Seia Tatou Toe Feiloai
Alofa Moni
Mai le “O Le Poloaiga Sili, Liahona, Nov. 2007, 28–29.
O le alofa e taitaiina atu i tatou i le mamalu ma le maoae o le ola e faavavau.
O le alofa o le amataga, o le ogatotonu, ma le faaiuga o le ala o le avea ma soo. Na te faamafanafana, fautua, fofo, ma faatoafilemu. E taitaia i tatou i vanu o le pogisa, ma i le veli o le oti. I le iuga, o le alofa e taitaiina atu i tatou i le mamalu ma le maoae o le ola e faavavau.
Mo au, o le Perofeta o Iosefa Samita na faaalia i taimi uma le alofa mama o Keriso. E toatele e tuufesili pe aisea na ia maua ai le toatele o tagata na mulimuli atu ia te ia ma taofia i latou. O Lana tali: “Ona o loo ia te a’u le mataupu faavae o le alofa.”1
E i ai se tala na faamatalaina e uiga i se tamaitiiti e 14 tausaga le matua, na sau i Navu e su’e lona uso sa nofo latalata iina. Na taunuu mai le alii talavou i le taumalulu ma le leai o se tupe ma leai ni uo. Ina ua ia fesili e uiga i lona uso, sa ave atu le tamaitiiti i se fale tele lea sa foliga i se faletalimalo. O iina sa ia feiloai ai i se alii o le na faapea atu, “Sau i totonu, atalii, o le a matou vaaia oe.”
Na talia le tama ma sa aumai i totonu o le fale, lea sa fafagaina ai o ia, faamafanafanaina, ma tuuina i ai se moega e moe ai.
O le aso na sosoo ai sa matuai maatiati le malulu, ae ui i lea, sa sauni lava le tama e savali i le valu maila i le mea sa nofo ai lona uso.
Ina ua vaai atu le alii o le maota i lenei mea, sa ia fai atu i le tama e nofo mo sina taimi. Sa ia fai atu e i ai se vaega e le o toe mamao ona o atu lea, ma e mafai ona latou o faatasi.
Ina ua tetee le tamaitiiti, ma fai atu ua leai sana tupe, sa fai atu le tamaloa e aua le popole i lena mea, o le a latou vaaia o ia.
Sa iloa mulimuli ane e le tamaitiiti o le alii o le maota sa le o se isi lava ae o Iosefa Samita, le perofeta Mamona. Na manatua e lenei tamaitiiti lenei faatinoga o le alofa mama i lona olaga atoa.2
I se savali a le Aufaipese a le Tapeneko O Musika ma Afioga Tulei, sa faamatalaina ai se tala e uiga i se toeaina ma se olomatua sa faaipoipo mo le tele o tausaga. Talu ai ona faasolosolo lemu lava ona po le vaai a le ava, sa le toe mafai ai ona ia tausia o ia lava i le auala sa ia faia ai i le tele o tausaga. E aunoa ma le talosagaina, sa amata valivali ai e le tane atigilima o lana ava mo ia.
Ata na pueina e le Jupiterimages/liquidlibrary/Thinkstock
“Sa ia [tane] iloa e mafai ona vaai o ia [ava] i ona atigilima pe a faalatalata atu i ona mata, i le tulaga sa’o lelei, ma e ataata ai o ia. E fiafia o ia [tane] e vaai o fiafia o ia [ava], o lea sa faaauau ai ona ia valivalia atigilima o lana ava mo le silia ma le lima tausaga a o lei maliu o ia.”3
O se faataitaiga lena o le alofa mama o Keriso. O nisi taimi o le alofa silisili e le maua i vaaiga mataina ia e faamanatu e fatusolo ma tusitala. E masani lava, o faaaliga silisili o le alofa o faatinoga faatauvaa o le agalelei ma le agaalofa tatou te faasafua atu ia i latou tatou te feiloai i ai i le ala o le olaga.
O le alofa moni e tumau e faavavau. E faavavau ona faapalepale ma loto faamagalo. E talitonu, faamoemoe, ma onosai i mea uma. O le alofa lena o loo i ai i lo tatou Tama Faalelagi mo i tatou.