Ma Le Loto Atoa
E tatau ona avea i tatou ma soo o Iesu o e fiafia ma loto atoa i la tatou lava malaga patino o le avea ma soo.
O nisi taimi, e fesoasoani le iloa o le mea o faamoemoeina.
Ina ua lata i le faaiuga o Lana galuega, sa ta’u atu e Iesu i Ana Aposetolo o le a oo mai taimi faigata. Ae sa Ia fetalai atu foi, “Ia outou, ne’i outou atuatuvale.”1 Ioe, o le a tuua e Ia, ae o le a Ia le tuulafoa’ia lava i latou.2 O le a Ia auina mai Lona Agaga e fesoasoani ia latou manatua, ia latou tutu mausali, ma ia maua le filemu. Ua faataunuu e le Faaola Ana folafolaga e mafuta ma i tatou, Ona soo, ae e tatau ona faaauau pea lo tatou vaavaai atu ia te Ia e fesoasoani mai ia tatou iloa ma olioli i Lona afioaga.
Sa fetaiai e le aunoa soo o Keriso ma taimi faigata.
Sa auina mai e sa’u uo mamae se tusiga tuai mai le Nebraska Advertiser, o se nusipepa a Sisifo tutotonu o le Iunaite Setete, na tusia i le aso 9 o Iulai, 1857. E faitauina: “I le taeao nei, sa pasi ane ai se vaega o paionia Mamona i la latou malaga i Sate Leki. O tamaitai (e le maaleale tele ina ia mautinoa) o loo toso mai taavale tosolima e pei o manu, o se tasi [tamaitai] na palasi ifo i lalo i lenei palapala uliuli lea na mafua ai sina taofi i le solo, sa savavali mai ai tamaiti i o latou ofu [uiga ese] e foliga mai e pei o o latou tina.”3
Sa tele ina ou mafaufau i lenei fafine sa susupala i le palapala. Aisea sa tautoso ai na o ia? Pe o ia o se tina nofofua? O le a se mea na avatua ia te ia le malosiaga i totonu, le lototele, le pulunaunau e faia se malaga ogaoga faapea i le palapala, tautoso uma ana meatotino i se taavaletosolima i se fale i le toafa e le mailoa—i taimi na tauemuina ai e le au matau?4
Sa saunoa Peresitene Iosefa F Samita e uiga i le malosiaga i totonu o nei fafine paionia ma faapea mai: “Faamata ea e mafai ona e teena ese se tasi o nei tamaitai mai o latou talitonuga i le Ekalesia a Iesu Keriso o le Au Paia o Aso e Gata Ai? Pe e te faapogisaina ea o latou mafaufau i le misiona a le Perofeta o Iosefa Samita? Pe e te faatauasoina ea i latou mai le misiona paia a Iesu Keriso, le Alo o le Atua? E leai, e le mafai lava ona e faia i le lalolagi. Aisea? Aua ua latou iloa. Sa faaali atu e le Atua ia i latou, ma sa latou malamalama ai, ma e leai se malosi i le lalolagi na te liliueseina mai i latou mai le mea ua latou iloa o le upumoni.”5
Uso e ma tuagane, ina ia avea o na ituaiga o tamaloloa ma fafine o le valaau lea o o tatou aso—o soo o e suaina le loloto ia maua ai le malosiaga e tautoso ai pea pe a valaauina e savavali atu i le vaomatua, o soo ua i ai talitonuga maumaututu na faaalia mai e le Atua ia i tatou, o soo o Iesu o e olioli ma faatasi ma le loto atoa i a tatou lava malaga patino o le avea ai ma soo. I le avea ai ma ni soo o Iesu Keriso, tatou te talitonu ma e mafai ona tuputupu a’e i upumoni taua e tolu.
Muamua, E Mafai ona Tatou Tausia a Tatou Feagaiga, Tusa Lava Pe Le Faigofie
Pe a oo ina luitauina lou faatuatua, lou aiga, po o lou lumanai—pe a e taumanatu pe aisea ua matua faigata ai a o la e te faia le mea sili e ola ai i le talalelei—manatua ua ta’u mai e le Alii ia i tatou ia nofouta e i ai to’atuga. O to’atuga o se vaega o le fuafuaga ma e le faapea ai ua tuulafoaiina oe; o se vaega o mea ua faaigoaina o Ona [soo].6 Ae ui o lea, o Ia “o se tagata faanoanoa, ma ua masani ma le tiga.”7
Ua ou aoaoina faapea e sili ona naunau le Tama Faalelagi i lo’u tuputupu a’e o se soo o Iesu Keriso nai Lona naunau i lo’u ola to’afimalie. Atonu ou te le manao i taimi uma e faapena—ae o le mea lena o loo i ai!
