Afai e Mafai Ona Ia Liliuina le Vai i le Uaina …

Saunia e Adam C. Olson

Mekasini a le Ekalesia

O mea e tolu sa ou aoaoina mai lenei vavega e masani ona le amanaiaina.

O Ioane, na o le pau lea o le tusitala o le Talalelei o loo faamatalaina le Faaola o loo faaliliuina le vai i le uaina (tagai i le Ioane 2:1–11). Sa ia lagonaina foi le malosi tele e uiga i le aafiaga e tau mai ai ia i tatou “uluai vavega” a le Faaola (Ioane 2:11).

I tulaga faaleaganuu, o taunuuga o le uma o le uaina e ono afaina ai le tulaga faaagafesootai o i latou na aafia ai. ¹ Ma e ui ou te le talitonu o se vavega e tatau ona maoae e suia ai le olaga, ou te mafaufau lava pe aisea na lagona ai e Ioane le taua tele o lenei vavega mai le tele o vavega sa maoae ma suia ai olaga.

Aisea e Tutupu ai Vavega?

Aisea na matua taua ai vavega i le galuega atoa a le Faaola? E mautinoa lava o se vaega ona o Lona alofa mutimutivale mo i latou sa manaomia le fesoasoani (tagai i le Mareko 1:41). E le gata i lea, o vavega o ni faamaoniga taua o Lona mana paia ma le pule (tagai i le Mareko 2:5, 10–11). O mea ofoofogia na tutupu e mafai foi ona faamalosia ai le faatuatua ma gauai atu ai i Lana savali (tagai i le Ioane 2:11; 6:2).

Ona faasino mai lea e se tasi ia te au o vavega a le Faaola e le na o le aumaia o tagata e faalogo i le savali; sa latou fesoasoani e aoao atu le savali.² Ina ua ou fesili ifo ia te au lava po o le a se mea e mafai ona ou aoaoina e uiga ia Iesu Keriso ma Lana misiona paia mai le liliuina o le vai i le uaina, sa amata ona ou vaai i ni mea fou.

O lesona nei e tolu sa ou aoaoina mai le vavega i Kana e uiga i le Faaola ma Lona mana e laveai ai.

1. “E lei oo i lo’u itu aso”

Ina ua fesili atu Maria ia Iesu mo se fesoasoani, sa Ia tali atu, “E lei oo i lo’u itu aso” (Ioane 2:4). E aunoa ma nisi faamatalaga, e le o manino mai le faamaumauga a Ioane le mea tonu na faamoemoeina e Maria po o le uiga o le tali a Iesu e lei oo mai Lona itu aso.

O lenei fasifuaitau na oso mai ia te au e taua. E mafai ona faasino atu Iesu i nisi o mea na tutupu lata mai i le lumanai, e pei o le amataga o Lana auaunaga lautele. I le taimi lava lea e tasi, o loo i ai i le fasifuaitau se siuleo lea e toe i ai i le talafaamaumau atoa a Ioane, e masani ona faasino atu i le vavega tupito o Lana taulaga togiola (tagai i le Ioane 4:21–23; 5:25–29; 7:30; 8:20). Ma le mea mulimuli, o loo toe ta’ua foi le fasifuaitau i le faaiuga o Lana galuega i le olaga nei, ina ua “silafia e Iesu ua oo mai ona po e tuua ai e ia lenei lalolagi, a e maliu atu i le Tama” (Ioane 13:1, faaopoopo le faamamafa; tagai foi i le Ioane 12:23, 27; 16:32). Ma a o lei tuumuli o ia mo Ketesemane, sa Ia tatalo, “Lo’u Tama e, ua oo mai le aso; tuu mai ia le viiga i lou Atalii, ina ia tuu atu foi e lou Atalii le viiga ia te oe” (Ioane 17:1, faaopoopo le faamamafa).

O le vaaia o le toe fai mai e Ioane o lenei fasifuaitau i lana talafaamaumau atoa na fesoasoani ou te iloa ai le iuga mai le amataga. Muamua, na suia e Iesu le vai i le uaina e faamalie ai le fiainu faaletino. Ona oo lea i le iuga, sa Ia faaaogaina le uaina o le faamanatuga e faatusa i Lona toto togiola, lea na mafai ai ona maua le ola e faavavau ma mafua ai ona le toe fia inu i latou o e talitonu ia te Ia (tagai i le Ioane 4:13–16; 6:35–58; 3 Nifae 20:8).

2. “O se mea e fai mai ai o ia ia te outou, ia outou faia”

Ina ua uma ona fesili atu ia Iesu mo se fesoasoani, sa ta’u atu e Maria i auauna, “O se mea lava e fai atu ai o ia ia te outou, ia outou faia” (Ioane 2:5). O loo i ai se lesona i lenei faamatalaga ma i mea matagofie e tutusa ai lenei tala ma le tala ia Iosefa i Aikupito.

