O Le Faitotoa E Taua O Le Papatisoga
Saunia e Elder J. Devn Cornish
O Le Fitugafulu
Ou te tatalo ina ia mafai e i tatou taitoatasi ona maua se malamalama e sili atu ona atoatoa o lo tatou manaomia o le papatisoga, o le faitotoa o loo saunia mo i tatou le faagasologa o le liua mo le olaga atoa, ma le alofa togiola mutimutivale o lo tatou Faaola.
O Glen (e le o lona igoa moni) na ola i se olaga na faailogaina i le vevesi ma feeseeseaiga. A o talavou sa oo ina ia aafia i kegi, solitulafono, ma fetauaiga. Ina ua ia feiloai i faifeautalai, sa ia lagona o mea na la talitonu i ai ua fai si lelei tele e faigata ona moni. Ae na iu lava ina ia iloa e sao lava e moni ma e sili atu le taua nai lo se isi lava mea sa ia silafiaina.
Ina ua uma ona faatulagaina lelei lona olaga, faatasi ai ma le salamo faamaoni ma le ola ai i le talalelei, sa ulufale atu loa Glen i le vai o le papatisoga. Sa ia maua se olaga fou e tumu i le malamalama ma le filemu ma le olioli. Sa mama o ia i luma o le Alii.
Na saunoa mai Nifae:
“O le mea lea, ia outou faia ai mea ua ou fai atu ia te outou na ou vaai o faia e lo outou Alii ma lo outou Togiola; aua o le pogai lenei na faaali mai ai nei mea ia te au, ina ia mafai ona outou iloa ai le faitotoa e tatau ona outou ulu atu ai. Aua o le faitotoa e tatau ona outou ulu atu ai o le salamo ma le papatisoga i le vai; ona maua ai lea o se faamagaloga o a outou agasala i le afi ma i le Agaga Paia.
“Ma, ona outou i ai lea i lenei ala lauitiiti ma le vaapiapi e tau atu i le ola e faavavau; ioe, ua outou ulu atu i le faitotoa” (2 Nifae 31:17–18).
Ata na tusia e J. Kirk Richards
O nei fuaiupu ua aoao manino mai faapea o le papatisoga, o se faailoga paia o se feagaiga i le va o le Atua ma Ana fanau, e manaomia mo lo tatou faaolataga (tagai foi i le Mareko 16:16; Galuega 2:38; 2 Nifae 9:23–24). E moni, e matua taua lava ma e manaomia lenei sauniga e oo lava ia Iesu lava Ia sa papatisoina “e faataunuuina o mea tonu uma” (Mataio 3:15).
E faigata ona le malamalama i le faamatalaga a Nifae o lenei vaega: “Ma o lenei, afai na tatau i le Tamai Mamoe a le Atua, o lē ua Paia, onapapatiso i le vai, ina ia faataunuuina mea tonu uma, o lea la ua le sili atu ea ona tatau ia te i tatou, ua lē paia, ona papatiso, ioe, i le vai lava!” (2 Nifae 31:5).
Ina ua papatisoina i tatou, tatou te molimau atu i le Tama ua tatou naunau e ulu atu i se feagaiga “o mai i lelafu a le Atua, ma taʼua o ona tagata, ma outou loto e tauave avega a le tasi, ina ia māmā;
“Ioe, ma outou loto e faanoanoa faatasi ma e e faanoanoa; ioe, ma faamafanafana atu ia te i latou o e e manaomia le faamafanafanaga, ma tutu o nimolimau a le Atua i taimi uma ma i mea uma, ma i nofoaga uma atonu tou te i ai, seia oo lava i le oti, ina ia mafai ona togiolaina outou e le Atua, ma faitauina faatasi ma i latou o leuluaʼi toetutu, ina ia mafai ona outou maua le ola e faavavau” (Mosaea 18:8–9).
Tatou te faafouina lenei feagaiga i Aso Sa uma ao tatou aai ma feinu i le faamanatuga. O upu o le feagaiga, e pei ona ta‘ua i tatalo o le faamanatuga, e valaaulia fanau a le Tama Faalelagi e molimau atu “latou te loto inaave i o latou luga le suafa o [lona] Alo, ma manatua pea o ia matausi i ana poloaiga ua ia tuuina mai ia te i latou; ina ia latou maua pea lona Agaga e faatasi ma i latou” (MF&F 20:77).
