[Avea ma] Soo Tumau
E mafai ona tatou maua le talitonuga ma le filemu faaleagaga a o tatou faafaileleina mausa paia ma faiga masani amiotonu ia e mafai ona lagolagoina ma tutu ai afi o lo tatou faatuatua.
I le taumafanafana na te’a nei, e silia i le 200,000 o tatou tagata talavou i le lalolagi atoa sa tuputupu a’e i le faatuatua i se tasi o tauaofiaga e faitau selau e tasi le vaiaso le umi o le Mo le Malosi o le Autalavou, po o konafesi a le MMA. O le o ese mai le faanofoesea i le faama’i, mo le toatele, sa o se faatinoga o le faatuatua i le Alii le auai ai. O le toatele o tagata auai talavou e foliga mai ua mulimuli i se faaofuofu agai i luga lea e agai atu i se liuaina loloto. I le faaiuga o le latou vaiaso, ou te fia fesili atu ai, “Na a mai?”
O ni isi o taimi latou te fai mai se mea faapenei: “Ia, o le aso Gafua, sa matuai ou le fiafia lava i lo’u tina ona sa ia faamalosia a’u ou te sau. Ma ou te le’i iloa se tasi. Ma ou te le’i mafaufauina sa mo a’u lea mea. Ma o le a leai ni a’u uo. … Ae o le Aso Faraile nei, ma ou te fia nofo iinei. Ou te fia lagonaina le Agaga i lo’u olaga. Ou te fia ola faapenei.”
Ua tofu i latou ma le tala e faamatala i taimi o le manino ma i meaalofa faaleagaga na tafe ifo ia i latou ma momoli atu ai i latou agai i le faaofuofu o le tuputupu a’e. Sa suia foi a’u i lenei taumafanafana o le MMA ao ou vaaia le Agaga o le Alii o tali mai ma le lē muta i manaoga amiotonu o loto taitoatasi o nei anoano o talavou o e na taitasi ma maua le lototele e faalagolago ai ia te Ia ma se vaiaso o Lana tausiga.
E pei o vaa tino uamea iila i le sami, ua tatou ola i se siosiomaga leaga ma matautia faaleagaga lea e ao ai ona tausisia ma le magafagafa lelei ia tautinoga aupito feilafi a le o lea, o le a mafai ona maosiosia, sosoo ai ma le pala, ma toulu ese atu.
O A Ituaiga o Mea e Mafai ona Tatou Faia e Tausisia ai le Musaesae o o Tatou Tautinoga?
O aafiaga e pei o konafesi a le MMA, tolauapiga, sauniga faamanatuga, ma misiona e mafai ona fesoasoani e faamalosia a tatou molimau, ave atu i tatou i faaofuofu o le tuputupu a’e ma le iloa faaleaaga o nofoaga o le filemu. Ae o a mea e ao ona tatou faia e tumau ai iina ma faaauau ai ona “fetaomi atu i luma ma le tumau ia Keriso” (2 Nifae 31:20) nai lo le see i tua? E ao ona faaauau ona tatou faia o na mea na aumaia iina i le taimi muamua, e pei o le tatalo e le aunoa, faatofu i tatou lava i tusitusiga paia, ma auauna atu ma le faamaoni.
Mo ni isi o i tatou, e ono manaomia ai se faatinoga o le faalagolago i le Alii e oo lava i le auai i le sauniga faamanatuga. Ae o le taimi lava e i ai iina, o le faatosinaga faamalolo o le faamanatuga a le Alii, o le tuuina mai o mataupu faavae o le talalelei, ma le faafailelega a tagata o le Ekalesia e mafai ona tatou foi atu ai i le fale i se tulaga maualuga.
E Mai Fea Le Mana o le Faapotopoto Faatasi o Tagata?
I le MMA, e lua selau afe ma le sili atu a tatou talavou na iu ina iloa lelei le Faaola e ala i le faaaogaaga o se fua faigofie o le o mai faatasi lea na faapotopoto ai le toalua pe sili atu o i latou i Lona suafa (tagai i le Mataio 18:20), e aafia i le talalelei ma tusitusiga paia, pepese faatasi, tatalo faatasi, ma le mauaina o le filemu ia Keriso. O se faamatalaga mamana lenei mo le fagua faaleagaga.