O le ola fifilemu e le aumaia ai le mana. O le paoa tatou te manaomia e tatalia ai le vevela o o tatou taimi o le mana o le Alii ma e tafe mai Lona mana e ala ia tatou feagaiga ma Ia.8 Ina ia faalagolago i le faatuatua pe a tatou feagai ma matagi malolosi e faasagatau mai—ina ia taumafai malosi ma le faamaoni i aso taitasi e fai mea na tatou osifeagaiga ma le Faaola o le a tatou faia, e oo lava aemaise pe a tatou le lavava, popole, ma tauivi ma fesili ma faafitauli tuga—o le mauaina malie lea o Lona malamalama, Lona malosiaga, Lona alofa, Lona Agaga, Lona filemu.
O le mafuaaga o le savavali i le ala o feagaiga o le faalatalata atu ai lea i le Faaola. O Ia o le mafuaaga, ae le o lo tatou agai i luma atoatoa. E le o se tautuuga, ma e le tatau ona tatou faatusaina la tatou malaga i isi. Tusa lava pe tatou te tautevateva, o loo i ai lava o Ia iina.
Lua, E Mafai ona Tatou Faatino i le Faatuatua
I le avea ai o ni soo o Iesu Keriso, tatou te malamalama o le faatuatua ia te Ia e moomia le faatino—aemaise lava i taimi faigata.9
I le tele o tausaga talu ai sa tonu ai i o’u matua e toe faakapeta le fale. O le po i luma mai e taunuu ai le kapeta fou, sa faatonu ai e lo’u tina o’u tuagane e aveese meaafale ma sasae ese kapeta o potu ina ia mafai ai ona faapipii le kapeta fou. O lo’u uso e fitu tausaga i lena taimi, o Emily, ua leva ona moe. O lea la, a o moe o ia, sa latou aveesea lemu ia meaafale uma mai lona potu, vagana ai le moega, ona sasae ese ai lea o le kapeta. Ia, e pei lava o le mea e fai e tuagane matutua i nisi o taimi, sa tonu ia i latou e fai se mea malie. Sa latou aveesea ana mea uma mai le pusatu ma mai puipui, ae tuua ai na o le atigipotu. Ona latou tusia lea o se fasipepa ma faapipii i le puipui: “Le Pele Emily, o lea ua matou siitia ese. O le a matou tusi mai i ni nai aso ma ta’u atu ia te oe le mea ua matou i ai. Alofa atu, o lou aiga.”
O le taeao na sosoo ai ina ua le sau Emily i le ti o le taeao, sa o o’u tuagane e sue o ia—sa nofonofo na o ia ma le faanoanoa i tua o se faitotoa sa tapuni. Sa toe tomanatu Emilly mulimuli ane i lenei aafiaga: “Sa lofituina a’u. Ae mata o le a se mea semanu e tupu pe ana tau lava ina ou tatalaina le faitotoa? Mata o le a se mea semanu ou te faalogoina? Mata o le a se mea semanu ou te sosogiina? Semanu ou te iloaina sa lei tuua na o a’u. Semanu ou te iloaina e alofagia moni lava a’u. E lei oo mai lava ia te a’u lea mafaufauga e fai se mea e uiga i le tulaga sa ou i ai. Sa na ona ou musu lava ma nofo ai i lo’u potu ma tagi. Ae pe ana tau lava ina ou tatalaina le faitotoa.”10
Sa faia e lo’u uso se faaiuga i luga o le mea sa ia vaai i ai, ae e le o se ataata o mea moni sa i ai. Pe le malie ea e faapei foi i tatou o Emily, e mafai ona matuai mamafatu le faanoanoa po o le tiga po o le lotovaivai po o le popole po o le tuulafoaiina po o le ita po o le le fiafia ma lē taitai lava ona tatou faapea e tau lava ina fai sina mea, e tatala le faitotoa, e faatino ma le faatuatua ia Iesu Keriso?
