“O Ou Aso” o Malumalu ma Tekinolosi
Saunia e Elder Neil L. Andersen
O Le Korama a Aposetolo e Toasefululua
Mai se lauga, o le “Find our Cousins,” na tuuina atu i le faigalotu o le Family Discovery Day mo le autalavou faatasi ma le RootsTech 2014 Family History Conference i le Aai o Sate Leki, Iuta, i le aso 8 o Fep., 2014. Ina ia aoao atili, asiasi i le lds.org/go/Andersen215.
O outou aso nei ia sili atu ai ona liliu atu o outou loto i o outou tuaa ma aumaia ai sauniga faaola i le faitau miliona o tagata i totonu o o outou aiga.
Pe na outou tuufesili ea pe aisea na auina mai ai outou i le lalolagi i le taimi lenei nai lo se isi taimi o le talafaasolopito? Pe mata e faapei le tutu i autafa o Mose po o le avea ma se uo a Maria le tina o Iesu? Ae faapefea le ola ai i Navu a o savalia e le Perofeta o Iosefa Samita ona auala, po o le auai ma isi talavou a o latou tosoina ma tuleia a latou taavaletosolima i le afe o maila i se aiga fou i le Vanu o Sate Leki?
O nisi taimi tatou te vaavaai atu i aso anamua po o nofoaga eseese ma fesili,“ Aisea e le o a‘u ai? Aisea ua ou i ai iinei i lenei nofoaga, ma aisea i le taimi nei?”
E le o oe le tagata muamua ua tuufesili e uiga i le taimi ma le nofoaga o lou olaga. Na fesiligia e se perofeta na soifua i Amerika fesili lava ia. O lona igoa o Nifae—e le o le Nifae i le amataga o le Tusi a Mamona ae o Nifae le atalii o Helamana le lua ma le atalii o le atalii o le atalii o le perofeta o Alema le Itiiti.
I le lalolagi lea sa soifua ai Nifae, o tupe, mana, ma le lauiloa na sili atu ona taua nai lo le mea sa‘o. O le toatele o tagata na faaalia le le amanaiaina o poloaiga. Na latou pepelo, ave meatotino a isi, ma le amanaiaina le tulafono o le ola mama. Sa tauemuina ma agaleagaina i latou na tausia poloaiga (tagai i le Helamana 7:4–5, 21; 8:2, 5, 7–8).
“Ina ua vaai atu i ai Nifae i [nei mea], sa malena ae lona loto ma le faanoanoa … ma ia [alaga] i le tiga o lona agaga:
“E, maumau pe a na mafai ona oo mai ou aso i aso muamua na sau ai lou tamā o Nifae i fafo mai le laueleele o Ierusalema, po ua mafai ona ou olioli faatasi ma ia i le laueleele na folafolaina; o aso na sa faigofie ai ona tauanauina ona tagata, ia tutumau e tausi poloaiga a le Atua, ma gese ona taitaiina e fai le amioletonu; ma sa vavave ona latou faalogo atu i afioga a le Alii—
“Ioe, a na mafai ona oo mai ou aso i na aso, po ua olioli loʼu agaga i le amiotonu o oʼu uso.” (Helamana 7:6–8).
O Nifae o se perofeta maoae a le Atua, ae mo se taimi na ia mafaufau ai pe aisea sa ola ai o ia i le lalolagi i lona vaitaimi. Sa ia iloa o le a afio mai le Faaola i le lalolagi i le lumanai e le o mamao tele, ae mo le taimi lea, e foliga mai o mea matagofie ua lalata mai lava na foliga mai ua mou atu ma ia.
I le na o le 20 tausaga mai le taimi sa ia saunoa ai, o le a oo mai ai se po e aunoa ma le pogisa ma o le a fanau ai Iesu i Peteleema. I totonu o le 55 tausaga, o le Faaola, na toetu mai ma le faamamaluina, o le a alu ifo mai le lagi i le Au Paia i le laueleele o Nuumau. O le a i ai iina le atalii o Nifae, ma o le a talanoa atu le Faaola ia te ia lava, ma faauu o ia o se tasi o soo e toasefululua na filifilia i le itulagi i Sisifo. E mafai ona tatou manatu faapea o afafine ma atalii o Nifae ma a latou fanau teine ma fanau tama sa i ai i totonu o le Au Paia e 2,500 na valaaulia e Keriso ia taitoatasi ma o mai i luma ma tagotago le tagata lava ia i tulaga o fao i Ona lima ma vae. O le a le faigata ona talitonu faapea o fanau a fanau a fanau a Nifae sa i totonu o na tamaiti laiti na faamanuiaina taitoatasi e le Faaola ma sa siomia e le afi ma na auauna atu i ai agelu. Pe ana vaai manino Nifae i le lumanai o lona aiga amiotonu ma uo, e mautinoa lava na te le fia suia le taimi o lona olaga faaletino.
