Fesili & Tali

“Na maliu lata mai nei sa’u uo pele lava. E faapefea ona ou taulimaina le faavauvau?”

O le maliu o se uo, o se tasi lea o tofotofoga e sili ona faigata e mafai ona feagai ma oe. O le faavauvau, o se lagona masani e i ai pe a mavae sea ituaiga o tiga. E te lagona le faanoanoa ona e te alofa i lau uo. “Ia outou nonofo faatasi i le alofa, ia outou fetagisi ai i le toesea o i latou o e e oti” (MF&F 42:45).

O nisi o lagona faigata e mafai ona oo mai i le taimi o le faagasologa o le faavauvau e aofia ai le faanoanoa, ita, leai o se faamoemoe, vaivai, leai o se fiafia i gaoioiga, ma lagona o le lofituina. Ae i le taimi lava lea e tasi, o tagata e faavauvau e tele lava ina latou lagona le filemu a o latou saili atu i le Alii ma faalatalata atili atu ia te Ia; latou te maua Lana folafolaga: “Amuia i latou uma o e e faanoanoa ai, aua o le a faamafanafanaina i latou” (3 Nifae 12:4). E tiga le faavauvau, ae e faamaloloina ai foi.

A o e galue i ou lagona, taumafai e taulai atu i le itu e lelei ai. Teufatu i mea lelei e manatua e uiga i lau uo. Tatalo ina ia lagonaina le filemu ma le faamafanafanaga a le Faaola. Ia maua le faamoemoe i le alofa ma le agalelei o le Tama Faalelagi, ma le ata o le faaolataga.

O le lagonaina o le faavauvau e le faapea ai e le o i ai sou faatuatua. Sa saunoa Peresitene Thomas S. Monson i le konafesi aoao e faatatau i le maliu o lona faletua. Na saunoa o ia, “O le faapea atu ua ou misia lava o ia, e le amata faaalia ai le loloto o ou lagona.” Ona ia saunoa lea e uiga i faafitauli ma faaiuina ai: “Ua tatou iloa e i ai taimi o le a tatou oo ai i le faanoanoa nutimomoia, i taimi o le a tatou faavauvau ai, ma i taimi o le a tofotofoina ai i tatou i le mea e gata ai o tatou gafatia. Ae peitai, o nei faigata e mafai ona suia ai i tatou mo le lelei sili atu, ia toe fausia o tatou olaga i le ala ua aoao mai e lo tatou Tama Faalelagi” (“Ou Te Le Tuulafoaia ia te Oe, pe Lafoai ia Oe,” Liahona, Nov. 2013, 85, 87).

O a ni auala e mafai ai e le maliu o lau uo ona musuia oe ia sili atu ona lelei?

Tuufaatasi le Faavauvau ma le Faatuatua

O le faavauvau e le o se mea leaga. (Ae peitai, e mafai ona leaga, pe afai o loo e atuatuvale i taimi uma.) O le tuufaatasia o le faavauvau ma le faatuatua o le auala sili lea e faamasani ai i le faigata o le oti o se tasi e pele. Mafaufau i lau uo i le taimi nei, i le lalolagi o agaga, ma po o a ni mea a lau uo o fai. E alofa o ia ia te oe ma e manao ia e fiafia. O le aoao e uiga i le lalolagi o agaga e mafai ona faateleina ai lou malamalama i le ata o le faaolataga ma aumaia ai le filemu, faamoemoe, ma le faatuatua. Aua nei galo e tatalo i le Tama Faalelagi mo se fesoasoani. Ua silafia lelei e le Tama faalelagi ma Lona Alo o Iesu Keriso ia ou lagona ma o le a fesoasoani ia te oe pe afai e te ole atu ma le faamaoni.

Mary G., 14 tausaga, Virginia, ISA

E Alofa le Atua i Lau Uo

E ui lava ina faigata ia te oe le feagai ma le faavauvau, ae o le ata o le faaolataga a le Tama Faalelagi e mafai ona faamafanafana ia te oe e ala i le Agaga Paia, e i ai se aso e mafai ai ona e toe feiloai i lau uo. Ma ia manatua o le olaga iinei i le lalolagi o se taimi puupuu lava e tofotofoina ma suesueina ai i tatou. Ua saunia e lo tatou Tama Faalelagi se nofoaga mo lau uo. E alofa le Atua i Lana fanau.

Marvin S., 16 tausaga, Metro Manila, Filipaina

Ia Fiafia mo Lau Uo

Ina ua maliliu tagata ou te alofa i ai, ou te taumafai e manatua o loo i ai se fuafuaga a lo tatou Tama Faalelagi mo i latou ma e mafai ona ou toe vaai ia i latou. E mafai ona tatou fiafia mo i latou aua e le toe mafatia i latou i puapuaga o lenei olaga faitino. E tiga ona ua latou le toe i ai i le tino, ae e mafai ona tatou tulimatai atu i le toe faatasia ma i latou.

