Saunia Lou Eleele Faaleagaga

Saunia e Uso Milton Camargo

Fesoasoani Muamua i le Au Peresitene Aoao o le Aoga Sa

O le faataoto i le lulu saito e mafai ona fesoasoani ia i tatou e saunia ai mo la tatou suesuega o le Sau, Mulimuli Mai ia te A’u o le Feagaiga Fou i lenei tausaga.

O se tasi o faataoto e sili ona ou fiafia i ai i le Feagaiga Fou o le faataoto i le lulu saito, e pei ona maua i le Mataio 13:3–23 (tagai foi i le Mareko 4:3–20; Luka 8:5–15). I lenei faataoto, o auala e maua ai e tagata le upu (o le fatu) e faatusatusa i ituaiga eleele eseese. Ua tatou aoao o eleele taitasi e i ai se uiga taua, a le o le lelei po o le leaga.

E masani ona tatou faitau i lenei faataoto ma mafaufau faapea o loo faamatalaina ai le naunau o tagata e talia ma ola i le talalelei. E ui e moni lenei mea, ae ou te manatu o le faataoto e mafai foi ona faamatalaina a tatou lava alualu i luma faaletagata lava ia a o tatou tuputupu ae i le faatuatua ma le malamalama o le talalelei. I se isi faaupuga, e le o lokaina pea i tatou i se ituaiga po o se tulaga patino o le talitonuga. E mafai, faatasi ai ma le faatuatua ma taumafaiga, ona faaleleia lo tatou eleele faaleagaga ina ia fua mai ai ni fua e sili atu.

Ou te fia iloiloina lenei manatu faatasi ma outou aua ua fesoasoani lea ia te a’u ia ou malamalama ai i lenei faataoto i se auala loloto atu. Ou te talitonu a o tatou sauniuni mo la tatou suesuega o le Feagaiga Fou Sau, Mulimuli Mai ia te A’u i le tausaga a sau, e mafai ona fesoasoani se iloiloga o le faataoto i le lulu saito e saunia ai o tatou loto ia maua upumoni o le talalelei.

Mauaina o Fatu o le Talalelei

I le faataoto, ua tatou aoao ai e faapea a o lulu e le lulu saito:

O nisi fatu na pauu i tafatafa o le auala, ma sa ’aia i latou e manulele.
O nisi na pauu i luga o nofoaga maamaa. Sa latou totogo ae sa mu i le la.
Sa pauu nisi i laau tuitui, ma sa fetinaiina i latou e mea matuitui.
Sa pauu nisi i le eleele lelei, ona fua tele mai lea.

Ua faamalamalama mai e le Alii:

“A faalogo se tasi i upu o le malo, ae le lagona, ona alu ane ai lea o le ua leaga, ua fao le mea sa luluina i lona loto.” O le mea lea sa luluina i le auala.

“A o le mea sa luluina i le mea papa, o le tagata lea ua faalogo i le upu, ona talia loa lea ma le fiafia;

“A ua leai ni aa ia te ia, ua faaletumau ia; aua pe a tupu le puapuaga, po o sauaga ona o le upu, ona tausuai loa lea o ia.

“O le mea sa luluina i le vao tuitui o ia lea ua faalogo i le upu, a o le loto popole i mea a lenei lalolagi lalolagi, ma le pepelo o le oa ua fetinaiina ai le upu, ona le fua mai lava lea.

“A o le mea sa luluina i le eleele lelei, o ia lea ua faalogo i le upu, ma lagona ai; ua fua mai lava ia, e taiselau i nisi, e tai onogafulu i nisi, e taitolugafulu foi i nisi” (Mataio 13:19–23; ua faaopoopo le faamamafa).

Sei o tatou vaavaai i ituaiga eleele taitasi ma vaai po o le a se mea e mafai ona fai e faaleleia ai.

