2023
Auauna Atu ma le Malamalama Sili Atu
Ianuari 2023

“Auauna Atu ma le Malamalama Sili Atu,” Liahona, Ian. 2023.

Mataupu Faavae o le Auaunaga

Auauna Atu ma le Malamalama Sili Atu

E te le tau mauaina uma tali, ae o le iloaina lelei o Ia o le a fesoasoani ia i tatou e auauna atu ai e pei ona faia e le Faaola.

tamaitiiti o Iesu i le malumalu

Auiliiliga mai le Keriso i le Malumalu, saunia e Heinrich Hofmann

Na Faaali Mai e Iesu ia i Tatou se Mamanu o le Aoaoina

A o tuputupu ae le Faaola, sa Ia “ ua malosi lona loto, ua tumu i le poto: ua ia te ia foi le alofa tunoa o le Atua” (Luka 2:40). O le upu malosi o lona uiga o le faasolosolo malie ona tuputupu ae, e pei o le masina o loo tuputupu ae i le gasologa o le masina. Na faaopoopo atu Luka e faapea ”Ua tupu le poto ma le tino o Iesu, ua alofagia o Ia e le Atua atoa ma tagata” (Luka 2:52). Sa lei faafuasei ona i ai ia Iesu se atoaga o le malamalama—sa Ia mauaina i le aluga o taimi (tagai i le Mataupu Faavae ma Feagaiga 93:12–14).

Ina ua 12 tausaga o Iesu, sa maua o Ia e Ona matua i totonu o le malumalu—o le nofoaga tutotonu o tapuaiga i Ierusalema—“o loo nofo i le lotolotoi o fomai, ma sa latou faalogo ia te ia, ma fesili atu ia te ia ni fesili” (Faaliliuga Iosefa Samita , Luka 2:46 [i le Luka 2:46, vaefaamatalaga i]). Talu ai o le aoaoina sa avea o se vaega taua o Lona tuputupu ae, ina ua oo mai le avanoa e aoao atu ai i latou i totonu o le malumalu, sa saunia o Ia. O Lana aoaoga iina sa i ai se aafiaga maoae ia i latou ma Ona matua.

Faaaogaina o le Malamalama i le Auaunaga

O auala nei e tolu o le atiina ae o uiga faaKeriso o le malamalama e mafai ona fesoasoani ia i tatou i la tatou auaunaga:

  1. A oo ina tatou iloa le Faaola ma aoao e uiga i Ona uiga auaumama, o le a sili atu ona tatou iloa le mea o le a Ia faia e auauna atu ai i o tatou tulaga.

  2. A o faateleina lo tatou malamalama ma le malamalama i le talalelei, o le a tatou i ai i se tulaga lelei atu mo le Agaga Paia e manatua ai mea tatou te manaomia pe a tatou manaomiaina (tagai i le Ioane 14:26). E mafai ona fesoasoani lenei mea ia i tatou e malamalama ai i manaoga o i latou tatou te auauna atu i ai ma tali a latou fesili po o atugaluga.

  3. A o tatou faateleina lo tatou tomai e aoao ai, o le a sili atu ona mafai ona tatou fesootai pe auauna atu i isi. E mafai ona tatou aoao atili e uiga i se mataupu e fesootai ai ma se uo e fiafia i ai. Pe e mafai foi ona tatou aoaoina ni tomai faapitoa e mafai ona fesoasoani e taulima ai se manaoga.

O le mauaina o le malamlamala e mafai ona fesoasoani ia i tatou e auauna atu i le tele o auala. Ma le isi, “Soo se mataupu autu o le atamai tatou te maua i le olaga lenei, o le a tu mai faatasi ma i tatou i le toetutu” (Mataupu Faavae ma Feagaiga 130:18).

talavou matua o loo suesue i tusitusiga paia

Atiina Ae o le Malamalama

E mafai faapefea ona tatou atiina ae uiga faaKeriso o le malamalama? O nisi nei o manatu:

  1. Manatua e oo lava ia Iesu na faasolosolo lava ina aoaoina i le aluga o taimi. Ia filiga, ae ia e onosai ia te oe lava. E oo mai le aoaoina i “lea fuaitau i luga o lea fuaitau, ma lea mataupu i luga o lea mataupu” (2 Nifae 28:30).

  2. Aoao ia iloa punavai faatuatuaina o faamatalaga. (Tagai i le “Mauaina o le Upu Moni i Vaitaimi o Faamatalaga Sese” i le Oketopa 2022 Liahonafaaeletonika.)

  3. Ia fia iloa. Aoao mai mea o loo siomia ai oe i aso uma. Fai fesili. Faitau i tusi lelei ma ia aoao pea. (Tagai i le Mataupu Faavae ma Feagaiga 88:79, 118; 90:15.)

  4. Aoao e ala i le suesue ma le faatuatua (tagai i le Mataupu Faavae ma Feagaiga 88:118). O lou tomai e malamalama ai i le upumoni i soo se mataupu o le a faaleleia e ala i le faatasia o au taumafaiga sili faaleatamai i au taumafaiga sili faaleagaga. Ola ina ia mafai ona e maua le fesoasoani a le Agaga Paia.