“O Le Malamalama o le Olaga,” Liahona, Ian. 2023.
O Le Malamalama o le Olaga
O le Faaola o Iesu Keriso o lo tatou malamalama, o lo tatou ola, ma lo tatou ala—ananafi, i le asō, ma le faavavau.
Auiliiliga mai le Taulai Atu i le Olioli, saunia e Michael T. Malm
A o goto le la i se isi Aso Sa i le 1948, sa oo ina ou savali atu i le auvai o le Vaitafe o Trent i Nottingham, Egelani. I le avea ai ma se faifeautalai e 20 tausaga le matua, sa valaauina talu ai e avea au o se peresitene o le itu. Sa o se aso umi ma le vaivai na faatumulia i fonotaga ma auaunaga, ae sa ou fiafia ma faamalieina i le galuega.
A o ou savalivali i auvai o le vaitafe, sa ou faia se tatalo i lo’u loto. I le faamoemoe ai ia lagonaina sina taitaiga mai le Alii, sa ou fesili atu ai, “O ou faia ea le mea ua E finagalo ai?”
Sa oo mai ia te au se lagona lofituina o le filemu ma le malamalama. I lena lava taimi, sa oo ina ou iloa na silafia au e Iesu Keriso ma alofa ia te au. Ou te lei vaai i se faaaliga pe faalogo i se leo, ae sa le mafai ona ou iloa le moni ma le paia o Keriso pe ana tu o Ia i o’u luma ma valaau mai i lo’u igoa.
O lenei aafiaga matagofie ma agamalu ua mamanuina ai lo’u olaga. Mai lena aso e oo mai i le asō, o faaiuga taua uma ua ou faia sa tosinaina i lo’u malamalama e uiga i le Faaola. I le aluga o tausaga ma i itu e tele o le lalolagi, ua ou molimau atu ai o Iesu Keriso o le Alo o le Atua, o le Malamalama o le Lalolagi. O se faamanuiaga mo i tatou le o mai ia te Ia, mulimuli ia te Ia, ma lagona Lona malamalama i o tatou olaga.
Malamalama o le Lalolagi
I se tasi po i le tele o tausaga talu ona mavae lena aafiaga faafaifeautalai e le mafaagaloina, sa ma pulatoa ai ma lo’u toalua, o Barbara i le lagi. A o ma faia lena mea, sa ou tepa a’e i luga ma le maofa i le faitau miliona o fetu, lea sa foliga mai sa ese le susulu ma le matagofie i lena po. Na liliu atu ou mafaufauga ma le maofa i fetalaiga a le Alii ia Mose: “Ma e le mafaitaulia lalolagi ua Ou foafoaina; ma sa Ou foafoaina foi i latou mo lo’u lava faamoemoe; ma o lo’u Atalii, o lē o la’u Toatasi na Fanaua, na Ou foafoaina ai i latou” (Mose 1:33
Mai le Faaola na oo mai ai le mana na foafoaina ma e faamalamalamaina le la, masina, fetu, ma le lalolagi (tagai i le Mataupu Faavae ma Feagaiga 88:7–10). E mafai sa’o lava ona Ia folafola mai, “O A’u nei o le malamalama o le lalolagi; o le mulimuli mai ia te au, e le savali o ia i le pouliuli, a e ia te ia le malamalama o le ola” (Ioane 8:12; tagai foi Ioane 9:5).