Ma le agaga faafetai, o Nifae na tumau i le amiotonu, na aoao atu i tagata ma le lototele, sa faia ni vavega tetele, ma faatasi ai ma le perofeta o Samuelu na vavalo e uiga i le vave oo mai o le afio mai o le Faaola. Na folafola mai e le Alii i Ana lava upu o le a Ia faamanuiaina Nifae i le faavavau (tagai i le Helamana 10–11; 16).
E ui lava sa ia tuufesili e uiga i lona taimi ma le nofoaga, na ia faaiu ini upu matuai mamana lava: “Faauta, … o o‘u aso nei” (Helamana 7:9).
Ou uso e ma tuafafine talavou pele e, o outou aso nei. Ua filifilia outou e ola ai i tausaga mulimuli a o lumanai ai le toe afio mai o le Faaola i le lalolagi. Tatou te le iloa le aso tonu po o le tausaga o Lona afio mai, ae ua mafai ona tatou iloa atu lava faailoga na e muamua mai i Lona afio mai.1
I se aso, e pei lava ona iloa e Nifae lona tulaga taua i le saunia mo le afio mai o le Faaola i sa Nifae, o le a tatou toe tepa i tua ma vaai i le faamanuiaga mamalu na tatou maua e ola ai i lo tatou taimi a o tatou saunia le lalolagi mo le toe foi mai o le Faaola. Ia tatou vaai i tua atu o faigata ma faafitauli o loo feagai ma i tatou i o tatou faamoemoega taua mo aso mamalu o i luma atu. Ia tatou toe ta‘ua upu a Nifae: “O o’u aso Nei.”
I le avea ai o nei aso ma o outou aso, o le a se mea o finagalo ai le Alii mai ia te outou? Muamua, e tatau ona e tauave i ou luga le suafa o Iesu Keriso. Aoao e uiga ia te ia ma Lona alofa ma le agalelei lē mafaamatalaina ia te oe ma filifili loa o le a e tausia Ana poloaiga i taimi uma. E tatau ona e mulimuli i le Faaola, alofa i le Atua, ma auauna atu ia i latou o siomia outou. O i tatou uma e mafai ona tatou maua le avanoa e ola ai i o tatou olaga o ni soo o Keriso, e taitaia e Lona Agaga ma siitiaina i latou o siomia i tatou.
O Se Tiute Paia
E faasaoina nisi o aafiaga patino mo augatupulaga faapitoa. Ou te fia talanoa e uiga i se tasi o o outou tiute paia e lei taitai lava tutusa ma se isi lava tupulaga ua mavae.
Ua nao ni nai tausaga talu ona maua malumalu i le lalolagi atoa. Faatasi ai ma le faapaiaga o le Malumalu o Phoenix Arisona i le aso 16 o Novema, 2014, ua i ai nei o tatou malumalu e 144 o faagaoioia i le lalolagi. A o ou talavou, sa na o le 13 malumalu i le lalolagi.
Sa soifua ae lo‘u toalua, o Sister Kathy Andersen i le setete o Florida, ISA. Ina ua lima ona tausaga, na aumai e ona matua lo latou aiga i le malumalu ina ia faamauina faatasi e faavavau. O le malaga na manaomia ai ni aso se ono, o se tietiega e 2,500 maila (4,023 km) i le salafa o le Iunaite Setete agai i le Malumalu o Sate Leki. I le taimi nei ua 47 malumalu ua latalata atu i lona aiga i Florida nai lo le Malumalu o Sate Leki.
Ua fautuaina e Peresitene Thomas S. Monson le autalavou a le Ekalesia e asiasi soo i le malumalu ma faia papatisoga mo e ua maliliu. Sa ia fai mai: “Ia, a’u uo talavou e, o ē o i ai i o outou tausaga o le talavou, ia i ai pea lava pea a outou vaaiga i le malumalu. Aua lava nei faia se mea o le a taofia ai oe mai le ulufale atu i ona faitotoa ma ‘ai ai i faamanuiaga paia ma le faavavau iina. Ou te faamalo atu ia te outou o ē o atu soo i le malumalu ma faia ai papatisoga mo e ua maliliu, i lo outou alapopo i taeao ina ia mafai ai ona outou auai i le faatinoga o na papatisoga a o lei amataina a’oga. Ou te le iloa po o le a se isi auala sili atu e amata ai se aso.”2
Ua outou tali atu i le perofeta a le Alii, ma i tausaga taitasi e faitau miliona o loo i le isi itu o le veli o loo tuuina i ai le avanoa e talia ai lo latou papatisoga. E leai se augatupulaga na soifua i lenei lalolagi sa mauaina se avanoa e matua maoae lava e pei ona outou maua e ulu atu ai i faitotoa o le maota o le Alii ma fesoasoani atu i le faaolataga o e na muamua mai.
