Manatu Mo Afiafi Faaleaiga

O lenei lomiga o loo aofia ai tusiga ma gaoioiga e mafai ona faaaoga mo afiafi faaleaiga. O ni manatu nei se lua.

“Sa Papatisoina Iesu,” itulau e 74: Mafaufau e amata le tou afiafi faaleaiga i le usuina o le pese “A o Papatiso Iesu Keriso” (tagai i le itulau e 73). E mafai ona outou faitau faatasi le tala o le tusi paia i le papatisoga o Iesu, ma valaaulia tagata o le aiga o e ua papatisoina e faasoa mai ni mea sa latou lagonaina ma aoaoina ina ua papatisoina ma faamauina i latou. A o outou faitau faatasi ma faasoa molimau, fesoasoani i lau fanau ia malamalama i feagaiga e o faatasi ma le papatisoga. Atonu e te manao e faaaoga fesili o tusitusiga paia o loo tuuina atu i le tusiga lenei a’o e aoaoina lau fanau e uiga i feagaiga o le papatisoga.

“Alofa Moni,” itulau 80: I nisi taimi i le faagasologa o le vaiaso, fai atu i se tagata o le aiga e vaavaai mo ni faatinoga faatauvaa o le agalelei e faia i aso taitasi. I le taimi o le afiafi faaleaiga, fai atu i lena tagata o le aiga e faasoa mai mea na ia matauina i le vaiaso atoa. E pei ona saunoa mai Elder Wirthlin i lana savali, “O le alofa o le amataga, o le ogatotonu, ma le faaiuga o le ala o le avea ma soo.” Mafaufau e tusi se ata faigofie e faaalia ai se auala ua vaevaeina i ni vaega laiti se tele. Ia faamalamalama atu, mo faatinoga uma o le agalelei latou te faia—e tusa pe tele pe laitiiti—e mafai e tagata o le aiga ona valivali se vaega o le auala. A o taumafai lou aiga e faaali atu le alofa i isi, o le a outou agai atu i le auala o le avea ma soo.