Faamanuiaga Faapeteriaka: Taitaiga Musuia mo Lou Olaga

I le Ekalesia e lua ituaiga o peteriaka: (1) tama ma (2) tamalii o e ua faauuina i le tofi o le peteriaka i le Perisitua Mekisateko. E mafai e tama o loo umia le Perisitua Mekisateko ona tuuina atu faamanuiaga i tagata o o latou aiga, ae o nei faamanuiaga e le o faamaumauina e le Ekalesia, ae e mafai lava ona faamaumauina e le aiga. I le isi itu, o faamanuiaga e tuuina atu i tagata agavaa o le Ekalesia e se peteriaka faauuina e faamaumauina e le Ekalesia; o nei faamanuiaga ua ta‘ua o “faamanuiaga faapeteriaka.”

E tuuina atu e peteriaka ia faamanuiaga e tusa ai ma le musumusuga a le Agaga Paia. O lou faamanuiaga faapeteriaka e mafai ona aofia ai lapataiga ma folafolaga, ma e ono faaali mai ai mea ua faamoemoeina e le Alii ia te oe ma po o le a foi lou tulaga gafatia. O faamanuiaga folafolaina o le a faataunuuina i le taimi a le Alii—e tusa ai ma lou faamaoni. E na o le mulimuli i fautuaga i le faamanuiaga o le a e maua ai faamanuiaga folafolaina. O isi foi faamanuiaga e oo ina faataunuuina i le olaga a sau. O lou faamanuiaga faapeteriaka o le a le tuuina atu ai faamatalaga auiliili uma o lou olaga. Mo se faataitaiga, afai e le ta‘ua ai se misiona talai po o se faaipoipoga i le malumalu, e le faapea ai o le a e le maua lena avanoa.

O lou faamanuiaga faapeteriaka o le a ta‘u atu ai foi lou gafa i le aiga o Isaraelu—atonu e te tupuga mai i le ituaiga o Efaraima, Iuta, Manase, po o se tasi o isi ituaiga.¹ O lenei gafa e taua ona o le feagaiga faa-Aperaamo, lea e aofia ai le folafolaga a le Alii ia Aperaamo e faapea, e ala mai i ana fanau “o le a manuia ai aiga uma o le lalolagi, i faamanuiaga lava o le Talalelei” (Aperaamo 2:11). O tagata uma o le Ekalesia e auai i le aiga o Isaraelu, a le o se suli moni pe ala mai i se vaetamaga faaleagaga. O lea tulaga, ua i ai sa tatou matafaioi e faia i le aveina atu o le talalelei i le lalolagi.

Ina ia maua se faamanuiaga faapeteriaka, talanoa i lou epikopo po o le peresitene o le paranesi, na te tuuina atu se pepa faataga ia faia ai lou [faamanuiaga faapeteriaka]. E mafai ona e faaleleia le aafiaga o le mauaina o se faamanuiaga pe afai e te anapogi ma tatalo a’o le’i faia lou faamanuiaga. E mafai ona auai ai tagata tonu o lou aiga pe a fai lou faamanuiaga faapeteriaka.

A uma ona fai lou faamanuiaga, o le a auina atu ia te oe se kopi. Aua le faalauaiteleina; o ona fautuaga ma le folafolaga e patino lava ia te oe ma e le tatau ona soona faasoaina atu i isi. Suesue i ai e le aunoa; o le a tuuina atu ai le taitaiga, faamafanafanaga, ma le puipuiga.