Fiafia ma le Faavavau
O le olioli moni, tumau ma le faavavau faatasi ma i latou tatou te alolofa i ai o le ute tonu lea o le fuafuaga o le fiafia a le Atua.
Uo, uso e ma tuafafine pele, pe tou te manatua le talitonu, po o le mananao e talitonu, i le ola fiafia ai lea?
Ona tupu lea o le olaga. Tatou te “matutua.” Ua faigata sootaga. O lenei lalolagi e malomaloa, fe’oma’i, tautulei, e faafoliga ma amio faatosina. Ae, i lo tatou “naunauga loloto,”1 tatou te talitonu, pe mananao e talitonu, i se mea, i se isi itu, e moni ma mafai ona maua le fiafia tumau.
O le “Fiafia ma le faavavau” o mea e mafai ona tatou maua ae le na o ni mea faafoliga o tala faafagogo. O le olioli moni, tumau ma le faavavau faatasi ma i latou tatou te alolofa i ai o le ute tonu lea o le fuafuaga o le fiafia a le Atua. O Lana ala alofa na saunia e mafai ona faafiafiaina ma faavavau la tatou malaga e faavavau.
E tele mea tatou te patipatia ma faafetai ai. Ae, e leai se tasi o i tatou po o se aiga e atoatoa. O a tatou sootaga e aofia ai le alofa, agafesootai, ma uiga patino ae e masani ona le moni, tiga, o nisi taimi e ogaoga le tiga.
“Aua faapei ona oti uma ia Atamu e faapea foi ona faaolaina uma ia Keriso.” 2 O le ola ia Iesu Keriso e aofia ai le tino ola pea—Lana meaalofa o lo tatou toetutu faaletino. A o tatou ola ma le faatuatua ma le usiusitai, o le ola ia Keriso e mafai foi ona aofia ai le ola fiafia faatasi ma le Atua ma i latou tatou te alolofa i ai.
I se auala ofoofogia, o loo aumaia faalatalata atili i tatou e le perofeta a le Alii i lo tatou Faaola, e aofia ai e ala i sauniga ma feagaiga paia i le malumalu, ua latalata atili mai ia i tatou i le tele o nofoaga. Ua tatou maua se avanoa maoae ma se meaalofa e iloa ai le malamalama fou faaleagaga, alofa, salamo, ma le faamagalo atu o le tasi i le isi ma o tatou aiga, i le olaga nei ma le faavavau.
E ala i le faatagaga, ou te faasoa atu ai ni aafiaga paia, tuusa’o faaleagaga e le masani se lua, na faamatala mai e uo e uiga ia Iesu Keriso i le tuufaatasia o aiga e ala i le faamaloloina e oo lava i le lototiga ua autupulagā.3 “E le iu ma faavavau,”4 “e sili atu le malosi i lo fusi o le oti,”5 E mafai ona fesoasoani le Togiola a Iesu Keriso ia i tatou e aumaia le filemu i o tatou taimi ua tuanai ma le faamoemoe i lo tatou lumanai.
Ina ua la auai i Le Ekalesia a Iesu Keriso o le Au Paia o Aso e Gata Ai, sa aoaoina ma le fiafia e la’u uo ma lona toalua ia sootaga faaleaiga e le faapea “seia oo i le oti.” I le maota o le Alii, e mafai ona tuufaatasia aiga e faavavau (faamauina).
Ae sa lei manao la’u uo e faamau i lona tama. “Sa le o ia o se tane lelei i lo’u tina. E le o ia o se tamā lelei i lana fanau,” o lana tala lea. “E tatau ona faatali lo’u tamā. E leai so’u manao e fai ona galuega o le malumalu ma ia faamauina faatasi ma ia i le faavavau.”
Mo se tausaga, sa ia anapogi ai, tatalo, talanoa soo ma le Alii e uiga i lona tamā. Mulimuli ane, na saunia o ia. Ua maea galuega faalemalumalu o lona tamā. Mulimuli ane, sa ia fai mai, “A o o’u moe sa faaali mai lo’u tamā ia te a’u i se miti, sa papa’e uma ona ofu. Sa suia o ia. Sa ia fai mai, ‘Vaai mai ia te a’u. Ua ou mamā atoa. Faafetai atu mo le faia o le galuega mo a’u i le malumalu.’” Sa faaopoopo atu lona tamā, “Tu i luga ma toe foi i le malumalu; o loo faatalitali lou tuagane ina ia papatisoina.”
Fai mai la’u uo, “O o’u tuaa ma i latou ua mavae atu o loo faatalitali mai ma le naunautai mo o latou galuega ina ia faia.”
“E pei foi o a’u,” na ia fai mai ai, “o le malumalu o se nofoaga o le faamalologa, aoaoina, ma le faailoaina o le Togiola a Iesu Keriso.”
Aafiaga lona lua. Sa sailiili ma le filiga e se isi uo lona talafaasolopito faaleaiga. Sa manao o ia e faailoa mai le tamā o lona tamamatua.
