Faafouga o le Mo Le Malosi o le Autalavou.

Ua toe faafou e le Ekalesia lana taiala mo le autalavou o le Au Paia o Aso e Gata Ai. Ua valaaulia e le Mo Le Malosi o le Autalavou: O Se Taiala mo le Faia o Filifiliga le autalavou e faaaoga lo latou faitalia ma saili musumusuga e ola ai i tulaga faatonuina o le talalelei.

“O le taiala sili e mafai ona e maua mo le faia o filifiliga o Iesu Keriso. O Iesu Keriso o le malosi o le autalavou,” na aoao mai ai Elder Dieter F. Uchtdorf o le Korama a Aposetolo e Toasefululua i le sauniga o le konafesi aoao i le taeao o le Aso Toonai. “O le faamoemoega o le Mo Le Malosi o le Autalavou o le faasino atu lea o oe ia te Ia. O loo aoao mai ai ia te oe upumoni e faavavau o Lana talalelei toefuataiina—upumoni e uiga i lou tagata, po o ai oe, po o ai o Ia, ma mea e mafai ona e faataunuuina i Lona malosi” (“O Iesu Keriso o le Malosi o le Autalavou,” Liahona, Nov. 2022, 10–11).

Ua fautuaina le autalavou e faaaoga ia mataupu faavae i le taiala e faia ai filifiliga amiotonu i vaega uma o o latou olaga. Atonu e mananao matua, taitai, ma le autalavou e suesue ma faasoa atu le taiala i le aiga, i sauniga i Aso Sa, ma i gaoioiga, e aofia ai tolauapiga ma konafesi a le autalavou. Atonu e mananao taitai o Alii Talavou ma Tamaitai Talavou e faamamafa atu e le aunoa ia mataupu faavae o loo maua i le taiala. O na mataupu faavae e mafai foi ona avea ma taulaiga o se po o tulaga faatonuina faaletausaga mo le autalavou ma o latou matua.

O loo maua le taiala fou faatekinolosi i gagana e 50 i le vaega a le Autalavou o le Gospel Library ma i le youth.ChurchofJesusChrist.org. E le o toe mamao ona auina atu lea o kopi ua lolomiina i uarota ma paranesi i le lalolagi atoa.