O lenei vaega toatele o uso ma tuafafine ua o atu nei i le fale e filimaoti ai le uiga o le “faatuatua [pea] ia Ieova” (Faataoto 3:5; pe a tafia i le tele o faatosinaga le mataofiofia a le lalolagi. E ui i se tasi o itu o le “faalogo ia te Ia” (Iosefa Samita—Talafaasolopito 1:17) i se nofoaga filemu e manatunatu ai faatasi ma tusitusiga paia o loo matala ai. Ae fai foi si ese o le faaalia o lo tatou avea ma soo pe a siomia i faalavefau a le lalolagi lea e ao ai ona tatou taumafai e “faalogo ia te Ia” e ui lava i le nenefu o le atugalu o le tagata lava ia ma le le mautonu o le loto. Ia aua nei i ai se masalosalo: o aga ma uiga o le au totoa na faaalia e o tatou talavou ina ua tuu atu o latou loto ma mafaufau e tutu mausali e faasaga i amioga fesuisuiai o o tatou taimi.
O Le A Se Mea E Mafai Ona Faia E Aiga I Le Fale E Atiinae A’e Ai Le Malosiaga Lea Na Fatufatuina I Gaoioiga A Le Ekalesia?
Sa i ai se taimi sa ou auauna ai o se tane i le peresitene o Tamaitai Talavou a le siteki. I se tasi po, sa ou galue ai e faatulaga kuki i totonu o le auala savali ao taitai e lo’u toalua se faeasaite i le falelotu mo matua ma o latou tama teine na sauniuni e auai i le tolauapiga a Tamaitai Talavou i le vaiaso na sosoo ai. Ina ua uma ona faamalamalama i ai le nofoaga e tatau ona i ai ma mea e tatau ona aumai, sa ia faapea atu, “Ia, o le taeao o le Aso Lua, pe a momoli mai nai o outou tama teine lelei i le pasi, ia e fusi mau ia i latou. Ma e sogi faatofa atu i ai—aua e le toe foi mai i latou.”
Sa ou faalogoina se tagata o mapuea, ona ou iloa ai lea o a’u. “E le toe foi mai?”
Peitai sa faaauau lana tala: “A momoli mai na tamaitai o le taeao o le Aso Lua, o le a latou tuua mea faalavefau o mea faaletāua ma faaalu faatasi se vaiaso e aoao ai ma tuputupu a’e ma faatuatua i le Alii. O le a matou tatalo faatasi ma pepese ma kuka ma auauna faatasi ma faasoa faatasi molimau ma fai mea e mafai ona matou lagona ai le Agaga o le Tama Faalelagi, i le vaiaso atoa, seia oo ina gotouga ifo i o latou ponaivi. Ma i le Aso Toonai, o na tamaitai tou te vaai i ai e feosofi ese atu mai lena pasi, o le a le o tamaitai ia na outou momoli maia i le Aso Lua. O le a avea i latou o ni tagata fou. Ma afai tou te fesoasoani ia latou faaauau pea mai lena tulaga maualuga atu, o le a latou faaofoina outou. O le a faaauau pea ona latou suia ma tuputupu a’e. Ma o le a faapena foi lou aiga.”
I lena Aso Toonai, o le mea tonu lava lena e pei ona sa ia valoia. A o ou utaina faleie, sa ou faalogoina le leo o lo’u toalua i totonu o le tamai fale faafiafia laupapa lea sa faapotopoto ai teine ao lei toe foi atu i le fale. Sa ou faalogo atu o ia fai mai, “Oi, a lae. Sa matou vaavaai mo outou i le vaiaso atoa. A matou teine o le Aso Toonai.”
O loo malaga le autalavou totoa o Siona i taimi mataina. O le mauaina o le olioli i lenei lalolagi ma mea faasalavei na valoiaina e aunoa ma le avea o se vaega o lena lalolagi, ma lona vaega faapogisaina agai i le paia, o le latou tiutetauave fitoitonu lena. Na saunoa G. K. Chesterton e pei lava sa ia vaaia i lenei tausinioga o le faatotonugalemu i le aiga ma lagolagoina e le Ekalesia ina ua ia faapea mai, “E tatau ona tatou manatu i le lalolagi e faapei o se maota o se sauai, ia soliina, ae i lo tatou lava afolau, lea tatou te toe foi i ai i le afiafi” (Orthodoxy [1909], 130).
