Pe a Oo Mai Gasegase Tumau Ia Te Oe

Saunia e Norman C. Hill

O le taulimaina o faigata i lea aso ma lea aso e mafai ona fesoasoani ia i tatou e tuputupu ae ai i le agaalofa, lagona alofa, ma le vave toe malosi.

lima o se tasi tagata o loo uuina le lima o se isi tagata

A o lei maliu o ia mai se faama’i matautia, sa masani ona ataata lo’u tina ma fai mai, “E leai se tasi o i tatou e alu ese atu ma iinei o ola, o le mea lea e tatau ai ona tatou faia le mea sili o mea ua tatou maua.”

O ona aso lelei na. Ma i lona olaga, sa tele ona aso lelei.

Ae sa i ai foi ni ona aso sa le lelei tele. I na aso sa ia fai mai ai, “Faaaoga le mea e oo mai i lou ala ma vaai pe mafai lava ona e faia ni mea lelei i le lalolagi.”

I le lalolagi atoa, ua sili atu le umi o ola o tagata nai lo le taimi ua tuanai.¹ Ae e ui o loo tatou ola umi, ae o le a sili atu foi ona tatou maua i se faama’i tumau: mai suka, ma’i tetete [Parkinson], kanesa, faanoanoa, Galonimo, ma faaauau pea le lisi. O lea la, pe a oo mai gasegase tumau i lou olaga, e tatau faapefea ona e tali atu?

Agai i Luma i le Faatuatua

“Faasaga atu i le musika, e tusa lava pe e te le iloa le fati,” o le tala lea a se uso na faamalosia e ave aso malolo o manaoga faapitoa a o toe foi atu lona toalua i le galuega e tausi ai lo latou aiga. E talitonu o ia e masani ona tatou faailoa atu se foliga fiafia lea e taofia ai i tatou mai le faagasoloina o o tatou lagona po o le faaleleia o la tatou vaaiga. “Nai lo o le agai i luma ma le faatuatua, tatou te tautevateva a o tatou faatalitali mo se vavega po o se muimui pe a le oo mai se mea,” o lana tala lea. Na te taulimaina e ala i le faalogologo i tusitusiga paia ma lauga o konafesi aoao ma e ala i le asiasi atu i uo ma aiga i luga o le telefoni.

“O le tulaga masani o aso taitasi e mafai ona tosoina au i lalo,” o le tala lea a se tuafafine o lona toalua ua leva ona ma’i. “O le a le lelei lava le soifua maloloina o lou toalua. Ou te taliaina lena mea. Ae o le faigata o galuega fai soo masani uma, o le vaivai e oo mai faalemafaufau, faaletino ma le faaleagaga.” Na te talisapaia asiasiga mai uso o auaunaga. “Pe a latou o mai e faamalamalamaina moni lava lo’u aso.”

“O nisi taimi, e galo ai ia i ma’ua ma lo’u toalua ni mea ma lē fiafia ai le tasi ma le isi,” o le tala lea a se isi uso ua matua. “Ma te lagona le le fiafia i le galogalo o mea, ae maise lava le faanoanoa mulimuli ane ona o upu ita e ma te fai atua i le tasi ma le isi.” Ua la aoao e tusi ni faamatalaga e fesoasoani ai ia i laua ia manatua. La te faatagaina le tasi ma le isi e faaalu se taimi e faatoafilemu ai a o lei fai atua se tala. “Ma,” na ia fai mai, “ua ma aoao atili i le taua o le faapea atu, ‘Faafetai lava,’ ma le ‘Ou te alofa ia te oe.’”

O le isi ulugalii matutua sa gafatia le ola ai i se tupe maua tumau seia oo ina faaluaina le tau o a la’ua vai. Faafetai i tagata o le aiga ma le latou uarota, sa taulimaina o la manaoga. “I le taimi muamua sa ma maasiasi e fesili atu mo se fesoasoani, aemaise lava mai le ma fanau,” o le tala lea a le uso. “Ae sa naunau tagata uma e fesoasoani.”

Auiliiliga mai le Sa Ia Faamaloloina le Tele o Faama’i Eseese, saunia e J. Kirk Richards, e le mafai ona kopiina

Fautuaga ma Matauga

O nisi nei o fautuaga ma matauga mai ia i latou o e feagai ma gasegase tumau:

O i latou e liliu atu i le Faaola o le a maua le faamoemoe. “Sa ou manatu e leai se tasi e mafai ona malamalama i le mea ua ou oo i ai,” o le tala lea a se uso e i ai le vaivai tumau o le malosi (CFS). “Ona oo lea i se tasi Aso Sa a o ou tagofia le faamanatuga, sa ou iloa ai sa malamalama le Faaola i o’u mafatiaga. Sa ou iloa e mafai ona ou onosaia e ala i le faalatalata atu ia te Ia.” (Tagai i le Alema 7:11–12; Mataupu Faavae ma Feagaiga 121:8; 122:8.)
E faateleina le agaalofa ia i latou o e “onosaia lelei” (Mataupu Faavae ma Feagaiga 121:8). “O ai tatou te vaavaai atu i ai, i aso o le faanoanoa ma faalavelave, mo se fesoasoani ma se faamafanafanaga? … O i latou o ni alii ma tamaitai o e sa puapuagatia, ma mai lo latou aafiaga i mafatiaga, e latou te aumaia ai le tamaoaiga o lo latou lotofaavauvau ma faamaisega e avea o se faamanuiaga ia i latou ua manaomia i le taimi nei. Pe mafai ea ona latou faia o lenei mea pe ana faapea latou te lei mafatia i latou lava?”²
Ia faasolosolo lelei i le tasi le aso i le taimi. “I ni nai tausaga ua mavae, sa matuia tele le tiga sa ou le iloa pe mafai faapefea ona ou gafatiaina. Sa amata ona oo mai lagona ole pule i le ola,” o le tala lea a se tuafafine o loo mafatia i le mai o le mafaufau (MS). Sa alu atu o ia i le iunite o le soifua maloloina faalemafaufau i se falemai. I le taimi o le faatalatalanoaga, o lana mau tauave sa le na o le “tumau e oo i le iuga” (1 Nifae 22:31) ae nai lo lena ia “tumau e oo i le iuga o le aso.”
Atiina ae ni mea fou e fiafia i ai ma saili ni auala fou e auauna atu ai. Nai lo le faavauvau i mea e le mafai ona e toe faia, ia maua ni fiafiaga fou. Sa iloa e se tuafafine e i ai le MS lona le mafai ona faia ni mea sa ia fiafia i ai muamua, e pei o le tietie solofanua po o le sofipolo. Nai lo lena, sa ia aoaoina le tusitusi teuteu (calligraphy). I le taimi nei ua ia faaaogaina lana taleni fou na atiae e fatu ai ni tusitusiga ua faamalamalamaina o le Tusi a Mamona mo lona aiga.

A oo ina avea faama’i tumau ma se mea moni o le olaga, e moni lava o se luitau. Ae faatasi ai ma le faatuatua, faamoemoe ia Keriso, ma se manao e faaauau pea ona auauna atu, o le taulimaina o faigata i lea aso ma lea aso e mafai ona fesoasoani ia i tatou e tuputupu ae ai i le agaalofa, lagona alofa, ma le maufetuunai.

E alala le tusitala i Iuta, ISA.