O Tusi mai ia Tinamatua Whittle

Elder Richard G. Scott

O le Korama a Aposetolo e Toasefululua

A o laitiiti Elder Richard G. Scott, sa le’i avea lona tama o se tagata o le Ekalesia. O lona tina sa avea o se tagata o le ekalesia, ae sa le masani ona alu i le lotu. Ina ua atoa le valu tausaga o Richard, sa le’i papatisoina o ia. Ona sau ai lea o lona Tinamatua Whittle e asiasi mai.

O Tinamatua Whittle o se faataitaiga lelei tele. Sa fesoasoani o ia ia Richard ma ona uso e aoao i le taua o le papatisoina ma le o i le lotu. E le’i umi ae papatisoina loa Richard ma lona uso matua.

Soo se taimi na tuuina atu ai e Richard se tautalaga i le lotu, e telefoni atu o ia ia Tinamatua Whittle ina ia maua mai ai ona manatu. E lei umi ae ona maua se tusi mai le meli faatasi ma se lauga sa tusia e lona tinamatua mo ia. A’o faasolosolo ina matua o ia, e auina mai e tinamatua na’o se auivi ma ni manatu e fesoasoani na te tusia ai e ia lava lana lauga. Sa iloa e Richard i taimi uma sa alofa Tinamatua Whittle ia te ia ma alofa i le talalelei.

I le kolisi na feiloai ai Richard i se isi faataitaiga lelei. O lona igoa o Jeanene. I se tasi po sa fai atu ai o ia [Jeanene] ia te ia, “A ou faaipoipo, o le a ou faaipoipo atu i se faifeautalai ua maea se misiona, i totonu o le malumalu.” Na filifili Richard e tatalo e uiga i le alu i se misiona. E lei umi ae o uma i la’ua ma Jeanene i ni misiona. Ina ua la foi mai i o la’ua aiga, sa faaipoipo loa Richard ma Jeanene i le Malumalu o Manti Iuta.