Sa Oo ina Ou Iloa le Faaola

Brian Knox, Arisona, ISA

I lo‘u tausaga muamua i le aoga maualuga, sa ou faia ai se tautinoga e faitau le Feagaiga Fou mai le amataga e oo i le faaiuga. A tuua le aoga ma i faaiuga o vaiaso, ou te malolo atu i le fogafale pito i luga o le matou fale ma faitau ai afioga a le Faaola ma Ana vavega ma [Lona] soifuaga.

E ui lava sa le’i malamalama lo‘u mafaufau talavou i le gagana o le Tusi Paia, ae sa oo ina ou iloa Iesu Keriso. Sa ou aoaoina o Ia o le Alo o le Atua, ma sa auina mai o Ia e togiola mo a tatou agasala. Sa ou aoaoina sa Ia femaliua’i faatasi, fetalai atu, ma faamanuia tagata masani, ma vaivai—tagata e pei o a’u.

Sa i ai nisi o taimi sa ou le mautonu ai a’o faitauina fuaitau faigata i tusi a Paulo ma tusitusiga a Ioane i le tusi o Faaaliga, ae ou te lagonaina i taimi uma le moni o a laua aoaoga. Sa ou iloa o le faitauina o tusitusiga paia sa fesoasoani ia te a’u i aso faigata i le aoga ma taitaiina a’u i le faia o faaiuga taua.

I tausaga mulimuli ane, a o ou sauni mo se misiona, sa faapea ona ou fesiligia o‘u faamoemoega mo le auauna atu. Sa ou lagonaina sa leai se mea na faapitoa e uiga i la‘u molimau pe e uiga ia te a’u. Sa ou mafaufau pe na ala ona ou sauni mo se misiona ona o lo’u tiute lea i o‘u matua ma o’u taitai, o e sa galulue malosi e aoao mai ia te au le talalelei. Sa oo foi ina ou manatu, atonu o le a sili atu le lelei i le Alii pe a aunoa ma la‘u auaunaga.

I se tasi aso a o o’u faitauina le Tusi a Mamona, sa ootia lo’u loto i upu a Apinati:

“O le a faapea lava ona taitaiina atu o ia, e faasatauroina, ma fasia. …

“Ma e faapea ona motusia e le Atua noataga o le oti, ina ua manumalo o ia i le oti. …

“Ma o lenei ou te fai atu ia te outou, o ai na te tala atu lona tupulaga?” (Mosaea 15:7–8, 10; faaopoopo le faamamafa).

Sa ou faitauina faafia lena laina mulimuli, ma mafaufau pe na i ai muamua iina. E ala i le faitauina o le Feagaiga Fou, sa ou iloa ai le soifuaga o le Faaola ma e uiga i le augatupulaga o e sa savavali faatasi ma Ia. Ae o i latou o le augatupulaga a le Faaola e le mafai ona asiasi i tagata i le taimi nei e aoao atu e uiga i Lona alofa, Lana Togiola, ma Lana Ekalesia. E faapefea la ona ou ta’uamiotonuina le le faasoaina atu o la‘u molimau e uiga ia te Ia?

Na finagalo le Alii ia ou faasoa atu le tala fiafia o le talalelei na ou mauaina. Sa ou iloaina e moni le talalelei, ma sa ou manao e faasoa atu upumoni na ou aoaoina a o faitauina tusitusiga paia.

E le’i leva ona mavae lenei aafiaga, ae ou alu loa i la‘u misiona. I le taimi nei e mafai ona ou faafetaia le manao sa ia te a’u e auauna atu, i mea sa ou aoaoina e uiga i le Faaola a’o avea a’u o se tagata aoga talavou e faitauina tusitusiga paia.