E pei ona outou iloa lelei, o loo i ai se laasaga taua muamua e mafai ai e i tatou ona faataunuu le galuega paia o le malumalu. E tatau ona tatou saili ma maua mai na tagata o o tatou aiga o e na muamua mai ia i tatou.
I le asiasiga muamua a Moronae i le Perofeta o Iosefa Samita, na ia faatonuina Iosefa “[o le a] liliu atu loto o fanau i o latou tama” (MF&F 2:2). Na faamalamalama mulimuli ane e le Perofeta o Iosefa Samita e faapea o tagata o le Ekalesia e tatau ona avea ma “faaola i luga o le Mauga o Siona. … E faapefea ona avea i tatou ma faaola i luga o Mauga o Siona?“ na ia fesili ai. “E ala i le fausiaina o o latou malumalu … ma le agai i luma ma le mauaina o sauniga uma … fai ma sui o o latou tuaa ua maliliu, … ma o i ua i ai le filifili e fusia faatasi ai loto o matua i fanau, ma fanau i o latou matua.”3
Na saunoa le Perofeta o Iosefa Samita i lenei galuega i le avea ai ma se “sooga mau” e fesootaia aiga faatasi mai le tasi tupulaga i le isi (MF&F 128:18). O le sooga mau faaletino i aso o Iosefa sa faia e ala i le faamaluluina ma le faasuavaia o ni fasi uamea se lua i se ogaumu aasa, ma soo faatasi a o vaivai lava uamea e mamanu gofie, ona tuu lea e faamaalili ma faamaaa ma maua ai se filifili e le mamotusiaina. O le taua o le sooga mau mamana, ma faaleagaga lea e fusia ai i tatou uma faatasi e faavavau o loo tau manino mai i tusitusiga paia: “O i tatou e aunoa ma i latou e lē mafai ona faaatoatoaina; pe mafai foi ona faaatoatoaina i latou e aunoa ma i tatou” (MF&F 128:18).
I le taimi ua tuanai o lenei galuega o le mauaina o igoa o aiga, o le faamaumauina o i latou, ma le aumaia o i latou i le malumalu sa masani o le galuega autu a tagata matutua o le Ekalesia. Aisea na faapea ai? Aua na manaomia ai le tele o taimi ma taumafaiga. Sa masani ona amata i ni uili tetele o loo i ai ni faamaumauga mataninii. O lona uiga o le gauai atu ma le faaeteete i aso ma nofoaga, o tusi mafiafia o talafaasolopito ma le utiuti o faamatalaga na maua ai, ma o nisi taimi o fanua maliu maotua.
O lo tatou mafaia ona maua o tatou tuaa i le initoneti faatoa oo mai i ni nai tausaga ua mavae, faatasi ai ma le alualu i luma maoae i nai masina ua mavae. O masina o i luma o le a aumaia ai ni avanoa e sili atu.
A o faasolo ina matua tuuto atu la outou tupulaga i le asiasi atu i le malumalu, i masina ma tausaga o i luma o le a faapena lava ona tutusa lo outou maoae i le sailia ma le aumaia o igoa i le malumalu faatasi ma outou.
Ou te manao e luiina outou taitoatasi e faatu se sini faaletagata lava ia e fesoasoani e saunia le tele o igoa mo le malumalu mo papatisoga tou te faia i le malumalu. (Ina ia amataina le lui, asiasi i le templechallenge.lds.org.) O loo i ai se mea mamana i le sueina o i latou e manaomia sauniga o le malumalu, aoaoina po o ai i latou, ma avea ma se vaega o lo latou mauaina o nei sauniga paia. O lenei auala e avea ai outou ma “faaola i le Mauga o Siona” (tagai i le Opetaia 1:21 ma MF&F 103:9). O loo i ai se olioli ma le faamalieina lea na o lagona faaleagaga e malamalama ai. E fesootai i tatou i o tatou tuaa e faavavau.
O nisi o o tatou aiga ua i ai i le Ekalesia mo le tele o augatupulaga, ma ua faia le tele o galuega o le tatou tuaa tuusao i le malumalu. I le 2013, mo le taimi muamua, sa mafai ona ou vaai i o‘u tuaa i se siata ili i le initoneti, e aofia ai ma le tamamatua o lou tama o Niels Andersen, lea e faaigoa ai au, ma le tama o le tama o lou tamamatua o Moroni Stocks, le tagata muamua o le aiga ua faaigoa i se perofeta o le Tusi a Mamona. Sa mafai ona ou vaai i ata o le tele o tagata o lo‘u aiga i le initoneti. E te iloa pe faapei foliga o matua o o outou matua matutua?