I upu a Peresitene Dallin H. Oaks, Fesoasoani Muamua i le Au Peresitene Sili, “O Iesu Keriso o le malamalama o le lalolagi aua o ia o le puna o le malamalama lea ‘e susulu atu mai le afioaga o le Atua e faatumulia ai le loaloa o le vateatea’ [Mataupu Faavae ma Feagaiga 88:12].” O le malamalama o le Faaola o le “malamalama moni e faamalamalamaina ai tagata uma o e e o mai i le lalolagi” (Mataupu Faavae ma Feagaiga 93:2; tagai foi i le 84:46). Faatasi ai ma lenei malamalama, e mafai ona tatou iloa le ala e faamasino ai “le lelei mai le leaga” (Moronae 7:16). O lenei malamalama aoao ua lauiloa “o le malamalama o le upumoni,” “o le malamalama o Keriso,” ma “o le Agaga o Keriso” (Mataupu Faavae ma Feagaiga 88:6; 88:7; Moronae 7:16).1
Na faapea mai le Aposetolo o Ioane, “Ua pupula mai foi le malamalama i le pouliuli; ae e lei talia e le pouliuli” (Ioane 1:5). I o tatou aso, o loo galue faasoloatoa Satani e taitai atu fanau a le Atua i le pouliuli, ma tapunia “le malamalama, ma le ola, ma le upumoni o le lalolagi” (Eteru 4:12).
E le mafai ona tatou malamalama atoatoa—pe talisapaia—le Faaola ma Lana talalelei pe a tatou le maua Lona malamalama ma le upumoni. Ae a tatou salamo ma usiusitai, auauna atu, ma tapuai atu ia te Ia, ua tatou faatoilaloina le pogisa. E toe foi mai Lona malamalama ma aveesea ataata o le lalolagi mai lo tatou lotolotoi ma o tatou mafaufau.
Faamanuia e ala i le Malamalama
A oo ina pogisa lo tatou lalolagi ma sili atu ona le mautonu, o le lagonaina o le malamalama o le Alii i o tatou olaga atonu e foliga mai o se luitau. A e sa faamanatu mai ia i tatou e Peresitene Russell M. Nelson, “O le faatupulaia o le pouliuli lea e ō mai faatasi ma puapuaga ua atili susulu malamalama ai le malamalama o Iesu Keriso.”2
Ua ou iloa o Lona malamalama e mumu susulu tele i lo’u agaga pe a ou faaavanoaina se taimi mo mea a le Agaga i taimi filemu ma le toafimalie e pei o lena po faatasi ma Barbara. O le taimi lena e oo mai ai uunaiga faaleagaga, taitaiga, ma le malamalama ia i tatou. O le taimi lena tatou te malamalama ai i le faamanuiaina moni o i tatou i le i ai o se Faaola.
I le avea ai ma malamalama o le Lalolagi, e faamalamalama e le Faaola le ala o la tatou malaga i le olaga nei faatasi ma Ana faataitaiga ma aoaoga (tagai i le Ioane 8:12). Na te faamāmāina a tatou avega i Lona alofa ma le agaalofa (tagai Mataio 11:28–30). Na te faamāmāina o tatou loto i le faamoemoe ma le faamalologa e ala i Lana Togiola (tagai i le Moronae 7:41). Ma Na te faamalamalamaina o tatou mafaufau i “le Agaga o le upumoni” (Mataupu Faavae ma Feagaiga 6:15; tagai foi i le 11:13).
Na saunoa mai Elder David A. Bednar o le Korama a Aposetolo e Toasefululua, “I vaitau uma o o tatou olaga, i tulaga uma tatou te ono fetaiai, ma i luitau taitasi atonu tatou te feagai, o Iesu Keriso o le malamalama lea e aveesea ai le fefe, maua ai le faamautinoaga ma le taitaiga, ma faatupuina ai le filemu ma le olioli tumau.”3
Sa auauna atu Elder Ballard i se misiona i Egelani mai le 1948 i le 1950.
Ia Tuu i Luga Lo Outou Malamalama
O le avanoa e faasoa atu ai le malamalama o le Faaola i isi ma valaaulia i latou e o mai ia te Ia ma lagona Lona alofa mo i latou sa faapitoa lava ia te au i taimi uma. Sa ou fiafia e avea ma se faifeautalai i Egelani. Sa ou fiafia i le avea ai ma se peresitene o le misiona i Kanata. Ma ou te fiafia i lo’u valaauga o i ai nei o se uso o le Korama a Aposetolo e Toasefululua. O lo’u valaauga ou te maua ai avanoa e molimau atu ai ia Iesu Keriso ma faasoa atu le savali o le Toefuataiga i le lalolagi atoa.
