Vaaia Atili o Iesu Keriso i o Tatou Olaga
Ua valaaulia i tatou e le Faaola e vaai i o tatou olaga e ala atu ia te Ia ina ia mafai ai ona vaaia atili o Ia i o tatou olaga.
O’u uso e ma tuagane, ou te tu atu ma le lotomaualalo i o outou luma i lenei taeao. Ua fili faatasi o tatou loto i le faafetai e faapotopoto, po o fea lava o outou i ai i le salafa o le lalolagi, e faalogologo i savali mai perofeta, aposetolo, tagatavaai, talifaaaliga, ma taitai o le malo o le Atua. Ua avea faafoliga i tatou e pei o le nuu i ona po o le Tupu o Peniamina, ua faatutu o tatou fale’ie ma faafaasaga atu o tatou faitotoa agai tonu atu i le perofeta a le Atua i le lalolagi,1 o Peresitene Russell M. Nelson.
Sa leaga la’u vaai i le umi e mafai ona ou manatua ma sa manaomia ai e le aunoa ni tioata faatonu, e faasa’o ai la’u vaaiga. Pe a pupula o’u mata i taeao uma, e foliga mai e ese le fenumiai o le lalolagi. E talalautasi mea uma, e le manino, ma fenumia’i. E oo lava i si o’u toalua pele e pei e na o se faafoliga o se atatosi e le faaalia mai ai lona tagata moni alofagia ma toafilemu. O le mea ou te manaomia e aunoa ma se taumafaufau i ai, ae ou te le’i faia se mea i le amataga o lo’u aso, o le aapa atu lea i a’u matatioata e fesoasoani ia te a’u ia fesootai lelei o’u siosiomaga, ma olioli i se aafiaga sili ona manaia ao fesoasoani mai e faatautaia a’u i le aluga o lo’u aso.
I le tele o tausaga, ua oo ina ou iloa o lenei amioga, ua ta’u mai ai lo’u faalagolago i aso taitasi i mea e lua: muamua, o se meafaigaluega e fesoasoani ia te a’u e faamanino, taulai, ma mafai ai ona vaaia le lalolagi e pei ona i ai moni; ma le lona lua, o se manaomia o se taitaiga pa’itino e faasinoa pea lava pea a’u i le itu sa’o. O lenei faiga masani, faigofie ua atagia mai ai ia te a’u se matauga taua e uiga i la tatou sootaga ma lo tatou Faaola o Iesu Keriso.
I o tatou olaga ia e tele ina tumu i fesili, popolega, fe’oma’iga, ma avanoa, o le alofa o lo tatou Faaola mo i tatou taitoatasi ma o ni Ana fanau o le feagaiga ma faapea foi ma Ana aoaoga ma tulafono, o loo avanoa lava punaoa i aso taitasi e mafai ona tatou faalagolago i ai e avea o se “sulu e susulu atu, … ma faamalamalama[ina ai o tatou] mata [ma] faapupula[ina o tatou] malamalamaaga.” 2 A o tatou saili mo faamanuiaga a le Agaga i o tatou olaga, o le a mafai ona tatou vaai atu, e pei ona aoao mai Iakopo, “i mea e pei ona i ai moni lava, ma … e uiga i mea e pei o le a i ai moni lava.”3
I le avea ai o ni fanau o le Feagaiga a le Atua, ua tulagaese lava le faamanuiaina o i tatou i le anoanoai o meafaigaluega ua tofia mai le lagi e faaleleia ai la tatou vaaiga faaleagaga. O afioga ma aoaoga a Iesu Keriso e pei ona tusia i tusitusiga paia ma savali mai Ana perofeta filifilia, ma Lona Agaga e maua mai i tatalo i aso taitasi, auai e le aunoa i le malumalu, ma o sauniga faalevaiaso o le faamanatuga e mafai ona fesoasoani e toefuatai mai ai le filemu ma maua mai ai le meaalofa e tatau ai o le iloatino lea e aumaia le sulu o Keriso ma Lona malamalama i atugaluga o o tatou olaga i se lalolagi atonu ua puaoa. E mafai foi ona avea le Faaola ma o tatou tapasa ma lo tatou tautai a o uli atu lo tatou sa i sami malū ma galuā o le olaga. E mafai ona ia faalauleleia le ala sa’o e tau atu i lo tatou taunuuga e faavavau. O lea la, o le a se mea e finagalo o Ia tatou te vaai i ai, ma o fea foi e finagalo o Ia tatou te o i ai?
