O Le A Le Misiona ma le Galuega a Keriso?

Na osifeagaiga Iesu Keriso i le muai olaga e afio mai i le Lalolagi ma avea ma o tatou Faaola (tagai i le Mose 4:2; Aperaamo 3:27). I le avea ai ma o tatou Faaola, sa Ia faataunuuina uma Lana misiona ma Lana galuega.

Sa faamalamalama mai e Peresitene Russell M. Nelson: “O le misiona a le Alii i le olaga nei o le faataunuuina lea o le Togiola … [ma] ia faia le ola e faavavau o se avanoa mo soo se tasi o le a agavaa mo lena mea. … O Lana galuega o isi mea uma sa Ia faia—o Ana vavega, o Ana aoaoga, Lona alofa, o Lona taulai atu i sauniga, o Ana aoaoga ia i tatou i le ala e tatalo ai.”¹

O vaega o le misiona ma le galuega a Keriso o loo faamatalaina i le tele o nofoaga i tusitusiga paia. Vaai i faamatalaga na tuuina mai e Lona tina, o Maria, i le Luka 1:46–55. O Hana, o se faataitaiga foi o le gauai atu, na ofoina atu se tatalo faapena e uiga i le galuega a le Alii i le 1 Samuelu 2:1–10.

E pei ona fautuaina mai e le tusi lesona o le Sau, Mulimuli Mai ia te A’u e mafai ona e faatusatusaina nei mea i Faaamuia a Iesu i le Mataio 5:3–12.²

Mafaufau e lisi nisi o vaega o le galuega a Keriso o loo faamatala mai e nei mau; o se tasi o vaega ua lisiina o se faataitaiga:

Na afio mai Keriso e fesoasoani e faamalie lo tatou matelaina faaleagaga (tagai i le 1 Samuelu 2:5; Luka 1:53; Mataio 5:6).