Ariadna T., 19 tausaga, Aai o Mekisiko, Mekisiko

Mauaina o le Fesoasoani i Tusitusiga Paia

Na maliu talu ai nei sa‘u uo lelei i se faalavelave matautia tau taavale. Ua ou maua le mafanafana e ala i le o mai ia Keriso. Sa tatau ona ou maua se molimau i le alofa o Keriso mo i tatou taitoatasi; na tatau ona ou malamalama po o ai i tatou i le avea ai ma ni fanau a le Atua; ma le mea aupito sili ona taua, na tatau ona ou malamalama i le fuafuaga ma le finagalo o le Atua mo Lana fanau. A o ou liliu atu ia te Ia e ala i tusitusiga paia, ekalesia, ma tusi ma mea e faaaoga a le Ekalesia, sa mafai ona ou maua lena molimau ma lagonaina le toafilemu ma le mafanafana. Sa faapitoa le aoga o le lesona a le autalavou ua faaautuina “E faapefea ona ou maua le mafanafana pe a maliu se tasi ou te alofa i ai?” O mau, tusiga, ma vitio uma o loo ta‘ua i lenei lesona e ese le maoae ma ua suia ai lo’u olaga.

Madilin N., 18 tausaga, Iowa, ISA

O tali ua faamoemoe e mo se fesoasoani ma ni manatu, ae e le o se faalauiloaga aloaia o aoaoga faavae o le Ekalesia.

E Faatatau i le Pule i le Ola

Na aoao mai Elder M. Russell Ballard o le Korama a Aposetolo e Toasefululua:

“O le faatinoga o le pule i le ola e moni lava o se faalavelave, aua o lenei faatinoga e tasi e tuua ai le toatele o tagata e aafia ai: muamua o le tagata lea ua maliu, ma le toatele o isi—aiga ma uo—o e ua tuua, o nisi e feagai ma le tele o tausaga o tiga loloto ma le le mautonu. …

“O le mea moni, tatou te le iloa tulaga uma e mafua ai ona pule i le ola. E na o le Alii e silafia itu uma, ma o ia lava foi lea o le a faamasinoina a tatou amioga i le lalolagi.

“A ia faamasinoina i tatou, ou te lagona o le a Ia iloiloina itu uma: o o tatou tulaga faakenera ma vailaau, o tatou tulaga faalemafaufau, o tatou gafatia faaleatamai, o aoaoga ua tatou mauaina, o uputuu a o tatou tamā, o tatou soifua maloloina, ma isi mea faapena. …

“O le pule i le ola o se agasala—o se agasala e sili ona matuia, peitai, o le a le na’o le faatinoga o le agasala o le a faamasinoina ai e le Alii le tagata e faia lena agasala. O le a silasila le Alii i tulaga o lena tagata ma le maualuga o lana tali atu i le taimi na faatinoina ai.”

Mai le “Pule i le Ola: O Nisi o Mea ua Tatou Iloa, ma Nisi o Mea Tatou te Le Iloa,” Liahona, Mat. 1988, 17, 18.

O le Oti o se Vaega o le Fuafuaga a le Atua

“Sa faigata ia te a‘u ona ola ai i le fogaeleele ma vaai atu i nei alii talavou lea matou te faalagolago atu i ai i o la’ua luga mo se fesoasoani ma se faamafanafanaga, ua aveese atu mai ia i matou i le taulotoaiga o o la olaga talavou. Ioe, sa faigata tele ona toafilemu i nei mea. E i ai nisi taimi ou te mafaufau ai sa tatau ona ou lagonaina le sili atu o le toafilemu pe ana valaauina a’u ou te oti pe ana fai o le finagalo lea o le Atua; ae peitai ou te iloa e tatau pea ona tatou filemu ma iloa o le finagalo o le Atua, ma toafilemu i Lona finagalo; o loo sa’o mea uma.”

O Le Perofeta o Iosefa Samita, Aoaoga a Peresitene o le Ekalesia: Iosefa Samita (2007), 178.

Fesili o le a Sosoo Mai

“E manatu nisi o a‘u uo, o le alu i le lotu e maumau ai le taimi. E mafai faapefea ona ou fesoasoani ia latou iloa e mafai ona avea o se faamanuiaga maoae?”

Auina mai lau tali ma se atapue sili ona manino, pe a e manao i ai, a o lei oo i le aso 15 o Mati, 2015, i le liahona.lds.org, po o le imeli i le [e-mail], pe lafo mai i le meli (tagai i le tuatusi i le itulau e 3).

O le faamatalaga ma le faatagaga o loo i lalo e tatau ona aofia mai i lau i-meli po o le tusi: (1) igoa atoa, (2) aso fanau, (3) uarota po o le paranesi, (4) siteki po o le itu, (5) lau faatagaga tusitusia, ma, afai e itiiti ifo i le 18 ou tausaga, o le faatagaga tusitusia a ou matua (e talia foi le imeli) e lolomiina ai lau tali ma lou ata.