“Ua matelaina le nuu uma o Aikupito, ona alalaga mai ai lea o le nuu ia Farao i le mea e ’ai; ona fai atu ai lea o Farao i tagata uma o Aikupito, Ia outou o atu ia Iosefa; o le mea e fai atu ai o ia ia te outou, ia outou faia” (Kenese 41:55, faaopoopo le faamamafa).

Atonu e lei faamoemoe Maria e faia lenei fesootaiga, ma atonu foi na faapena foi ia Ioane. Ae ina ua ou matauina mea e tali tutusa ai, na oo mai ni manatu se lua i lou mafaufau.

Muamua, sa ou vaai i se isi auala na muai faamalumalu mai ai e Iosefa ma isi tagata mai le Feagaiga Tuai ia Iesu Keriso ma Lana misiona. Ae, o le mea e sili atu ona taua, o tala ia Aikupito ma Kana na faamanatu mai ai ia te au e le gata e mafai e Iesu Keriso ona laveai i tatou mai le agasala ma le oti e ala i Lana Togiola—lea na Ia suitulaga mulimuli ane i le areto ma le uaina—ae e mafai foi ona Ia laveaiina i tatou mai luitau faaletino, faaleagafesootai, ma isi. Ina ua leai se areto i tagata, sa ta’u atu e Farao ia i latou e fai soo se mea e fai atu ai Iosefa. Sa latou faia ma sa tuuina atu i ai le areto ma sa faasaoina mai mafatiaga faaletino. Ina ua leai se uaina a auauna, sa fai atu Maria ia i latou e fai soo se mea e fetalai atu ai Iesu. Sa latou faia ma sa tuuina atu i ai le uaina, ma o i latou na aofia ai sa faasaoina mai le toilalo i o latou matafaioi.

O Iesu ma se alii ma le tamaitiiti — Afai tatou te naunau e faia soo se mea e fetalai mai ai Iesu, e mafai ona Ia faia vavega i o tatou olaga.

Afai tatou te naunau e faia soo se mea e fetalai mai ai Iesu, e mafai ona Ia faia lea lava mea e tasi mo i tatou ma faia vavega i o tatou olaga (tagai i le Eperu 10:35–36). O le faaolaina o le vavega aupito silisili lea o Ana vavega uma, ma e manaomia ai le usiusitai i la tatou vaega (tagai i le Mataupu Faavae ma Feagaiga 14:7; Mataupu Faavae o le Faatuatua 1:3).

3. “Ona latou faatutumuina lea, ua oo lava i lau”

Sa faatonuina e le Faaola ia auauna e faatumu vai maa e ono i le vai. “Ona latou faatutumuina lea ua oo lava i lau” (Ioane 2:6–7).

E ui ina sa fautuaina mai e tagata tomai faapitoa ni aofaiga eseese, atonu e saogalemu le faapea atu o vai maa taitasi na i ai ni nai kalone. Pe faigata atu ona liliu se kalone se tasi po o le 100 kalone vai i le uaina, ou te le iloa. O le mea ua suia ai lo’u olaga o le manatu lea ua ia Iesu le mana e suia ai se mea se tasi i se mea e matuai ese lava. Sa le na ona ia faia o se vai manogi-uaina; Sa ia aveina le vai, ma lona fausaga faigofie, ma liua i le uaina, o se suifefiloi lavelave o le faitau selau o vailaau tuufaatasi.

Afai e mafai ona Ia faia lena mea, ona mafai lea ona Ia liliuina o’u luitau i faamanuiaga—e le na o le faaopoopoina o se faaituau siliva i le afa ae suia moni ai le aano o le tofotofoga i se mea e faamanuiaina ai a’u (tagai i le Roma 8:28; 2 Nifae 2:2).

Ma afai e mafai ona Ia faia i se luitau se tasi, e mafai ona Ia faia ma i latou uma. O lea la, pe a foliga mai ua tumu le olaga i le taumasuasua i tofotofoga, ia manatua e mafai ona Ia suia le vai i le uaina. E mafai ona ia faafesuiai lefulefu mo le matagofie (tagai i le Isaia 61:3). E mafai ona ia ave le leaga ma liliu atu i le lelei (tagai i le Kenese 50:20). E mafai ona Ia liliuina a’u mea sese i le tuputupu ae ma ave a’u agasala ma suia i latou mai le tausalaga i le alualu i luma.³

Ma, ia te au, o le iloaina o lena mea e sili ona taua i mea uma. O lenei vavega sa ou le ano atu i ai ua aoaoina ai au e faapea, e ala i Lona mana, afai tatou te maua le faatuatua e faia ai mea ua ia poloai mai ai, E mafai ona Ia suia tatou mai mea sa tatou i ai i le mea e mafai ona avea ai i tatou—e pei o Ia.