Ata na tusia e David Green

Eleele i Tafatafa o le ala

Na saunoa mai Peresitene Dallin H. Oaks, Fesoasoani Muamua i le Au Peresitene Sili: “O fatu na ‘pau … i le auala’ (Mareko 4:4) e lei oo i le eleele faaletino lea atonu latou te ono tutupu ae ai. Ua latou peiseai o aoaoga e pau i luga o se loto ua maaa pe le o saunia.”¹

Ma le isi, o nisi taimi tatou te le malamalama i mea tatou te faalogo i ai pe faitau i ai i tusitusiga paia ona e le o saunia o tatou loto. Afai o le tulaga lena, o le a le mea e tatau ona tatou faia?

E mafai ona tatou sailia se faamalamalamaga mai ia i latou o e malamalama. Atonu tatou te fesili atu i faifeautalai, lo tatou faiaoga o le Aoga Sa, lo tatou taitai perisitua po o le faalapotopotoga, lo tatou faiaoga seminare po o le inisitituti, i latou o e auauna mai ia i tatou, po o o tatou matua faamaoni ma tagata o aiga. E mafai ona tatou suesue i saunoaga o le konafesi aoao. O le polokalama o le Gospel Library app ua tuuina mai ai le tele o punaoa e mafai ona fesoasoani ia i tatou e saili atili ai le malamalama.

E tatau foi ona tatou tatalo ma ole atu i le Atua mo nisi malamalama. Afai e faamaoni o tatou loto, e moni lo tatou faamoemoega, ma e tatou te faatuatua ia Keriso, o le a tatou maua le malamalama i upumoni o le talalelei (tagai i le Moronae 10:4–5). Na fetalai le Alii:

“Ole atu, ma o le a to mai ia te outou; saili, ma o le a outou maua; tuitui atu, ma o le a tatala mai ia te outou.

“Aua o i latou uma e ole atu, e to mai i ai; ma o ia o le e saili, e maua e ia; ma o le e tuitui atu, o le a tatala mai ia te ia” (3 Nifae 14:7–8).

Eleele i Nofoaga Maa

O nisi tagata e faalogo i le talalelei toefuataiina e ala i faifeautalai, lagonaina le alofa o Keriso, ma auai ma fiafia i sauniga a le Ekalesia. Peitai, i le aluga o taimi, e faaauau pea faigata o le olaga. Ua latou iloa e lei suia le olaga i se tafe mai o faamanuiaga e le muta. E faaitiitia lo latou faatuatua ma latou o ese atu ai.

O nisi foi e vaai i “nofoaga ma’a” pe a latou auai i se fonotaga po o se konafesi ma lagona le musuia e faia mea uma i le taimi lava lena. Ae i le Aso Gafua, latou te toe foi atu i o latou tiutetauave masani. O luitau i le galuega e tumau le faigata. O faaosoosoga e foliga mai e lofituina le manaia. Ma o lo latou manao ia faaleleia faaleagaga e faaitiitia pe mou ese atu.

Latou te aoaoina le auala faigata e faapea, a aunoa ma ni aa faaleagaga loloto e taofia ai i matou i le matagi, fafaga i matou pe a matou fiaaai, pe faamālū i matou pe a vevela le la, e mafai ona matou fano faaleagaga.

E mafai faapefea ona tatou faaleleia eleele ma’a? Aveese maa ma faaloloto o tatou aa faaleagaga.

O le aveesea o maa e ono luitauina. Atonu e manaomia ai le fatuina o se siosiomaga lea e uunaia ai le faatuatua. Atonu e manaomia ai le faatuina o ni faigauo fou ma le aloese mai foliga leaga (tagai i le 1 Tesalonia 5:22).

Ina ia maua le malosi e aveese ai maa, tatou te manaomia le fesoasoani a le Faaola. E oo mai lena mea pe a tatou taliaina feagaiga ua Ia ofoina mai. E amata lenei mea i le taliaina o le valaaulia ina ia papatisoina. O lona uiga o le faamauina ma le mauaina o le meaalofa o le Agaga Paia. O lona uiga o le taliaina o soo se feagaiga tatou te le o maua lava, e pei o le mauaina o le perisitua po o le o i le malumalu. O lona uiga o le auai i le lotu ma le faafouina o feagaiga e ala i le tagofia o le faamanatuga i vaiaso taitasi.

