Auala E Suia Ai e Talafaasolopito o Aiga o Tatou Loto ma Mafaufau
O le sailiili i o tatou talafaasolopito o aiga ma faia sauniga o le malumalu mo o tatou tuaa e fesoasoani ia i tatou e iloa ai le maoae ae faapea foi le alofa molitino o le fuafuaga a le Atua.
Mo ni tausaga, o taimi uma lava ou te auai i le malumalu, ou te mafaufau i le tina o lou tinamatua o Hana Mariah Eagles Harris (1817–88), ae le faapea ona sa ou manaomia e faatino galuega sui o le malumalu mo ia.
O Mariah (e pei ona sa ia manao e valaau ai) o se tasi o mafuaaga ua i ai nei lo‘u aiga i le Ekalesia. Sa papatisoina o ia i le 1840 i Egelani, sa maua faaeega paia i Navu, Ilinoi, faamauina i lana tane i Uinita Kuota, Nebraska, ma na maliu i Iuta. O ou mafaufauga e uiga ia te ia ao ou i ai i le malumalu e le ona o lona manaomia ina ia faia sauniga, ae e uiga i le auala ua fusia faatasi ai e na sauniga o ia ma au i le vava mamao o taimi ma nofoaga.
A o laitiiti sa ou nofo i le nuu lava lea o Utah sa ia nofo ai, ma na iu lava ina ou asiasi atu i Uinita Kuota, Navu, ma le nuu laitiiti faa-Peretania lea sa fanau ai o ia. Sa faateia au e ala i le mamao tele sa ia malaga ai ma le eseesega tele i le va o lona olaga ma au.
E ui lava i le vava mamao o taimi, nofoaga, ma le tulaga ua vavaeina i maua, e ui i lea, ou te lagonaina le fesootai atu i le tina o lou tinamatua e ala i le feagaiga o le faamauga faapea foi ma le iloaina e uiga i lona olaga. O lena fesootaiga e faamalamalamaina mafuaaga e faapitoa lava i tua atu o galuega o talafaasolopito o aiga ma le tapuaiga i le malumalu e sili atu ona masani ai.
O le auai i le sailiga o talafaasolopito o aiga e aoaoina ai i tatou i le maoae tele ma le tulaga matagofie o le foafoaga a le Atua ma le tulaga o le tagata ma le aoga o le alofa mutimutivale o le Togiola a Keriso.
Alofa Sili Atu e ala i le Talafaasolopito o Aiga
Ua aoao mai le Alii e ui i lalolagi na foafoaina e Ia ona o Lana fanau e “lē mafaitaulia … i le tagata; … ua faitaulia mea uma ia te au, aua e a au i latou ma ou te iloa i latou” (Mose 1:35). Ua ofo mai e galuega o malumalu ma talafaasolopito o aiga ia i tatou se avanoa e auai faatasi ai i le galuega a Iesu Keriso o le faaolataga.1 O le faia o lena mea e mafai ona fesoasoani ia i tatou e aoao ai pe faapefea ona alofa ma alofa mutimutivale i o tatou aiga, i o tatou tuaoi, i tagata uma tatou te feiloai ai, ona o i latou uma o o tatou uso ma tuagane.2
I le manatuaina o o tatou lava tuaa, ua tatou iloa ai le tele o le fuafuaga ma le foafoaga a le Tama Faalelagi. Sa foafoaina e le Alii se nofoaga mo i tatou ina ia tofotofoina ma maua le faatuatua, ae ona e toaitiiti lava tagata e maua le avanoa e maua ai le atoatoaga o feagaiga a le Atua ao i ai i le olaga nei, o le alofa mutimutivale o le galuega sui ua faamanatu mai ia i tatou e alofa le Alii ia i tatou uma o Ana fanau ma ua saunia se ala e mafai ai ona filifili tagata uma e talia faamanuiaga atoatoa o le talalelei e tusa lava po o a o latou tulaga i le olaga nei (tagai i le 2 Nifae 26:20–28, 32–33).
E le gata i lea, o le aoao e uiga i olaga o o tatou tuaa e mafai ona faamanatu maia ia i tatou e le o mea uma i le olaga o le a faigofie, ma o le a i ai faanoanoaga ma eseesega i lenei lalolagi pa‘ū. Ae o le aoao e uiga i o latou olaga ma le faatinoina o sauniga mo i latou e mafai foi ona faamanatu mai ai ia i tatou e leai se tasi e le mafai ona oo atu i ai le alofa o le Atua (tagai i le Roma 8:38–39).
