“O Le Gagana a le Agaga,” Liahona, Ian. 2023.
O Leo o le Au Paia o Aso e Gata Ai
O le Gagana a le Agaga
Sa ou aoaoina e mafai e le Agaga ona fesoasoani ia i tatou e fesootai atu le alofa o le Tama Faalelagi, e tusa lava pe tatou te lagonaina le le atoatoa.
Ata pue mai le faaaloaloga a le tusitala; ata na tusia e Jennifer M. Potter
Ata na tusia e Jennifer M. Potter
Sa masani ona ou faaaluina taumafanafana e malaga ai i Europa ma se au siva. Sa eseese tulaga o a matou aumaimoa, faafiafiaga, ma le malosi, ae sa i ai se tu masani e tasi sa tumau pea i taimi uma: sa matou tapunia uma faaaliga e ala i le usuina o le “Tu Ieova i lo Tatou Va”1 i le gagana o le atunuu sa matou asiasi i ai. Ona o le toatele o la’u au siva e auai i Le Ekalesia a Iesu Keriso o le Au Paia o Aso e Gata Ai, sa matou fiafia i lenei tu masani. O se auala matagofie e fesootai ai ma a matou aumaimoa ma faasoa atu le alofa o le Tama Faalelagi.
Ina ua lata i le faaiuga o se tasi o nei malaga, sa faatoa matou sopoia le tuaoi i Siamani ma sa matou faataitaia le pese i le faaSiamani mo faatinoga o loo loma. Ae ina ua taunuu atu, sa matou iloa ai o lenei itulagi faapitoa o Siamani na tautatala i le faa-Sorbian, o se gagana sa itiiti se foliga na i ai i le pese sa matou faatinoina ma le faamaoni.
I le tietie ai i le pasi i la matou faafiafiaga, sa ou lagona le vaivai ma na ona ou manao lava e moe mo le taimi atoa o le malaga. Ae sa i ai isi manatu o a matou faatonu. Sa latou talosagaina a matou taiala e faaliliu le viiga i le Sorbian. O lea la ua latou mananao i le pasi atoa o tagata faafiafia ua faagalegale momoe e aoao le pese i ni nai itula a o lei faia le matou faafiafiaga.
Sa matou faia le mea sili matou te mafaia. I le faaiuga o le faaaliga, sa matou tutu faatasi i luma o le tulaga ma amata ona pepese. Ou te manatua lo’u lagonaina o le faateia ona o upu sa tau memumemu i ni nai itula na muamua atu sa faigofie ona oo mai i lo’u mafaufau. Sa ou lagonaina ou masalosaloga muamua e uiga i lo matou saunia ua mou atu a o ou faalagolago i le Agaga e faamanatu mai ia te au upu.
Ina ua uma ona matou sisiva ma amata ona pepese, sa aumaia e le Agaga upu o le pese i lo’u mafaufau.
Ata pue mai faaaloaloga a le tusitala
Sa foliga faateia tagata o le aofia ona faagaeetia ai lea. Ina ua uma le pese, sa o’o ifo se filemu i luga o le aofia. Ona latou tutu lea ma amata ona usu mai se pese ia i matou, lea na latou faamatalaina mulimuli ane o se pese o le lotofaafetai e masani ona latou faaleoleo mo ni taimi faapitoa.
Sa ou lagonaina le malosi tele o le Agaga i lena taimi, e ui lava sa le mafai ona ou malamalama i mea sa latou usuina. Sa ou matuai faafetai lava ona sa fesoasoani mai le Alii ia te au e fesootai atu Lona alofa e ui lava i ou lagona o le le atoatoa. Sa faamanatu mai ia te au o le alofa o le Tama Faalelagi o se savali aoao. E ui lava i soo se eseesega tatou te ono maua, e mafai e i tatou uma ona malamalama i le gagana a le Agaga.