A oo mai tofotofoga ma faaosoosoga, e mafai ona tatou pipiimau i feagaiga na tatou osia ma le Alii. “Ua fusia mausali i tatou ma faatasi ai ma le Faaola pe a tatou manatua ma le faamaoni ma faia le mea sili tatou te mafaia e ola ai e tusa ai ma matafaioi ua tatou taliaina,” na saunoa ai Elder David A. Bednar o le Korama a Aposetolo e Toasefululua. “Ma o lena noataga faatasi ma Ia o le puna lea o le malosi faaleagaga i vaitau uma o o tatou olaga.”²

Eleele i le Vao tuitui

O lenei eleele e mafai ai ona ola laau, e aofia ai vao tuitui. O vao tuitui o “mea e popole ai ma oloa ma mea faafiafia o le olaga nei” lea e mafai ona mafua ai ona tatou “le oo lea ina matua o latou fua” (Luka 8:14).

O le a le mea e tupu pe a tatou taliaina feagaiga ae le toe savavali i le ala o feagaiga? Pe tatou te aai ma feinu i le faamanatuga ae tatou te le ole atu mo se faamagaloga, ona tatou te le toe mafaufau i a tatou mea sese. Pe atonu tatou te ole atu mo se faamagaloga ae mumusu e faamagalo atu i isi. Tatou te taliaina feagaiga o le malumalu ae le auauna atu ia i latou e le tagolima. Tatou te tuuese avanoa e faasoa atu ai le talalelei aua tatou te fefefe ina nei foliga le talafeagai pe maasiasi, pe ona ua tatou le toe iloa le tala e fai atu.

O le vaifofo o le ola ai i le feagaiga na tatou osia ina ua papatisoina i tatou, “ia faanoanoa faatasi ma e e faanoanoa; … [e] faamafanafana atu ia te i latou o e e manaomia le faamafanafanaga, ma tutu o ni molimau a le Atua i taimi uma ma i mea uma, ma i nofoaga uma atonu tatou te i ai, seia oo lava i le oti” (Mosaea 18:9).

Tatou te aveesea vao pe a tatou salamo i aso uma, faia ni fetuunaiga laiti pe tetele, ma toe foi atu i le ala sao ma le vaapiapi o le feagaiga.

Tatou te mumusu e tuu atu i vao o le olaga e fetinaiina i tatou. Tatou te faia lenei mea e ala i le liua o o tatou aiga i ni malu o le faatuatua. Tatou te saili atu i soo se mea e valaaulia ai le uunaiga a le Agaga. Tatou te teena soo se mea e aveesea ai lena faatosinaga. Ma tatou te auauna atu i le malo o le Atua—i o tatou valaauga, i le malumalu, i le galuega faafaifeautalai, i o tatou aiga.

O Le Eleele Lelei

E toatele e faalogo i le upu, malamalama i ai, ma tuputupu ae i o latou loto. Ua fetalai mai le Alii ia i latou, “Ua filifilia outou e a’u, ua ou tuuina atu foi outou, ia outou o ma ia outou fua mai ni fua, ma ia tumau o outou fua” (Ioane 15:16). Mo na tagata, o le tali o le agai i luma ma le faatuatua ma tumau i galuega lelei.

Sa fesili atu Peresitene Oaks, “O le a la le tatou mea e fai i aoaoga a le Faaola a o tatou ola ai i o tatou olaga?”³ O le tausaga lenei, a o tatou sauni e suesue i le Feagaiga Fou, tau ina ia tatou faalatalata atu i le Faaola ma faaleleia atili lo tatou eleele faaleagaga ina ia mafai ai ona tatou maua le upu. Ona mafai lea ona tatou aumaia fua ua Ia poloaiina ai i tatou e aumaia e ala i le taliaina ma le faafouina o feagaiga e fusia ai i tatou ia te Ia, e ala i le auauna atu i le Atua ma alofa i o tatou tuaoi, ma e ala i le alualu i luma i luga o le ala o feagaiga lea o le a i ai se aso e toe aumaia ai i tatou i lo tatou aiga faalelagi.