ma o “se misiona foi o se avanoa mamana, ae e tuu i le faitalia,” mo tuafafine talavou ma malolosi.”10
Alii talavou e ma tamaitai talavou pele, o o outou tulagaaao o le faatuatua o le a fesoasoani ia te outou e mulimuli ai i le valaaulia a le Alii e auauna atu i misiona---ia avea o paionia o ona po nei---e ala i le tatalaina o le ala mo fanau a le Atua ia maua ma tumau ai i luga o le ala o feagaiga e toe tau atu ai i Lona afioaga mamalu.
O Peresitene Nelson o se paionia i le Ekalesia. O le avea ai o se Aposetolo ua ia malaga ai ma tatala le tele o laueleele mo le talaiina atu o le talalelei. A o lei leva ona avea ma perofeta ma Peresitene o le Ekalesia, sa ia augani mai ia i tatou ina ia “faateleina [lo tatou] gafatia faaleagaga e maua ai faaaliga.”11 O loo faaauau pea ona ia aoao mai i tatou i le ala e faamalolosia ai a tatou molimau. I se faigalotu mo talavou matutua, na ia saunoa ai:
“Ou te augani atu ia te outou ia pulea lau molimau. Galue i ai. Umia. Tausi i ai. Faafailele ina ia tuputupu ae. …
“[Ona] matau lea o vavega o le a tutupu i lou olaga.”12
O loo ia aoao mai i tatou ina ia ola tutoatasi atili faaleagaga. Na ia saunoa, “i aso a sau, o le a le mafai ona tatou ola faaleagaga e aunoa ma le taiala, taitaiga, faamafanafanaga, ma le faatosinaga faifaipea a le Agaga Paia.”13
Ou te iloa o Peresitene Russell M. Nelson o le perofeta a le Atua i le lalolagi i aso nei.
O lo tatou Faaola, o Iesu Keriso, o le uluai paionia lea ua saunia le ala. E moni lava, o Ia o ”le ala”14 ina ia faataunuu ai le ata o le faaolataga ina ia mafai ai ona tatou salamo ma, e ala i le faatuatua ia te Ia, e toe foi atu ai i lo tatou Tama Faalelagi.
Na fetalai Iesu, “O A’u nei le ala, ma le upu moni, ma le ola: e le alu atu lava se tasi i le Tama, pe a le ui mai ia te au.”15 Ua Ia folafolaina mai e le tuulafoaiina lava i tatou o matuaoti; o le a sau o Ia ia i tatou i o tatou tofotofoga.16 Ua Ia valaauliaina i tatou e “o mai ia te [Ia] ma le faamoemoe atoa o le loto, ma o le a [Ia] faamaloloina [i tatou].”17
Ou te molimau atu o Iesu Keriso o lo tatou Faaola ma le Togiola, o lo tatou Fautua i le Tama. Ua tatalaina e lo tatou Tama Faalelagi le ala mo i tatou e toe foi atu ai ia te Ia e ala i le mulimuli i Lona Alo Pele, o Iesu Keriso, faatasi ai ma le faatuatua i tulagaaao uma.
O o’u matua matutua ma isi uluai paionia na feagai ma le mau to’atuga a o latou o mai i taavale solofanua, taavale tosolima, ma savavali mai i le Vanu o Sate Leki. O le a tatou feagai foi ma luitau i a tatou malaga taitoatasi i o tatou olaga. Tatou te le o tuleia ni taavale tosolima pe aveina ni taavale solofanua i luga o mauga tifato ma kiona magotogoto; ae o loo tatou taumafai e faapei ona sa latou faia, e faatoilalo faaleagaga ia tofotofoga ma luitau o o tatou taimi. E i ai alasopo tatou savalia, e i ai maupuepue—ma o nisi foi taimi o atumauga—e a’ea. E ui ina ese tofotofoga o aso nei nai lo mea na feagai ma uluai paionia, ae e le ese ai le lu’itauina mo i tatou.
E taua le mulimuli i le perofeta ma ia tutu mausali o tatou vae i le ala o feagaiga o le faamaoni e faapei ona i ai uluai paionia.
Ia tatou mulimuli ia Iesu Keriso ma le faatuatua i tulagaaao uma. E manaomia ona tatou auauna atu i le Alii ma feauaunaa’i le tasi ma le isi. E manaomia ona tatou faamalolosia i tatou lava e ala i le tausia ma faamamalu a tatou feagaiga. E le tatau ona aluese ma i tatou le lagona faanatinati o le tausia o poloaiga. E taumafai Satani e faavaivaia a tatou tautinoga ma lo tatou alolofa mo le Atua ma le Alii o Iesu Keriso. Faamolemole ia manatua afai e i ai se tasi e leiloa lo latou ala, o le a le leiloa lava i tatou i lo tatou Faaola. Faatasi ai ma le faamanuiaga o le salamo, e mafai ona tatou liliu atu ia te Ia. O le a fesoasoani o Ia ia tatou aoao, tuputupu ae, ma suia a o tatou taumafai e tumau i luga o le ala o feagaiga.
Ina tatou mulimuli ia i tulagaaao o Iesu Keriso ma, faatasi ai ma lo tatou faatuatua i o tatou tulagaaao uma, taulai ia te Ia, faatutu mausali o tatou vae i luga o le ala o feagaiga, o la’u tatalo faamaualalo lea i le suafa o Iesu Keriso, amene.