Mauaina o o Tatou Tausoga
Afai e le o atoatoa lau siata e pei o lau siata, o lou tiutetauave muamua le faatumuina i le mea sili e te mafaia. O le tele ma le tele o faamatalaga e mafai ona maua i masina taitasi.
Afai o lau siata ua atoatoa e pei o aʼu, o loo i ai pea galuega e sili ona taua mo oe e fai. O lenei galuega e alu pea lava pea. E le uma lava e tusa lava pe toe afio mai le Faaola. Pe a foliga mai ua atoa la tatou siata, tatou te fesoasoani i isi e saili i latou i la latou laina ma tatou sailia i latou e felatai la latou faia ia i latou i la tatou laau o le aiga. Tatou te ta‘ua o le “mauaina o o tatou tausoga.”
E faapefea ona tatou maua o tatou tausoga? I ni auala se lua.
Muamua, tatou te o i la tatou siata, ma tatou sailia i latou e felatai le faiā i matua-o-matua-o-matua o o tatou tina po o tama-matutua. Mo se faataitaiga, e mafai ona ou alu i la‘u siata ia Tinamatua Frances Bowen Evans ma vaavaai i aiga o uso ma tuagane o Tinamatua Evans. Sa i ai ni ona uso e toalima ma tuagane e toalua. I lenei auala, e mafai ona ou maua ai o‘u tausoga.
O le auala lona lua e maua ai o tatou tausoga o le fesoasoani lea ia i latou o siomia i tatou. Tatou te amata i le tamaitusi faapitoa Lo‘u Aiga. Afai e fou i le talafaasolopito o aiga lou aiga, faatumu le tamaitusi. Ae afai o lau laau e foliga i lau laau, ave le tamaitusi i se tagata fou po o se tasi e le‘i iloga lava ona aafia i le Ekalesia e pei o lou aiga ma fesoasoani ia i latou e saili lo latou aiga. A o e faia lena mea, o le a e fesoasoani ia i latou e aumai ai isi i le malumalu. O ou uso ma tuafafine nei, ae tatou te mananao foi e taua i latou o o tatou “tausoga.”
Tatou te uso ma tuafafine uma i le aiga o lo tatou Tama. O o tatou lava aiga e le faafuasei ona tuuina faatasi. Na saunoa mai Peresitene Monson, “Tatou te iloa ai se mea e uiga ia i tatou lava pe a tatou aoao e uiga i o tatou augatama.”4
Pe a tatou vaai ia i tatou lava i se vaaiga o o tatou aiga, o i latou o e na muamua mai ia i tatou, ma i latou o e mulimuli mai ia i tatou, tatou te iloa ai pe faapefea ona avea i tatou o se vaega o se sootaga matagofie e fesootai ai i tatou uma faatasi. A o tatou sailia i latou ma ave o latou igoa i le malumalu, tatou te aumaia ia i latou se mea e le mafai ona latou maua e aunoa ma i tatou. O le faia o lena mea, ua tatou fesootai ia i latou, ma e faamautuina e le Alii e ala i Lona Agaga i o tatou agaga le taua e faavavau o le mea o loo tatou faia.
Sa faamatala e Peresitene Monson, “O i latou o ē malamalama i faamanuiaga e faavavau e maua mai i le malumalu, ua latou iloa e leai se taulaga e telē naua, leai se tau ua mamafa tele, leai se tauiviga ua faigata naua ia maua ai na faamanuiaga.”5
Ou te faaopoopo atu i ana upu o loo faatalitali mai faamanuiaga ma le mana mai luga mo o tatou tagata o aiga o e na muamua mai ia i tatou ao latou taliaina sauniga tatou te faia mo i latou i totonu o malumalu paia. Ua maea lo latou olaga faaletino, ae o loo latou feola pea. Tatou te avea ma “faaola i luga o le Mauga o Siona” ma ua fusia faatasi ma i latou mo le faavavau.
Ua outou fananau mai i se taimi o malumalu ma tekinolosi. O o outou aso nei ia sili atu ai ona liliu atu o outou loto i o outou tamā.
A o outou saofaga atu i lenei galuega paia, o le a faateleina lo outou malamalama ma le faatuatua i le Faaola ma o le a outou mauaina se molimau e sili ona mautinoa o le olaga o loo faaauau pea i tua atu o le veli. O le a outou mauaina le puipuiga mai faaosoosoga o loo siomiaina outou, ma o le a outou saunia outou lava faapea ma le lalolagi o tou soifua ai mo le Afio Mai Faalua o le Faaola.
Ou te iloa o le olaga o loo faaauau pea i tua atu o le veli. Ou te molimau atu o Iesu o le Keriso. O Ia o lo tatou Faaola, ma lo tatou Togiola. O loo soifua o Ia. O lana Togiola mamalu e mafai ai e nei sauniga i le malumalu ona tumau e faavavau.