“O Fea Na E I Ai?,” Liahona, Ian. 2023.
O Leo o le Au Paia o Aso e Gata Ai
O Fea Na E I Ai?
Sa tatau ona ou taliaina le taimi ma faamoemoega o le Atua a o ou aoao e alofa i lo’u tinamatua e pei ona alolofa le Tama Faalelagi ma Iesu Keriso ia te ia.
E ui i le gasegase o Tinamatua, o mea uma na te faia mo au ona e alofa o ia ia te au.
Ata pue mai faaaloaloga a le tusitala
“O fea na e i ai, la’u tama?” sa fesili mai ai lo’u tinamatua a o ia tali mai i lo’u tuitui atu i lona faitotoa. Faatoa ou foi mai mai la’u misiona i El Salvador. Sa faatumulia mata o Tinamatua i le olioli i le toe vaai mai ia te au. Sa faalogoina le vaivai ma le mafanafana o ona lima a o ia opoina lo’u ua.
Sa fai se ma talanoaga malie a o ou taliina ana fesili e uiga i la’u misiona. Sa ootia o’u lagona a o ou ta’u atu ia te ia e uiga i tagata, meaai, galuega faigata, ma vavega o la’u misiona. Ina ua uma, sa faafuasei ona filemu o ia. Ona ia fesili mai lea, “O fea na e i ai, la’u tama?”
O le mea moni, sa lei faalogo o ia. O lea, na ma toe amataina ai le ma talanoaga. E lei atoa le 20 minute mulimuli ane, ae ia fesili mo le taimi lona tolu, “O fea sa e i ai, la’u tama?”
Sa i ai se mea na matuai faaletonu. E lei leva ae ou iloaina pe a ma se tausaga talu ona ou alu i la’u misiona, ae maua lo’u tinamatua i le faamai o le Galonimo.
Sa ou lagonaina se naunautaiga tele e fesoasoani ia Tinamatua. Mo le lua tausaga, sa ou talai atu ai le alofa o le Atua mo Ana fanau. O lea la ua ou maua se avanoa e ola ai i na aoaoga. E ui ina sa ou iloaina o le a faigata, ae sa ou ofo atu e nonofo faatasi ma ia ina ia mafai ona ou fesoasoani ia te ia.
O nai masina muamua sa sili ona faigata. E pei ona i ai i le galuega faamisiona, o le i ai o le onosai ma le puleaina o le le fiafia na avea ma se galuega atoa. Ma i le taimi o la’u misiona, sa tatau ona ou taliaina le taimi ma faamoemoega o le Atua a o ou aoao e alofa i lo’u tinamatua e pei ona alofa le Tama Faalelagi ma Iesu Keriso ia te ia.
O le nonofo faatasi ma Tinamatua e pei lava o le nonofo faatasi ma ni tagata eseese se toatolu. O nisi taimi e le mafai ona ia gafatia se isi tagata i totonu o le fale. O nisi taimi e manao o ia i la’u tausiga ma le gauai, fiafia e le o tuua na o ia. O nisi taimi pau lava le mea e mafai ona ia mafaufau i ai o le mea lea e fafaga ai le atalii o lana tama lea faatoa foi mai lana misiona. “Aua e te faia le mea lena!” e mafai ona vave avea ma “Aisea e te le faia ai le mea lena?”
Ae ui i lea, o lo’u tinamatua, sa avea ma se faamanuiaga sili ia te a’u. Ou te iloa e ui lava i lona gasegase, o mea uma na te faia mo au ona e alofa o ia ia te au.
O upu aupito matagofie ma faamaoni a lo’u tinamatua e oo mai i taimi uma ou te toe foi mai ai i le fale mai le aoga po o le galuega. Faatasi ai ma se vaaiga agamalu, sa ia opoina au, sogi i o’u alafau, ma fesili mai ma le alofa, “O fea na e i ai, la’u tama?”