Sau, Mulimuli Mai ia te A’u

Mataio 3; Mareko 1; Luka 3

E Faapefea Ona Faaalia e le Papatisoga le Usiusitai?

O lo tatou Faaola o le faataitaiga atoatoa o le usiusitai i le Tama Faalelagi, ma tautino atu, “Ou te le usiusitai i lo’u lava loto, a o le finagalo o le Tama na auina mai a’u” (Ioane 5:30).

Sa papatisoina le Faaola e faaali atu ai Lona usiusitai atoatoa i le Tama Faalelagi. E faapena foi, pe a tatou faaalia lo tatou usiusitai e ala i le papatisoina, tatou te ulu atu i se feagaiga ma le Atua ina ia avea ma soo tuuto ma usiusitai o Iesu Keriso. (Tagai i le 2 Nifae 31:5–13)

O se tasi o faapupulaga o le usiusitai o le Faaola o loo maua i le tala o Lona papatisoga:

“Ona maliu atu ai lea o Iesu mai Kalilaia i Ioritana ia Ioane, ia papatisoina ai e ia.

“A ua vavao e Ioane ia te ia, ua faapea mai, E ao ona e papatisoina mai o a’u, a ē maliu mai ea oe ia te a’u?

“A ua tali atu Iesu ia te ia, Tuu mai nei pea ia, aua e faapea ona tatau ia te i tatou ona faataunuuina o mea tonu uma” (Mataio 3:13--15).

O Ioane o lo o Papatisoina Iesu, saunia e Harry Anderson

Faatumu le Avanoa

E faapefea ona e faaumaina le faamatalaga lenei? O le papatisoga o le ____________. Mo manatu, tagai i le 2 Nifae 31:17–18; tagai foi i le J. Devn Cornish, “O le Faitotoa Ua Ta’ua o le Papatisoga,” Liahona, Fep. 2015, 17.

Talanoaga

I le avea ai o se aiga pe na o oe lava, iloilo le feagaiga na e osia i le papatisoga (tagai i le Mosaea 18: 8--10; Mataupu Faavae ma Feagaiga 20:37). O a ni mea e mafai ona e faia e tausia ai lenei feagaiga i lou olaga i aso taitasi?