Na aoao mai e lo tatou perofeta pele e faapea, “o la tatou taula’iga e tatau ona faamausali i luga o le Faaola ma Lana talalelei” ma e tatau ona tatou “taumafai malosi e vaavaai atu ia te Ia i mafaufauga uma.”4 Sa folafola mai foi e Peresitene Nelson e faapea “e leai se mea na te valaauliaina le Agaga nai lo le tāmau o lau taulaiga ia Iesu Keriso. … O le a ia taitaia ma taiala oe i lou olaga patino pe afai o le a e faaavanoa se taimi mo Ia i lou olaga—i aso taitasi ma aso uma.”5 Uo e, o Iesu Keriso o le faamoemoega o la tatou taula’iga ma le faamoemoe o lo tatou taunuuga. Ina ia fesoasoani tatou te tumau pea ma agai atu i le itu sa’o, ua valaaulia i tatou e le Faaola e vaai i o tatou olaga e ala atu ia te Ia ina ia mafai ai ona vaaia atili o Ia i o tatou olaga. Ua oo ina ou iloa atili e uiga i lenei valaaulia patino e ala i lo’u suesueina o le Feagaiga Tuai.
Na tuuina atu le tulafono a Mose i uluai Isaraelu e avea o se talalelei sauniuni, na mamanuina e saunia ai tagata mo se sootaga maualuga atu faalefeagaiga ma le Atua e ala ia Iesu Keriso.6 O le tulafono, e ‘oa i faatusa e faasino ai le au talitonu e “vaavaai atu i le afio mai” ma le Togiola a Iesu Keriso,7 o se auala e fesoasoani ai i le nuu o Isaraelu ia taulai atu i le Faaola e ala i le faatino o le faatuatua ia te Ia, Lana taulaga, ma Ana tulafono ma poloaiga i o latou olaga8—sa faamoemoe ia aumaia i latou i se malamalama sili atu i lo latou Togiola.
E pei lava ona tatou i ai i ona po nei, sa valaaulia foi tagata anamua e vaai i o latou olaga e ala atu ia te Ia ina ia mafai ai ona vaaia atili o Ia i o tatou olaga. Peitai e oo ane i le taimi o le misiona a le Faaola, ua latou le mafaufau ia Keriso ia latou aga, ua faataatia ese o Ia ae faaopoopo i faiga faaletulafono e le’i faatagaina, ia e leai se aoga faafaatusa e faasino atu ai i le faapogai moni e tasi o lo latou faaolataga ma le togiolaina—o Iesu Keriso.9
Ua fenumia’i ma lē manino le lalolagi masani o Isaraelu. Sa talitonu le fanauga a Isaraelu i le tulaga lea, e faapea o faiga ma sauniga o le tulafono o le ala lea i le faaolataga faaletagata lava ia, ma ua faaitiitia ai se vaega o le tulafono a Mose i se ituaiga o faiga faavae na faatautaia ai le olaga faatagatanuu.10 O lea mea na manaomia ai le Faaola e toefuatai le taula’i ma le manino i Lana talalelei.
O le taunuuga, sa teena e se vaega tele o Isaraelu Lana savali, e oo lava i lo latou tuua’ia o le Faaola—o Ia o lē na tuuina atu le tulafono ma tautino mai o Ia o “le tulafono, ma le malamalama”11—ua na solia. Peitai, i le ta’ua ai e Iesu i Lana Lauga i luga o le Mauga, le tulafono a Mose, na tautino mai ai, “Aua tou te manatu ua ou sau e tatalaina le tulafono, po o le au perofeta: Ou te lei sau e tatalaina, a ia faataunuuina.”12 Ona faauma lea e le Faaola, e ala i Lana Togiola e faavavau o tulafono, aiaiga faavae, ma faiga faalesauniga na tausisia e le nuu o Isaraelu i lena taimi. O Lana taulaga faai’u na amatalia ai le la’a ese mai le osiga o taulaga mu, i le tuuina atu o se “loto momomo ma se agaga salamo,”13 mai le sauniga o le taulaga i le sauniga o le faamanatuga.
Na saunoa Peresitene M. Russell Ballard, ina ua aoao atu e uiga i le mataupu, “I se isi itu, sa suia le taulaga mai le taulaga i le tagata o loo osia.”14 Pe a tatou aumaia a tatou taulaga i le Faaola, ua valaaulia i tatou ia vaaia atili Iesu Keriso i o tatou olaga, a o tatou tuuina atu ma le lotomaualalo o tatou loto ia te Ia e faailoa ai ma malamalama i Lona tuuto atoatoa atu i le finagalo o le Tama. Pe a tatou tamau la tatou vaai ia Iesu Keriso, ua tatou faailoa ma malamalama ua na o Ia lava le faapogai ma le ala e maua ai le faamagaloga ma le togiola, e oo lava i le ola e faavavau ma le faaeaga.