O se Sauniga Tomua
E ese mai le molimauina o lo tatou naunautai e usitai i le Atua, o le papatisoga e mafai ai ona tatou ulu atu i le malo o le Atua, o le Ekalesia lea a Iesu Keriso i le lalolagi. Ua ta‘u mai e le Taiala i Tusitusiga Paia ia i tatou, “O le papatisoga e ala i le faatofuina i le vai e se tasi ua i ai le pule o le sauniga muamua o le talalelei ma e manaomia i le avea ai o se uso O Le Ekalesia a Iesu Keriso o le Au Paia o Aso e Gata Ai.”1
Na faamalamalama manino mai e le Faaola le faamoemoega o le papatisoga ina ua ia fetalai atu ia Nikotemo: “E moni, e moni, ou te fai atu ia te oe, Afai e le fanau se tasi i le vai ma le Agaga, e le mafai ona sao o ia i le malo o le Atua” (Ioane 3:5).
O le papatisoga ua faatagaina e manaomia mo i tatou ina ia nonofo i le afioaga o le Tama ma le Alo, ae ou te fiafia e i ai se isi faamoemoega autu o le papatisoga. O le papatisoga e le na o le faitotoa tatou te ulu atu ai i le Ekalesia a le Alii ma mulimuli ane i le malo selesitila; o le faitotoa foi lea i le faagasologa pele, e manaomia, ma faifai pea o le “atoatoa ia Keriso” (Moronae 10:32, 33) lea e manaomia e i tatou taitoatasi ma manao i ai. O lenei faagasologa, e pei ona faamatalaina i le mataupu faavae lona fa o le faatuatua, e amata i le faatuatua i le Alii o Iesu Keriso, sosoo ai ma le salamo, ma le “papatisoga i le faatofuina mo le faamagaloina o agasala,” ma mulimuli ane o le mauaina o le Agaga Paia.
I se faaupuga faigofie, e mafai ona tatou ta‘ua lenei faagasologa faifai pea o le liua. Sa faatatau i ai Iesu i Lana faamatalaga muamua ia Nikotemo. I le avea ai ma Faiaoga Sili, sa Ia tali atu i fesili autu a Nikotemo e uiga i le mea e tatau ona ia faia ina ia faaolaina, ma faapea atu, “E moni, e moni, ou te fai atu ia te oe, afai e le toe fanau le tagata, e le mafai ona iloa e ia le malo o le Atua” (Ioane 3:3).
O le toe fanau mai e manaomia ai le sili atu nai lo le papatisoga, le faamalamalama mai a Elder David A. Bednar o le Korama a Aposetolo e Toasefululua:
“O le toe fanauina faaleagaga o loo faamatala mai i lenei fuaiupu, e le vave ona tupu pe tupu foi i le taimi e tasi; o se faagasologa faifai pea—e le o se mea e tupu i se taimi e tasi. …
“Tatou te amataina le faagasologa o le toefuataiina e ala i le faatuatua ia Keriso, salamo ia tatou agasala, ma papatisoina e ala i le faatofuina mo le faamagaloga o agasala, e se tasi o i ai le pule o le perisitua. Ae o isi “laasaga taua i le faagasologa o le toe fanaufouina” e aofia ai le “faatofuina atoatoa ma faatumau ai i le talalelei a le Faaola.”2
O le “toe fanau” o se isi igoa mo le liua. O le mauaina o “se loto momomo ma se agaga salamo,” lea na faamatalaina e le Faaola e nao le pau lea o le taulaga o le a Ia taliaina (tagai i le 3 Nifae 9:19–20). E mautinoa lava, o le a leai se tasi o i tatou e mafai ona “vaai” i le malo o le Atua sei vagana ua tatou “oo i lenei liuga tele i o [tatou] loto” (Alema 5:14; tagai foi i le Mosaea 5:2; Alema 5:26).
O lenei faagasologa, lea e taitai atu ai i se faamagaloga o a tatou agasala, e amata i le faatuatua ua lava e mafai ai ona salamo ma ia papatisoina. Na faamatalaina e Mamona lenei vaega ina ua ia aoao mai “Ma o fua muamua o lesalamo o lepapatisoga; ma o le papatisoga e oo mai e ala i le faatuatua e faataunuu ai poloaiga; ma o le faataunuuina o poloaiga e maua ai lefaamagaloina o agasala” (Moronae 8:25).