O lou tinamatua o Mariah na faaosofia e lenei upumoni ina ua ia faatoa faalogo o talaiina atu. I le 1840–41, i le taimi o le galu muamua o sui papatisoga na faia i le Vaitafe o le Misisipi, ma le Malumalu o Navu e lei faamaeaina atoatoa sa vave ona ia faaaogaina le avanoa e papatiso ai mo lona uso ua maliu, o le na maliu a o lei taunuu atu faifeautalai i Egelani.3 E ui ou te lei feiloai ia Mariah, ou te faasoa faatasi ma ia se alofa i uso ma tuagane ma se malamalama o lenei alofa e mafai ona faaauau pea i tua atu o le oti ona o sauniga o le malumalu. O le faasoa faatasi ma ia o lena malamalama e musuia ai foi se alofa mo ia.
E leai se mea e faateia ai faapea o le Perofeta o Iosefa Samita sa toetoe lava a lofituina i le aoaoga faavae matagofie ma le alofa mutimutivale o le faaolataga mo e ua maliliu, lea sa ia faamatalaina e “sili ona mamalu o mataupu uma i le talalelei tumau-faavavau” (MF&F 128:17): “Ia tuu atu i mauga e alalaga i le olioli, ma o outou o vanu uma ia alalaga leo tetele; ma outou o sami ma laueleele matutu uma ia taʼutaʼu atu mea ofoofogia a lo outou Tupu Faavavau! Ma o outou vaitafe, ma alia, ma vai iti, ia tafe atu i lalo ma le fiafia. Ia tuu atu i vao ma laau uma o le fanua ia viia le Alii; ma outou o papa ʼalā ia fetagisi i le olioli. Ma ia tuu atu i le la, le masina, mafetu o le taeao ia pepese faatasi, ma ia tuu atu i atalii uma o le Atua ia alalaga i le olioli! Ma ia tuu atu i foafoaga faavavau e tautino atu lona suafa e faavavau ma faavavau lava!” MF&F 128:23).4
E pei o Mariah, o le na alu atu ma le naunautai ina ia papatisoina mo lona uso, o isi au Paia anamua sa tutusa lava le fiafia. Na tusia e se tasi o na uluai Au Paia, o Sally Carlisle: “O se mea mamalu tele lo tatou talitonu ma … o lenei ua mafai ona papatisoina i tatou mo a tatou uo uma ua maliliu ma faasaoina i latou i le mamao i tua e mafai ona tatou maua ai soo se malamalama o i latou.”5
Mo Tagata Uma—ma mo le Tasi
E pei ona faaalia e nei mafaufauga, ua faafoeina le maoae o talafaasolopito o aiga e ala i le tagata lava ia. Tatou te aoao ai e le gata i le tele ae faapea foi le loloto o le alofa o le Alii, ona e popole o Ia mo le tagata. O le Alii e vaai i le pau o le manuiti ma saili i le tamai mamoe se e tasi mai se selau (tagai i le Mataio 10:29; Luka 15:4) e le togiolaina i tatou i ni vaega tetele, ae taitoatasi, e pei ona sa Ia faia i tagata i le taimi o Lana galuega i le lalolagi ma e pei lava a o Ia faamanuiaina le nuu na faapotopoto i le malumalu i Nuumau (tagai i le 3 Nifae 17).
E faapena foi, na aoao e le Alii le uluai au Paia i se tulaga auiliili o le tausiga o faamaumauga mo galuega sui e faia mo tagata taitoatasi (tagai i le MF&F 128:1–5, 24). O lea la, ua tatou faia auiliili le galuega e faailoa mai ai tuaa taitoatasi, ae le na o le faasologa o igoa. E ala mai i lenei galuega tatou te maua ai se vaaiga o le alofa mutimutivale o le Atua, Lona agaalofa, ma le taua o le agaga o se tagata.
