Ua Avea Peresitene Nelson ma Peresitene Aupito Matua o le Ekalesia

Na soifua mai i le aso 9 o Setema, 1924, sa faamanatuina talu ai nei e Peresitene Russell M. Nelson lona aso soifua lona 98 tausaga. I le aso 14 Aperila, 2022, na avea ai o ia ma Peresitene aupito matua i le talafaasolopito o le Ekalesia.

O le tomanatu ai i le auaunaga ma le soifuaga o Peresitene Nelson, na saunoa ai Peresitene Dallin H. Oaks, Fesoasoani Muamua i le Au Peresitene Sili, “O ia o se taitai musuia ma atamai ma o se tamalii sili ona agamalu ma tauagafau e mafai ona e faamoemoe e mafuta faatasi.”

Sa faailoa mai e Peresitene Henry B. Eyring, Fesoasoani Lua, ona manatu e uiga i le matafaioi a Peresitene Nelson i le avea ai ma perofeta a le Alii: “O taimi uma lava matou te savavali ese ai mai le ofisa, ma te faapea atu ma Peresitene Oaks, ‘Ua toe tupu foi.’ O le a e vaai i le oo mai o faaaliga. O le a e vaai ia te ia o ole atu mo se fautuaga, ona oo mai lea o le faaiuga ma iloa ai e tagata uma o i totonu o le potu e sa’o ma e mai le Atua. Na fai mai lemu o ia, ‘Ou te manatu o le mea lenei e finagalo le Alii tatou te faia.’ Ua na o sina taimi ma sia taimi.”