E pei o le toatele o tagata o le Ekalesia, ou te le‘i maua le aafiaga o le liua maoae lea na maua e Glen ma isi. O au sa “fanaua e matua lelei” (1 Nifae 1:1; tagai foi i le Enosa 1:1) ma sa papatisoina i le valu o ou tausaga. E faapefea ona mafai ona maua e se tagata faapena le liua lava lea e tasi e pei o i latou o e auai i le Ekalesia i se tausaga mulimuli ane?
O Se Faitotoa i le Liua Tumau
O se tasi lea o mea e sili ona matagofie e tatau ia i tatou taitoatasi ona mafai ona malamalama e uiga i le faitotoa ua taua o le papatisoga. O le papatisoga e le o le taunuuga lea,e tusa lava pe o faatasi ma le elemene taua o le meaalofa o le Agaga Paia. O le papatisoga o le faitotoa i le faagasologa faifai pea, o le olaga atoa o le liua moni ma le tumau.
E pei lava o soo se tagata fou, e amata le faagasologa i se naunautaiga faamaoni i le faatuatua e faia le finagalo o le Tama e ala i le papatisoga. E faaauau pea i se sailiiliga o a tatou agasala uma ua tuanai ma se taumafaiga atoatoa e taofia, ta‘uta’u atu, fai se faaleleiga pe a talafeagai ai, ma aua le toe foi i ai. A mavae le papatisoga, tatou te maua le aia tatau i le mafutaga faifaipea a le Agaga Paia, e faalagolago i lo tatou manatuaina pea o le Faaola i mea uma tatou te mafaufau i ai, tatou te faia, ma o tatou tagata. Ma o le a faamamaina i tatou (tagai i le 2 Nifae 31:17).
Ae faapefea pe afai tatou te toe faia se isi agasala ina ua maea ona papatisoina? Pe ua leiloa mea uma? I le alofa mutimutivale, ua faia e lo tatou Tama se tuutuuga mo o tatou vaivaiga faaletagata. Tatou te toe mafai ona tulimatai atu le faagasologa o le faatuatua ma le faamoemoe ia Keriso ma le salamo faamaoni. Ae o le taimi lea ma i taimi mulimuli ane, e le manaomia le sauniga o le papatisoga, o se tulafono. Ua saunia nai lo o lena, e le Alii le sauniga o le faamanatuga. Ua tatou maua ai le avanoa faalevaiaso e suesue ai i tatou lava (tagai i le 1 Korinito 11:28) ma e tuu atu ai a tatou agasala i luga o le fata faitaulaga a le Alii a o tatou salamo ma le faamaoni, toe saili Lana faamagaloga, ona agai ai lea i luma i se olaga faafouina
O le faagasologa lenei na saunoa i ai le Tupu o Peniamina a o ia “[tuu] ese le tagata natura ma [avea] ma tagata paia e ala i le togiola a Keriso le Alii” (Mosaea 3:19). O le tuueseina o avega ma e moni lava o le faagasologa o le faaeaina lea na taua e Paulo i le taimi sa ia saunoa ai i le “tatanu faatasi ma ia e ala i le papatisoga i lona maliu: e pei ona o Keriso sa toetu ae ai mai le oti e ala i le mamalu o le Tama, e oo lava ina tatou savavali i le toefuataiina o le olaga. …
“Ua tatou iloa lenei mea, ua faasatauroina faatasi ma ia lo tatou tagata tuai, ina ia faaumatia ai le tino o le agasala,ina ia le toe faapologaina i tatou i le agasala” (Roma 6:4, 6).
O le faagasologa faifai pea ma le faatupulaia e mafai ai ona tatou olioli ma agelu i le alofa mutimutivale ma galuega a Keriso (tagai i le Alema 5:26). E aofia ai le tuputupu ae faaleagaga e maua pe a tatou mauaina sauniga ma tausia feagaiga ia ua ofoina mai e sauniga faaleperisitua ma i le malumalu.
Ou te tatalo ina ia mafai e i tatou taitoatasi ona maua se malamalama e sili atu le atoatoa o lo tatou manaomia o le papatisoga, le faitotoa tatou te maua ai le faagasologa mo le olaga atoa o le liua, ma o le alofa togiola mutimutivale o lo tatou Faaola, le o loo tu “i le faitotoa” (Faaaliga 3:20) ma valaaulia i tatou e ulu atu ma nonofo faatasi ma Ia ma le Tama e faavavau.