O le mea e faafetai ai, latou te le o atu na’o i latou. O loo i ai le tasi ma le isi. Ma o loo ia i latou foi outou. Ma latou te mulimuli i se perofeta soifua, o Peresitene Russell M. Nelson, o lē o loo taitaia ma le silafia o se tagata vaai o le a lelei mea uma i le folafola atu o le taumafaiga silisili o nei taimi—o le faapotopotoina o Isaraelu—o le a maoae ma mamalu (tagai “Faamoemoe o Isaraelu” [faigalotu i le lalolagi atoa mo le autalavou, 3 Iuni, 2018], HopeofIsrael.ChurchofJesusChrist.org).
I le taumafanafana lenei, sa sui ai a ma vaalele ma lo’u toalua o Kalleen, i Amsterdam, lea, i le tele o tausaga na muamua atu, sa avea ai a’u o se faifeautalai fou. I le mavae ai o masina e tele o tauivi ma le aoaoina o le faaTake, sa tulaueleele le matou faigamalaga KLM, ma sa fai mai e le kapeteni se faasilasilaga faalemalamalama lelei i le masini faaleotele leo. Ina ua mavae sina taimi o le sāō, sa memumemu mai la’u soa “Pei lava o le faaTake le la.” Sa ma tau fai ea a’e, faitau manatu o le tasi ma le isi: Na matuai leai se mea na iloa.
Ae sa lē matuai leai se mea na iloa. A o ou maofa i laa o le faatuatua sa ma faia a o ma savavali ai i lenei malaevaalele e agai atu i vavega o le a masaa mai i o maua luga o ni faifeautalai, sa faafuasei ona toe faafoi a’u i le taimi nei e ala i se faifeautalai soifua ma ola, o le sa ulu atu i le vaalele e alu ai i le fale. Sa ia faailoa mai o ia lava ma fesili mai, “Peresitene Lund, o le a se mea ou te faia i le taimi nei? O le a se mea ou te faia ia tumau ai le malosi?”
O le fesili lava foi lenei o loo i mafaufau o o tatou talavou pe a latou tuua konafesi o le MMA, tolauapiga a le autalavou, malaga i le malumalu, ma soo se taimi latou te lagona ai mana o le lagi: “E mafai faapefea e le alofa i le Atua ona liua i le avea ma soo tumau?”
Sa ou lagonaina se alofa faateleina mo lenei faifeautalai o loo auauna atu i itula faaiu o lana misiona, ma i lena sāō puupuu o le Agaga na ou lagonaina ai lo’u leo ootia a o ou faapea atu, “E te tau le faia le pine e tauave ai Lona suafa.”
Sa ou manao e tuu atu o’u lima i luga o ona tauau ma fai atu, “O le mea lenei e te faia. Ia e alu i le fale ma tau lava ia e faapenei. E ese lou lelei ua toetoe lava a e susulu i le pogisa. O lou lotopulea i le misiona ma osigataulaga ua avea ai oe o se atalii maoae o le Atua. Ia faaauau ona fai i le fale mea na mamana le aoga mo oe iinei. Ua e aoaoina e tatalo ma o ai e tatalo i ai ma le gagana o le tatalo. Ua e aoaoina Lana afioga ma alofa i le Faaola e ala i le taumafai e faapei o Ia. Ua e alofa i le Tama Faalelagi e pei ona Ia alofa i le Tama Faalelagi, auauna atu i isi e pei ona Ia auauna atu i isi, ma ola i poloaiga e pei ona sa Ia soifua ai—ma i taimi e te lei ola ai, ua e salamo ai. O lou avea ma soo ua le na o se faaupuga i luga o se mitiafu—ua avea ma ou olaga na ola mausali mo isi. O lea la, alu i le fale ma fai o lena. Ia faapena. Tauave lenei malosiaga faaleagaga i aso uma o totoe o lou olaga.”
Ua ou iloa e ala i le faatuatua i le Alii o Iesu Keriso ma Lana ala o le feagaiga, e mafai ai ona tatou maua le lototele faaleagaga ma le filemu ao tatou faafaileleina ni mausa paia ma amioga amiotonu e mafai ona lagolago ma tutu ai afi o o tatou faatuatua. Talosia ia taitoatasi i tatou ma faalatalata atili atu i na afi mafanafana ma, po o a lava mea e tutupu, ia tumau. I le suafa o Iesu Keriso, amene.