I le avea ai o se soo fou o le talalelei, sa ma fetaia’i ma le toatele o e sa matauina ma vaaia suiga i a’u amio, faiga, ma filifiliga ina ua ou auai i le Ekalesia. Sa latou fiailoa e uiga i “pe aisea” o le mea ua latou vaaia—pe aisea na ou filifili ai ou te papatiso ma auai i lenei faapotopotoga o le au talitonu, Le Ekalesia a Iesu Keriso o le Au Paia o Aso e Gata Ai, pe aisea ua ou le toe auai i isi faiga patino i le Aso Sapati, pe aisea ua ou faamaoni ai i le tausiga o le Upu o le Poto, pe aisea ua ou faitauina ai le Tusi a Mamona, pe aisea ua ou talitonu ai ma faaaoga aoaoga a perofeta o aso nei ma aposetolo i lo’u olaga, pe aisea ou te auai i sauniga faalevaiaso a le Ekalesia, pe aisea ou te valaaulia ai isi e “o mai inā matamata, o mai ma fesoasoani, … o mai ma nofomau,”15 ma “o mai ma avea ma ni ō.”16
I lena taimi, sa lagonaina le lofituina o na fesili, ma sa manino le fiailoa, a o nisi taimi sa tuua’ia ua ou sese. Ae a o ou tauivi ma le fesiligia e tagata o la’u faaiuga, sa oo ina ou iloaina o lo latou su’esu’e, o le mea moni, o la’u uluai valaaulia lea e tago e faamaulu a’u tioata faaleagaga e faamanino ai, taulai, ma faamautu le mea na faaosofia ai lo’u faamaoni i faiga ma tulaga faatonuina o le talalelei. O le a le faapogai o la’u molimau? Pe sa na ona ou faataunuuina o “faatinoga i fafo atu” e aunoa ma le faatagaina o na faiga e fesootai ai i tulafono a le Atua e “faamalosia [lo’u] faatuatua ia Keriso,”17 pe faapupula ai le malamalama o Iesu Keriso ua na o le pau lea o le faapogai o le malosi i a’u mea o fai?
E ala i taumafaiga faaeteete e vaai atu iā ma mo Iesu Keriso i o’u mafaufauga ma galuega uma, sa faamalamalamaina o’u mata, ma sa faapupulaina lo’u malamalama ia iloa ai o Iesu Keriso sa valaau mai mo a’u e “sau ia te Ia.18 Mai lenei vaitau amata o le avea ai ma so’o i lo’u talavou, sa mafai ona ou toe manatua se valaaulia sa tuuina mai ia te a’u e faifeautalai e aufaatasi ma i la’ua a o la aoao atu le talalelei i se vaega o teine talavou o la’u tupulaga. I se tasi afiafi, a o matou nofonofo i le fale o se aiga o se tasi o nei tamaitai talavou, o la latou fesili faamaoni o le “pe aisea ua ou talitonu ai” na tuia ai lo’u loto, ma faatagaina ai a’u e molimau atu ia te i latou faatasi ai ma se malamalama loloto i le silafaga a le Alii e uiga i faaosofia faaleagaga o lo’u avea ai ma soo, ma sa faalautele ai la’u molimau agai i luma.
Sa ou aoao ai i lena taimi, e pei ona ou iloa i le taimi nei, o lo tatou Faaola o Iesu Keriso, e ta’ita’ia o tatou vae i falelotu i vaiaso taitasi e aai ma feinu i Lana faamanatuga, i le maota o le Alii e osifeagaiga ai ma Ia, i tusitusiga paia ma aoaoga a perofeta e aoao ai i Ana afioga. Na te faatonutonuina o tatou gutu e molimau atu ia te Ia, o o tatou lima e si’i a’e ma auauna atu e faapei ona Ia si’i a’e ma auauna mai, o o tatou mata ia vaai i le lalolagi ma le tasi ma le isi e pei ona Ia faia—“e pei ona i ai moni, ma … e pei ona o le a i ai moni.”19 Ma a o tatou faatagaina o Ia e faatonufolau i tatou i mea uma, tatou te maua se molimau faapea “ua faailoa mai i mea uma o loo i ai se Atua,”20 aua o le mea tatou te sailia ai o Ia, o le a tatou maua ai o Ia21—i aso taitasi ma aso uma. Ou te molimau atu ai i nei mea i le suafa paia o Iesu Keriso, amene.