I se tasi taeao po, sa fai mai la’u uo sa ia lagonaina le i ai faaleagaga o se alii i lona potu. Sa manao le tamaloa ina ia maua ma iloa i lona aiga. Sa lagona e le tamaloa le faanoanoa ona o se mea sese lea ua ia salamo ai nei. Sa fesoasoani le tamaloa i la’u uo ia iloa e leai se fesootaiga tau DNA o la’u uo ma le tagata sa manatu la’u uo o le tamā o lona tamamatua. “I se isi faaupuga,” sa fai mai ai la’u uo, “Sa ou iloaina o le tamā o lo’u tamamatua ma iloa ai e le o ia le tagata lea na fai mai ai a matou faamaumauga faaleaiga o le tamā o lo matou tamamatua.”
Sa faamanino mai e ana sootaga faaleaiga, sa fai mai ai la’u uo, “Ou te lagona le saoloto, i le filemu. E taua tele le iloa po o ai tagata o lo’u aiga.” E manatu la’u uo , “O se lala lo’u e le faapea ai o se laau leaga. O tulaga tau tamaoaiga o se aiga e fanau mai ai se tagata, e le taua tele i lo le atina’ega ua ausia e le tagata pe a tuua le olaga.”
O tusitusiga paia ma aafiaga paia o le faamalologa ma le filemu faaletagata lava ia, e aofia ai ma i latou o loo ola i le lalolagi o agaga, ua faamamafa mai ai ni mataupu faavae autu se lima.
Muamua: E totonugalemu i le fuafuaga a le Atua o le togiola ma le fiafia, o Iesu Keriso, e ala i Lana Togiola, ua folafola mai ai e tuufaatasia o tatou agaga ma le tino, “e le mafai ona toe tuueseeseina, ina ia mafai ona tatou maua se atoatoaga o le olioli.”6
Lua: O le Togiola—to-gi-ola ia Keriso—e oo mai pe a tatou faatinoina le faatuatua ma aumai fua e salamo ai.7 E pei ona i ai i le olaga nei, e faapena foi i le tino ola pea. O sauniga o le malumalu e le suia ai e i latou lava i tatou po o i latou i le lalolagi o agaga. Ae o nei sauniga paia e mafai ai ona faia feagaiga faapaiaina ma le Alii, lea e mafai ona aumaia le ogatasi ma Ia ma le tasi ma le isi.
E oo ina atoatoa lo tatou olioli pe a tatou lagonaina le alofa tunoa ma le faamagaloga a Iesu Keriso mo i tatou. Ma a o tatou ofoina atu le vavega o Lona alofa tunoa ma le faamagaloga i le tasi ma le isi, o le alofa mutimutivale tatou te maua ma le alofa mutimutivale tatou te ofoina atu e mafai ona fesoasoani e faia ia tonu faamasinoga le tonu o le olaga.8
Tolu: E silafia ma alofa atoatoa le Atua ia i tatou. “E le ulagia le Atua,”9 e le mafai foi ona faaseseina o Ia. Faatasi ai ma le alofa mutimutivale ma le faamasinotonu atoatoa, Na te opoopo mai i Ona aao o le saogalemu ē lotomaualalo ma ē ua salamo.
I le Malumalu o Katelani, na vaai ai le Perofeta o Iosefa Samita i se faaaliga vaaia na faasaoina lona uso o Alevini i le malo selesitila. Sa maofa le Perofeta o Iosefa, talu ona sa maliu Alevini ae lei mauaina le sauniga faaola o le papatisoga.10 O le mea e faamafanafana ai, sa faamalamalama mai e le Alii le mafuaaga: O le Alii “o le a faamasino [i tatou] e tusa ma [a tatou] galuega, e tusa ma le manaoga o o tatou loto.”11 E molimauina e o tatou agaga a tatou galuega ma naunauga.
Ma le agaga faafetai, ua tatou iloa o e ola ma “e ua oti o e salamo o le a togiolaina, e ala i le usiusitai i sauniga o le maota o le Atua”12 ma le Togiola a Keriso. I le lalolagi o agaga, e oo lava ia i latou e agasala ma solitulafono e maua le avanoa e salamo ai.13
I se faatusatusaga, o i latou o e filifili ma le loto i ai le amioleaga, o e ua faatuai ma le iloa le salamo, po o e i soo se manatu po o le iloaina o le ala e solia ai poloaiga o fuafua mo le salamo faigofie, o le a faamasinoina e le Atua ma o se “manatuaga susulu o [o latou] tausalaga uma.”14 E le mafai ona tatou agasala ma le iloa i le Aso Toonai, ona faamoemoe lea e otometi le faamagaloga e ala i le aai ma feinu i le faamanatuga i le Aso Sa. I faifeautalai po o isi o e fai mai o le mulimuli i le Agaga o lona uiga o le le usitai i tulaga faatonuina o le misiona po o poloaiga, faamolemole ia manatua o le usitaia o tulaga faatonuina o le misiona ma poloaiga e valaaulia ai le Agaga. E leai se tasi o i tatou e tatau ona tuuesea le salamo. E amata faamanuiaga o le salamo a o amata ona tatou salamo.