E le gata i lea, o le aoaoina o tala e uiga i olaga o o tatou tuaa e fesoasoani ia i tatou e aoao ai e alolofa ia i latou, e tusa lava po o a o latou faaletonu ma vaivaiga. A o tatou aoao pe na faapefea ona mamanuina e faigata o le olaga nei filifiliga a o tatou tuaa, tatou te lagonaina le lotoalofa mo i latou. E tatau ona faaleleia e lenei faagasologa lo tatou tomai e atiina ae lea lava ituaiga alofa mo e o feola, i totonu o o tatou aiga ma fanau uma a le Atua. O le lagonaina o le loloto sili atu faapea o tagata uma, e oo lava i le toatele o e na o mai i le lalolagi e aunoa ma se avanoa e maua ai feagaiga ma sauniga, o fanau a ni matua faalelagi e fesoasoani ia i tatou e talisapaia le olaga o se tofotofoga o le faatuatua ma le lototoa mo tagata uma o e na soifua mai, “e tusa ai ma lo latou faaaogaina o le malamalama ua tuuina atu e le [Atua] ia i latou.”6
E mafai ona faateleina e le aafiaga faamama o le galuega o talafaasolopito o aiga lo tatou lava malosiaga mo le alofa. Afai e faateleina lo tatou alolofa i tagata ua leva ona maliliu, o e na ese auala na soifua ai mai ia i tatou, pe tatou te lē oo ea ina iloa le alofa tele ma le alofa mutimutivale o le Atua ia i tatou? Ma pe le mafai loa ona tatou alolofa i o tatou aiga ma tuaoi ma le agaalofa i o latou vaivaiga?
Ina ua vaai isi tagata i le ata lava e tasi na maua o lo‘u tinamatua o Mariah, e masani lava ona latou fai mai e foliga auleaga ma lē lelei mai o ia ia i latou. Ou te vave puipuia o ia aua ou te iloa o ia. Ou te iloaina le tagata sa savalivali i autafa o le Vaitafe o le Severn a o avea o se teineitiiti laitiiti ma o se tina ma se fanau laiti. Ou te iloaina le tagata na folau atu i se vasa, na fanauina lana tama lona fa i le taimi o le malaga. Ou te iloaina le tagata na auina atu se tane i le taua ma na maliu se pepe i le taimi o lona toesea. Ou te iloaina le tagata na savali mo le 1,000 maila (1,609 km) i se aiga fou i le toafa i sisifo o Amerika. Ou te iloaina le tagata na faigaluega ma osifeagaiga ma galue i le faatoaga ma alofa. Ma i le iloaina o ia, sa ou maua ai se tofo o le alofa o o tatou matua faalelagi mo ia ma mo a la fanau taitoatasi.
Talafaasolopito o Aiga—le Avanoa Maoae ma le Aapa Atu o le Alofa Mutimutivale
E le o le fatu o le talafaasolopito o aiga le faaaogaina o se komepiuta; e le o le faitauina o tusilima tuai po o le faia o faamatalaga ma upusii faamamaluina. O meafaigaluega na po o galuega o talafaasolopito o aiga, ae e le o le fatu lea o talafaasolopito o aiga, pe latou te mauaina ai foi le taua e ala ai ona saili e le Au Paia o Aso e Gata Ai o latou tuaa. O le talafaasolopito o aiga, i lona ute moni, ua aoaoina i tatou i le tulaga maoae o le foafoaga ma le togiola ma i le taimi lava e tasi ua faamanatu mai ia i tatou le aoga faaletagata ma le alofa mutimutivale o le Togiola a Keriso.
O le sailia o o tatou tuaa e mafai ona i ai se aafiaga faapena i o tatou loto ma mafaufau pe a tatou iloaina o na tagata uma—“e le mafaitaulia lava e pei o le oneone o le matafaga” (Mose 1:28)—o fanau a ni matua faalelagi ma e alofagia ma e silafia e i laua. E leitioa a faamatalaina e Iosefa le ulufale atu i le malo selesitila o le ui atu ai i se faitotoa o le “matagofie silisili” (MF&F 137:2), ona o le a se mea e mafai ona sili atu ona matagofie silisili nai lo le faaolaina faatasi ma i latou tatou te iloa ma alolofa i ai, o e, e pei o i tatou, ua togiolaina foi i le alofa lautele ma faaletagata o le Atua? Ou te tulimatai atu i le feiloaiga ma tinamatua Mariah i lena faitotoa.