I aso anamua, sa ta’u atu ai e le Faaola i Ona soo:
“O outou o le malamalama o le lalolagi outou. E le mafai ona lilo le aai ua tu i luga o le mauga. …
“Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi” (Mataio 5:14,16).
I le nuu o Nifae, na Ia fetalai ai, “Faauta, o au o le malamalama lea e tatau ona outou tuu i luga— mea ia na outou vaai ua ou faia.” Na Ia faaopoopo atu, “Ua outou iloa mea e tatau ona outou faia i la’u ekalesia; ona o galuega na outou vaai na ou faia, o mea ia tou te faia foi” (3 Nifae 18:24; 27:21).
I o tatou aso, e faapena foi ona faamoemoe le Faaola i Ona soo e faaaoga Lona malamalama e “tuliese o le pouliuli mai i totonu o [i tatou]” (Mataupu Faavae ma Feagaiga 50:25). E susulu atu lo tatou malamalama e pei ona tatou alolofa atu e pei ona alofa mai Iesu. E susulu atu lo tatou malamalama a o tatou faasoa atu la tatou molimau o le Toefuataiga ma lo tatou faamoemoe ia Keriso. E susulu atu lo tatou malamalama pe a tatou sii ae o tatou leo i le puipuiga o le upumoni. Ma a o susulu atu lo tatou malamalama, tatou te faatosina atu isi i le puna o lena malamalama.
Tuu atu auaunaga le manatu faapito, ma o le a e lagonaina Lona malamalama i lou loto. Tatalo ma le lotomaualalo mo avanoa e faasoa atu ai le talalelei, ma o le a taialaina oe ia i latou ua saunia e talia Lona malamalama. Alofa i isi i auala laiti ma tetele, ma ua e faia lenei lalolagi ia sili atu ona lelei ma malamalama atili.
Auiliiliga mai le O Iesu Keriso, saunia e Harry Anderson
O Se Malamalama e Le Gata
Ou te faafetai e faavavau mo le aafiaga sa ou maua a o avea au ma se faifeautalai talavou i Egelani ina ua ou iloa mo au lava o Iesu o le Keriso. Ua ou iloa moni lava lenei mea i le asō a o ou oo i le olaga faatasi ai ma ona tofotofoga ma olioliga uma.
O la’u auaunaga i le Ekalesia ua faamanuiaina ai a’u i aafiaga ofoofogia ma faapitoa faaleagaga ua matua tele naua ma o nisi e paia tele e talanoaina. E leai se meaalofa e sili atu ona taua ma pele e mafai ona ou tuuina atu i la’u fanau, fanau a fanau, fanau a fanau a fanau, ma outou, a’u uo i le lalolagi atoa, nai lo la’u molimau mautinoa o Iesu o le Keriso, o le Alo o lo tatou Tama e Faavavau, o le Faaola ma le Togiola o tagata uma.
O lo’u toalua pele, o Barbara, na maliu i le 2018. E maeu lo’u faafetai i le iloa ona o la ma faamauga i le malumalu ma ona o Iesu Keriso, o le a ma toe faatasi ai, ma lo ma aiga, mo le faavavau atoa.
E i ai taimi, ou te vaivai ai. I na taimi, ou te tu ai ma tilotilo i se ata o le Faaola. Ou te mafaufau ia te Ia i Ketesemane, ona faafuasei lea ona ou lē toe lelava. Ou te iloa i lo’u loto ona sa Ia manumalo i le lalolagi, “o loo mavae atu le pouliuli, a ua pupula mai nei lava le malamalama moni” (1 Ioane 2:8).
Ou te iloa o loo soifua Iesu Keriso. “O Ia … o se malamalama e le gata, e le mafai lava ona faapouliuligia” (Mosaea 16:9). O Ia o lo tatou malamalama, o lo tatou ola, ma lo tatou ala—ananafi, i le asō, ma le faavavau. Tau ina ia tatou tutumau i le mulimuli atu ia te Ia ma faasusulu atu Lona malamalama i luma o le lalolagi.