Pe a Tautevateva ni Uo Lelei
Afai ua faateteleina le solo i tua o se uo sa i ai ni tulaga faatonuina maualuluga, o le a se mea e tatau ona e faia?
“O i ma’ua sa avea o se uo lelei lava, ma o taimi uma lava sa tutusa o ma tulaga faatonuina. Peitai na …”
E masani ona e faalogo i lena faaupuga? Ua tatou aafia uma ai pe vaai foi i ai o tupu—ua amata ona fai e se uo lelei ia mea e le sa’o ma faamalosiauina ai isi e auai atu i ai. O nisi o fesili faigata e ono feagai ma oe o le “Pe tatau ona ou talanoa i la‘u uo e uiga i lenei amioga?” ma le “Pe e tatau ona ou le toe faaaluina le taimi faatasi ma lau uo pe afai e faaauau ai pea lenei amioga?”
E le tasi se tali e fetaui i tulaga uma, o lea o le mauaina o se vaifofo o le a manaomia ai le faatuatua ma le lototele e faalogo i fautuaga i le Mo le Malosi o le Autalavou: “A o e saili ia avea ma se uo i isi, aua le fetuunaia ou tulaga faatonuina. Afai e uunai oe e au uo e faia mea e sese, ia avea oe ma tagata e tu atu mo le mea sao, e tusa lava pe e te tu na o oe. Atonu e manaomia ona e sueina nisi uo o le a lagolagoina oe i le tausia o poloaiga. Saili le taitaiga a le Agaga Paia a o e faia nei filifiliga” ([2011], 16–17).
O ni faataitaiga nei se lua o talavou o e na taulimaina ni uo o e na amata uunaia i latou i le auala sese.
Faamatuu Ese
“Sa i ai sa’u uo na amata ona uunaia au ia ou lē amanaia o‘u tulaga faatonuina, ma sa ou faalogo atu ia te ia i se taimi. Na ou filifili mulimuli ane ua tatau ona lava, ma sa ou le toe faatagaina o ia e toe uunaia a’u. Sa ou tatalo mo le malosi ma le taitaiga, ma talu ai sa ou toe ola i le ala ua ou iloa e tatau ona ou ola ai, sa faapea ona ou maua le taitaiga sa ou talosagaina. Na iu lava ina ma le toe tafafao ma ia, ma i masina ua mavae atu, ua tuputupu a’e ai lava la‘u molimau. O tagata e te faauo i ai e mautinoa lava le faia ai o se eseesega i lou gafatia ona ola i le auala ua aoao mai e le talalelei.”
Margaret Denise K., 17, Iuta, ISA
Faatumauina o le Faamoemoe
“I le amataga o le aoga tulagalua, sa ou feiloai ai i se isi tagata o le Ekalesia sa matuai malosi faaleagaga. Sa ia umia le Perisitua Arona ma sa foliga mai o se faataitaiga lelei lea o se tagata e ola i le talalelei. Sa avea i ma’ua ma se uo lelei ma sa tele ina ma talanoa e uiga i le Ekalesia. A’o faasolo ina ma matutua, sa amata ona faiifo lona taua faaletagata lava ia ma lona mafai ona tausisia ona tulaga faatonuina. E ui lava ina sa ma uo pea, ae sa fegalegalea’i o ia ma isi o e sa le o ni faatosinaga lelei tele. Ou te faalogo e masani ona laulauvavale ma tausua i mea e le mama ma isi mea e le talafeagai. O nisi o ana uo sa le talitonu i le Atua ma e talanoa le mafaufau e uiga i le ‘Faa-Mamona.’ Mulimuli ane, sa oo ina fai ma ana vaisu le lauti ma, i le 13 o ona tausaga, sa faia ai sana uo teine.
“Sa ou le iloa se mea a fai. E tele ni taimi sa ou taumafai ai e ta’u atu ia te ia i se auala lelei ia lo‘u popole mo ia, ae sa ia le amanaiaina a’u. Ae ou te le’i faavaivai ai. Sa ou tausisia pea o’u tulaga faatonuina ma taumafai e avea ma se faataitaiga mo ia. Ou te lei manao e taofi ai le avea ma ana uo, ae ina ua faateteleina le leaga o tulaga na i ai, sa amata ona foliga mai na faasolosolo lelei lena ala. Mulimuli ane, sa i ai taimi na ou tootuli ai ma tatalo mo lona saogalemu.
“Ona maua lea o se galuega a lona tama i se isi setete. O lenei malaga na loma na mafua ai ona pupula mata o la‘u uo i mea uma na ia faia. O mea uma sa ou taumafai e ta‘u atu ia te ia mo le tolu tausaga, na faafuasei lava ona ia malamalama ai. I nai vaiaso na sosoo ai, sa ia galue malosi e toe faaleleia ni vaega se tele na ia mafaia o lona olaga ua mavae. Ina ua ou talanoa atu ia te ia, sa ia faafetai mai mo la’u faataitaiga ma le naunautai ia ou le fiu ia te ia. Sa sili ona fiafia o ia nai lo o tausaga e tele ua mavae, ma malamalama atoatoa i le uiga o le avea ma se Au Paia o Aso e Gata Ai.
“Mo soo se uo ua vaivai, ou te manatu e sili atu le faailoa i ai o ana amioga. Ae afai, e pei o la‘u uo, e le faalogo, ia aua lava ne’i fiu. Atonu o le taimi lenei o le a sili atu ona ia manaomia ai se uo moni. Ia tausisi i ou tulaga faatonuina, e tusa lava pe na te faaosoosoina oe e faia ni mea e ese mai. Ia tatalo mo ia. Ou te iloa e mafai ona e maua le malosi e ala i lenei mea, ma o le a le tuua na o oe i au taumafaiga. E faigofie lava ona lagona le vaivai ma le ese ai pe a tatou tutu atu mo le lelei. Ae e ala mai i mea vaivai, o le a faia ai e le Alii se galuega maoae.”
Collin Z., 16, Wyoming, ISA
O lea la, e leai se tali e tasi i le fesili “Pe e tatau ona ou le toe tafao i la’u uo?” Ae e tasi le mea ua mautinoa: ia tatalo e le aunoa mo le taitaiga a le Agaga ma ia naunau e faalogo i ai. O lou uiga faaalia autu e tatau ona i ai o le manatu i ai. Ia manatu i lou manuia faaleagaga ma le manuia faaleagaga o lau uo. Ia manatu i lau faataitaiga ma le faatosinaga i lau uo. Ia manatu i le faatosinaga a lau uo ia te oe. Ma a’o e faatuatua i le manatu alofa o le Tama Faalelagi, o le a e maua tali o loo e sailia.