Fa: Ua tuuina mai e le Alii ia i tatou le avanoa paia e avea atili ai e faapei o Ia a o tatou ofoina atu sauniga faaola sui o le malumalu e manaomia e isi ae le mafai ona faia mo i latou lava. E oo ina tatou atoatoa atili ma faaatoatoaina15 a o avea i tatou ma “faaola … i luga o le Mauga o Siona.”16 A o tatou auauna atu i isi, e mafai e le Agaga Paia o Folafolaga ona faamaonia ia sauniga ma faapaiaina le tagata e tuuina atu ma lē e taliaina. E mafai e i laua uma e tuuina atu ma lē e mauaina ona osia ma faalolotoina feagaiga e liua ai, i le aluga o taimi e maua ai faamanuiaga na folafola atu ia Aperaamo, Isaako, ma Iakopo.
Ma le mea mulimuli, lona lima: E pei ona aoao mai le Tulafono Auro,17 o se faatomuaga faapaiaina i le salamo ma le faamagaloga ua valaaulia ai i tatou taitoatasi e ofo atu i isi mea tatou te manaomia ma mananao i ai.
O nisi taimi o lo tatou loto e faamagalo atu i se isi tagata e mafai ai e i latou ma i tatou ona talitonu e mafai ona tatou salamo ma faamagaloina. O nisi taimi o se loto ia salamo ma se tomai e faamagalo atu ai e oo mai i taimi eseese. O lo tatou Faaola o lo tatou Puluvaga i le Atua, ae e fesoasoani foi o Ia e aumaia i tatou ia i tatou lava ma le tasi ma le isi a o tatou o mai ia te Ia. Aemaise lava pe a loloto le manu’a ma le tiga, o le faaleleia o a tatou sootaga ma le faamaloloina o o tatou loto e faigata, atonu e le mafai e i tatou lava ia. Ae e mafai e le lagi ona aumaia ia i tatou le malosi ma le poto e sili atu i lo tatou lava iloa o le taimi e pipiimau ai, ma le ala e faamamulu ai.
E tuuitiitia lo tatou tuulafoaiina, pe a tatou iloa e le o tuua na o i tatou. E malamalama pea lo tatou Faaola.18 Faatasi ai ma le fesoasoani a lo tatou Faaola, e mafai ona tatou faamatuu atu lo tatou faamaualuga, o tatou tiga, o a tatou agasala i le Atua. Po o le a lava lo tatou lagona a o tatou amata, e tatou te atoatoa atili pe a tatou faalagolago ia te Ia e faaatoatoa a tatou sootaga.
O le Alii, o lē na te silafia ma malamalama atoatoa, e faamagaloina lē o le a Ia finagalo i ai; o i tatou (e le atoatoa) e tatau ona faamagalo atu i tagata uma. A o tatou o mai i lo tatou Faaola, e faaitiitia lo tatou taulai ia i tatou lava. E itiiti lo tatou faamasinoina ae faamagalo atili atu. O le faalagolago i Lona mana, alofa mutimutivale, ma le alofa tunoa19 e mafai ona faasaolotoina ai i tatou mai finauga, ita, sauaga faatautala, tuulafoaiina, le talafeagai, ma luitau faaletino ma faalemafaufau ia e oo mai i nisi taimi ma se tino faaletino i se lalolagi faaletino. O le fiafia ma le faavavau e le faapea o sootaga uma o le a fiafia ma faavavau. Ae o le afe tausaga o le meleniuma pe a noanoatia Satani20 e mafai ona tatou maua ai le taimi manaomia ma auala e ofo ai ia alofa, malamalama, ma galueaiina mea uma, a o tatou sauniuni mo le faavavau.
Tatou te maua fegalegaleaiga a le lagi i le tasi ma le isi.21 O le galuega ma le mamalu o le Atua e aofia ai le aumaia o le fiafia ma le faavavau.22 O le ola e faavavau ma le faaeaga o le iloa lea o le Atua ma Iesu Keriso, e ala i le mana faaleatua, lea o le a tatou i ai i le mea o i ai i La’ua.23
Uso e ma tuafafine pele, o loo soifua le Atua lo tatou Tama Faalelagi ma Lona Alo Pele. La te ofoina mai le filemu, olioli, ma le faamalologa i ituaiga ma gagana uma, ia i tatou taitoatasi. O loo taitaia e le perofeta a le Alii le ala. O loo faaauau pea faaaliga o aso e gata ai. Tau ina ia tatou latalata atili atu i lo tatou Faaola i le maota paia o le Alii, ma tau ina ia Ia tosina atu i tatou i le Atua ma i le tasi ma le isi, a o tatou lalagaina faatasi o tatou loto ma le mutimutialofa faaKeriso, upumoni, ma le alofa mutimutivale i a tatou tupulaga uma—i le olaga nei ma le faavavau, fiafia ma le faavavau. Ia Iesu Keriso, e mafai ai; ia Iesu Keriso, e moni. Ou te molimau atu ai, i Lona suafa paia, o Iesu Keriso, amene.