O Aiga E Faavavau

O le aiga o le iunite faavae lea o le sosaiete ma le Ekalesia. E talitonu tagata o Le Ekalesia a Iesu Keriso o le Au Paia o Aso e Gata Ai e faapea e mafai ona faavavau aiga. Tatou te galulue e faamalolosia o tatou aiga i le lalolagi. E i ai foi lo tatou faatuatua e mafai ona tatou maua le faamanuiaga o se aiga e faavavau.

O Le Aiga o le Atua

O tagata uma o atalii agaga po o afafine agaga a ni matua faalelagi. O i tatou uma o le vaega o le aiga o le Atua. E ia i tatou uma se natura ma se taunuuga paia. Afai tatou te ola amiotonu, e mafai ona tatou toe foi atu e mau faatasi ma lo tatou Tama Faalelagi o se vaega o Lona aiga e faavavau.

Ata o le faaipoipoga na pueina e Joseph Kaluba

O Aiga e Faavavau

A faaipoipo se alii ma se tamaitai i le malumalu ma tausia a la feagaiga, o le a tumau le la faaipoipoga mo le faavavau. O lenei sauniga o le malumalu ua taua o se faamauga. O fanau e fananau mai pe a uma ona faamauina o latou matua e fananau mai i totonu o lena feagaiga. O fanau e fananau a o lei faamauina o latou matua e mafai ona faamauina ia i latou i totonu o le malumalu ina ia mafai ona avea i latou o se aiga e faavavau. E fai e tagata o le Ekalesia ia galuega o talafaasolopito o aiga ma le malumalu ina ia mafai ai ona latou faamauina faatasi o latou aiga i augatupulaga uma. O le faamanuiaga o se aiga e faavavau ua mafai ona o Iesu Keriso ma Lana Togiola.

Faaipoipoga

O le faaipoipoga i le va o se alii ma se tamaitai ua faauuina e le Atua. Ua aoaoina e le talalelei a Iesu Keriso tane ma ava ina ia faamaoni le tasi i le isi ma faamaoni ia latou feagaiga o le faaipoipoga. E tatau ia i latou ona tumau i le moni i mafaufauga, upu, ma galuega. O le faaipoipoga o se paaga tutusa, ma e tatau i taitoalua ona uunaia, faamafanafana, ma fesoasoani le tasi i le isi.

Matua ma Fanau

Na poloaiina e le Atua ia Atamu ma Eva ia fanafanau. Ua aoao mai taitai o le Ekalesia o loo faamalosia pea lenei poloaiga. E galulue faatasi tina ma tama e tausi a latou fanau i le alofa ma le amiotonu (tagai i le Mataupu Faavae ma Feagaiga 68:25–28). E aoaoina fanau ia ava ma usiusitai i o latou matua (tagai i le Esoto 20:12).

Aoao Atu ma le Aoao Mai

E aoao e matua a latou fanau ia alolofa i le Atua ma usitai i Ana poloaiga. O le olaga faaleaiga tatou te maua ai avanoa e lagona ai le olioli ma aoao ai le onosai ma le le manatu faapito. O nei uiga e fesoasoani e avea atili ai i tatou e pei o le Atua ma saunia ai i tatou ia ola fiafia o ni aiga i le faavavau atoa.

Faamalolosia o Aiga

E manaomia ai le galue, tuuto, ma le onosai e fausia ai se aiga faamanuiaina. O mataupu faavae o le talalelei e pei o le faatuatua, tatalo, faamagaloga, alofa, galue, ma le fiafia lelei e mafai ona fesoasoani ia i tatou e maua ai le olioli i le olaga faaleaiga. E mafai foi ona tatou maua faaaliga faaletagata lava ia e iloa ai pe faapefea ona faamalolosia o tatou aiga.

Ata o Keriso, saunia e Heinrich Hofmann

O Faamanuiaga e Avanoa i Tagata Uma

E le o tagata uma e maua le avanoa e avea ai ma se vaega o se aiga lelei iinei i le lalolagi. Ae ua folafola mai e le Atua o tagata uma o e tausia Ana poloaiga o le a maua faamanuiaga uma o se aiga e faavavau. E mafai ona tatou faalagolago ia te Ia ma faatuatua i Lana taimi.