O Le A Le Mea Moni?
O le Atua o le puna lea o upumoni uma. O Le Ekalesia a Iesu Keriso o le Au Paia o Aso e Gata Ai e taliaina upumoni uma ua tuuina mai e le Atua i Ana fanau.
O’u uso e ma tuafafine pele, faafetai atu i tagata uma mo lenei sauniga musuia! Talu mai le tatou konafesi ia Aperila talu ai, ua tatou molimauina le tele o mea ua tutupu i le lalolagi, e faasolo mai le lotonutimomoia e oo atu i le fiafia ma le olioli.
Ua matou fiafia lava i lipoti o konafesi tetele a autalavou o loo faia i le lalolagi atoa.1 I nei konafesi, o loo aoao ai a tatou talavou malualii e faapea, po o le a lava mea e tutupu i o latou olaga, o lo latou malosiaga silisilli lava e sau mai le Alii.2
Ua tatou olioli i le faateleina o malumalu o loo fausiaina i le lalolagi atoa. I faapaiaga o malumalu fou taitasi, e oo mai ai le faaopoopoga o le mana faaleatua i le lalolagi e faamalolosia ai i tatou ma faafetaia’ia ai taumafaiga faateteleina a le fili.
O le saua o le faatinoga lea o faatosinaga a le fili. O se agasala matuia.3 I le avea ai ma Peresitene o le Ekalesia, ou te toe faamautu atu aoaoga a le Alii o Iesu Keriso i lenei faafitauli. Se’i o’u faamanino atoatoa atu: soo se ituaiga o sauaga i tamaitai, tamaiti, po o soo se tasi lava o se mea inosia lea i le Alii. E loto faavauvau o Ia ma ou loto faavauvau i soo se taimi lava e faamanu’alia ai soo se tasi lava. E faanoanoa o Ia ma tatou te faanoanoa uma mo tagata taitasi e aafia fua ona o sauaga o soo se ituaiga. O i latou e faia nei amioga matagā tele e le gata e tali atu i tulafono a tagata ae o le a faafesaga’i foi ma le to’asa o le Atua Silisiliese.
Mo le tele o auga tausaga, ua faia ai lava e le Ekalesia ni fuataga tetele e puipui—aemaise lava—fanau mai sauaga. E tele fesoasoaniga i luga o uepisaite a le Ekalesia. Ou te valaaulia outou ia suesue i ai.4 O nei taiala ua faatulagaina e puipui ai ē ta’umamaina. Ou te uunaia i tatou uma taitoatasi ia nofouta i soo se tasi atonu o ono lamatia i le sauaina ma ia faavave ona gaoioi ia puipuia i latou. O le a lē taliaina lava e le Faaola ni sauaga, ma i le avea ai ma Ona soo, e lē mafai foi ona tatou taliaina.
Ua i ai i le fili isi foi togafiti faapopoleina. Faatasi ai ma na mea ua i ai ana taumafaiga e faanenefu ai le laina i le va o le mea moni ma le mea e lē moni. O le lolo o faamatalaga o loo maua i o tatou tamatama’ilima, o le mea moni, ua matua faateleina ai le faigata ona fuafua po o le a le mea moni.
O lea lu’itau ua faamanatu mai ai ia te a’u se aafiaga na ma maua ma Sister Nelson ina ua ma asiasi atu i se tagata lauiloa i se atunuu sa toalaiti lava ni tagata sa faalogo e uiga ia Iesu Keriso. O lea uo toeaina faapelepele sa matua ma’i lava o ia. Sa ia ta’u mai ia i ma’ua o le tele o aso sa ia ta’oto ai i le moega, sa tele ina ia sioa atu i le fa’alo ma fesili, “O le a le mea moni?”
E toatele tagata i le lalolagi i aso nei “o loo taofia mai le upumoni ona latou te le iloa le mea e maua ai.”5 O nisi o le a faatalitonuina i tatou o le upumoni e fua lava i le tagata—e tatau ona fuafua lava e tagata taitoatasi po o le a le mea e moni mo ia lava. O se talitonuga faapena ua na o se mafaufauga faivavale mo i latou ua mafaufau sese o le a latou lē tali atu foi i le Atua [e tusa ma a latou filifiliga].
Uso e ma tuafafine pele, o le Atua o le puna lea o upumoni uma. O Le Ekalesia a Iesu Keriso o le Au Paia o Aso e Gata Ai e taliaina upumoni uma ua tuuina mai e le Atua i Ana fanau, pe latou te aoaoina i se potu suesue faasaienitisi, pe mauaina e ala i faaaliga tuusa’o mai ia te Ia.
Mai lenei pulelaa i le asō ma taeao, o le a faaauau ai pea ona outou faafofoga i upumoni. Faamolemole ia tusi i lalo ni mafaufauga e ta’a’ina i ai lou gauai ma mea e oo atu i lou mafaufau ma tumau ai i lou loto. Ōle atu i le Alii i le agaga tatalo e faamautu mai le moni o mea ua e faalogo i ai.
Ou te alofa ia te outou, o’u uso e ma tuafafine pele. Ou te tatalo o le a maua i lenei konafesi le tausama’aga faaleagaga o loo e sailia. I le suafa paia o Iesu Keriso, amene.