Mo Matua

O Aiga ma le Malamalama o le Lalolagi

Matua Pelē,

O le aiga o se vaega taua o le fuafuaga o le fiafia a le Tama Faalelagi mo Ana fanau. O tusiga i le lomiga o lenei masina e mafai ona fesoasoani ia te oe e faaleleia ai fesootaiga i totonu o aiga ma fesoasoani ai e faatautaia luitau i mafutaga faaleaiga. E mafai foi ona e faaaogaina lenei lomiga e fesoasoani ia te oe e aoao ai tamaiti i nisi o lesona taua mai le Feagaiga Fou.

Talanoaga o le Talalelei

O Iesu Keriso o lo Tatou Malamalama Moni

Faasoa atu i lou aiga nisi o aoaoga mai le tusiga a Peresitene Ballard o loo i le itulau 4 e uiga i le matafaioi a Iesu Keriso o le Malamalama o le Lalolagi. I le avea ai o se aiga, fai se lisi o punavai eseese o le malamalama i lou fale ma talanoaina mea eseese e faia e le malamalama mo i tatou. O a ni auala e fesoasoani ai Iesu Keriso, o le punavai sili o le malamalama faaleagaga, ia i tatou?

Fesootaiga Tatala i Aiga

E taua le saunia faaleagaga mo luitau o le olaga. I le itulau 12, faitau i ni fautuaga mai se faufautua o le soifua maloloina faalemafaufau i le auala e maua ai ni talanoaga taua, ma faamalosiau ma lau fanau. O fea o nei manatu ma fautuaga e mafai ona e faatinoina ma lou lava aiga?

Sauniaina o o Tatou Loto mo le Upu

Faitau le tusiga a Uso Camargo o loo i le itulau 38 e uiga i le faataoto i le lulu saito. Talanoa ma lou aiga po o a ituaiga eleele eseese i le faataoto e faatusa i ai. E mafai e tamaiti laiti ona tusi ni mea mai le faataoto ma talanoa e uiga i ai, ma e mafai e tamaiti matutua atu ona faitau le faataoto i le Mareko 4:3–20 ma faasoa mai o latou manatu po o fesili.

Mea Malie Faaleaiga i leSau, Mulimuli Mai ia te A’u

Faia o Mea Faigata ma le Fesoasoani a le Atua

E pei o Maria ma lona tausoga o Elisapeta i le Feagaiga Fou (tagai i le Luka 1:5–55), o nisi taimi e talosagaina ai i tatou e fai ni mea faigata ma atonu e taumanatunatu pe mafai ona tatou faia.

1. Seti se koneteina avanoa, e pei o se pakete po o se pusa, i le tasi pito o le potu.

2. Tuu atu i tagata taitoatasi o le aiga se fulumanu.

3. Amata i le pito faafeagai o le potu mai le koneteina, fai atu i tagata taitoatasi o le aiga e taumafai e faaoo atu a latou fulumanu i totonu o le koneteina e ala i le feulaina ina ia taofia ai i le ea ao latou sopoia le potu.

4. Ina ia faia ia sili atu ona faigata, faataga na o le 30 sekone, ma faaaoga se ’aputi’e [straw] e feula ai le ea i luga o le fulumanu. Faaauau pea ona faaitiitia le taimi atofaina seia oo ina le gafatia le gaoioiga.

Talanoaga: Ia manatua o nisi o luitau atonu e le foiaina i lenei olaga, faasoa mai se aafiaga na faamalosia ai lau molimau faapea “o mea e le mafaia e tagata e mafaia e le Atua” (Luka 18:27) O a ni laasaga laiti e mafai ona e faia i aso taitasi e ausia ai galuega i lou olaga e foliga mai e le mafai?

Na auina mai e Lisa Thomas

Mai le Mekasini Mo Le Malosi o le Autalavou

Maua le Malamalama o Keriso ma Faasoa Atu

Ua aoao e Peresitene M. Russell Ballard le autalavou i le auala e mafai ona latou maua atili ai le malamalama o Iesu Keriso i o latou olaga ma le auala e mafai ona latou faasoa atu ai i isi.

Fesoasoani mo e na Sao Mai i le Sauaga Faatautala

Tagai po o a punaoa ma le lagolago o loo maua e fesoasoani e aumaia ai le faamoemoe ma le faamalologa ia i latou o e na sao mai le sauaga faatautala.

Taulimaina o Fesili ma Masalosaloga

Ua tuuina atu e Uso Jan E. Newman i le autalavou nisi o fautuaga aoga pe a latou lagonaina le siosiomia e le pogisa ona o fesili faigata ma le masalosalo.

E Mafaia Mea Uma i le Atua

Vaai pe faapefea ona faatino e le Atua vavega mo i tatou—i aso anamua ma aso nei.

Mai le Mekasini o le Uo

O Iesu o Lo Tatou Malamalama

Faitau se savali mai ia Peresitene Dallin H. Oaks e uiga i le auala o loo avea ai Iesu ma Malamalama o le Lalolagi. Ona faamaea lea o se gaoioiga faafetaui o mau.

Siata mo le Faitauina o Tusitusiga Paia

Faaaoga le siata lenei e suesue ai tusitusiga paia ma lau fanau i le tausaga atoa.

Mulimuli ia Iesu i Egelani

O masina taitasi i lenei tausaga, feiloai atu i se uo fou mai se atunuu ese ma aoao pe o faapefea ona latou mulimuli ia Iesu i le mea o loo latou nonofo ai.