E tumu tusitusiga paia i faataitaiga o alii ma tamaitai, o soo o Keriso o ē pe a feagai ma mea le lelei, e gaoioi lava—o le na tula’i i luga i le faatuatua ma savali.11
I lepela sa sailia le faamalologa, na fetalai atu i ai Keriso, “Ina o ia, ia faaali atu outou i faitaulaga. Ma ua oo ina, sa latou o, sa faamamaina i latou.”12
Sa latou o ma faaali atu i latou lava i faitaulaga e faapei ua faamaloloina i latou, ma i le faagasologa o lo latou faatinoina, sa malolo i latou.
Ou te fai atu foi, pe afai o le mafaufau e faatino e ui ina lagona i ou tiga e le mafai, faamolemole tuu atu lau faatinoga ia aapa atu mo se fesoasoani—i se uo, se tagata o le aiga, se taitai o le Ekalesia, se tagata tomai. E mafai ona avea lea o se uluai laasaga i le faamoemoe.
Tolu, E Mafai ona Tatou Loto Atoa ma Olioli i lo Tatou Tuuto13
Pe a oo mai aso faigata, ou te taumafai e manatua sa ou filifili e mulimuli ia Keriso ae ou te le’i sau i le lalolagi ma o luitau i lo’u faatuatua, lo’u ola maloloina, ma lo’u onosai o vaega uma o le mafuaaga ua ou i ai iinei. Ma e le tatau lava ona ou mafaufau faapea o tofotofoga o le asō e fesiligia ai le alofa o le Atua ia te a’u pe faaliliu ai lo’u faatuatua ia te Ia i le masalosalo. O tofotofoga e le faapea ua le aoga le fuafuaga; o ni vaega ia o le fuafuaga e fesoasoani ia te a’u e saili le Atua. Ou te avea atili faapei o Ia pe a ou tumau ma le onosai, ma le faamoemoe, faapei foi o Ia, pe a puapuagatia, ou te tatalo ma le faatauanau atili.14
O Iesu Keriso o le faataitaiga atoatoa o le alofa o lo tatou Tama ma Lona loto—o le faia o Lona finagalo, pe o le a lava le tau.15 Ou te fia mulimuli i Lana faataitaiga e ala i le faia o le mea lava lea.
Ua musuia a’u e ala i le avea ai ma soo ma le loto atoa, agaga atoa, o le fafine ua oti lana tane sa lafo ana tupe iti e lua i le mea e teu ai oa o le malumalu. Sa ia foai atu mea uma sa ia te ia.16
Sa silafia e Iesu Keriso le tele o ana mea uma ae sa vaai isi ua na o sina mea itiiti na ia foai. E moni foi lena mea ia i tatou. Na te le silasila i a tatou mea iti faapea o se toilalo ae o se avanoa e faaaoga ai le faatuatua ma tuputupu a’e ai.
Faaiuga
Le ‘au soo e, o Keriso, faatasi ai ma lo’u loto atoa, ua ou filifili e tutu faatasi ma le Alii. Ua ou filifili e tutu faatasi ma Ana auauna filifilia—Peresitene Russell M. Nelson ma ona uso a Aposetolo—aua latou te saunoa mo Ia ma o tausimea o sauniga ma feagaiga ia e noatia ai a’u i le Faaola.
Pe a ou tautevateva, o le a ou tu pea i luga, ma faalagolago i le alofa tunoa ma le mana o Iesu Keriso e mafai ai. O le a ou tumau i a’u feagaiga ma Ia ma galue ai i a’u fesili e ala i le suesueina o afioga a le Atua, i le faatuatua, ma le fesoasoani a le Agaga Paia, o le ou te talitonuina lana taitaiga. O le a ou sailia Lona Agaga i aso uma e ala i le faia o mea iti faigofie.
O lo’u ala lenei o le avea ma soo.
Ma seia oo i le aso e faamaloloina ai manu’a o aso uma o le olaga nei, o le a ou faatalitali i le Alii ma faalagolago ia te Ia—i Lana taimi, Lona poto, ma Lana fuafuaga.17
O lo tatou galulue faatasi ai, ou te fia tu faatasi ma Ia e faavavau. Ma Le Loto Atoa. O le iloa ai a tatou alolofa ia Iesu Keriso ma o tatou loto atoa, Na Te toe tuuina mai ia i tatou mea uma.18 I le suafa o Iesu Keriso, amene.