Savali a le Au Peresitene Sili
Molimau ma le Liuaina
Saunia e Peresitene Henry B. Eyring
Fesoasoani Muamua i le Au Peresitene Sili
O loo i ai se eseesega i le va o le mauaina o se molimau i le upumoni ma le liua moni. Mo se faataitaiga, sa tuuina atu e le Aposetolo sili o Peteru lana molimau i le Faaola e faapea, na ia iloaina o Iesu o le Alo o le Atua.
“Ona fetalai atu lea o [Iesu] ia te i latou, A o outou pe se a la outou upu ia te a’u?
“Ona tali mai ai lea o Simona Peteru, ua faapea mai, O oe o le Keriso, o le Alo o le Atua soifua.
“Ona tali atu ai lea o Iesu, ua faapea atu ia te ia, Amuia oe Simona Paiona; aua e le se tagata na ia faaali atu ai ia te oe, a o lo’u Tama o i le lagi” (Mataio 16:15–17).
Ae i se taimi mulimuli ane, i Lana poloaiga ia Peteru, na tuu atu ai e le Alii ia te ia ma i tatou se taiala ina ia liua moni ai ma ia faalautele atu ai lena liua i le olaga atoa. Na fetalai Iesu e faapea: “Pe a liua mai oe, ona e faamalosi ai lea i ou uso” (Luka 22:32).
Sa aoaoina e Iesu ia Peteru sa i ai lava se suiga tele lea e tatau ona i ai i tua atu o le mauaina o se molimau, o le mafai ona mafaufau, lagona, ma galue e pei o soo liua moni o Iesu Keriso. O le suiga tele lena tatou te sailia uma. O le taimi lava tatou te maua ai, tatou te manaomia ia faaauau pea lena suiga seia oo i le iuga o lo tatou olaga faataitai (tagai i le Alema 5:13–14).
Ua tatou iloa mai o tatou lava aafiaga, ma mai le matauina o isi, o le i ai o ni nai taimi maoae o le mana faaleagaga o le a le lava lea. Na teena e Peteru na ia iloa le Faaola e ui lava ina ua uma ona ia mauaina se molimau e ala i le Agaga, o Iesu o le Keriso. Na tuuina atu i Molimau e Toatolu o le Tusi a Mamona le molimau tuusao o le Tusi a Mamona o le afioga a le Atua, ae mulimuli ane, sa toilalo i lo latou gafatia e lagolagoina Iosefa Samita o le Perofeta o le Ekalesia a le Alii.
Iesu Paia e, saunia e Walter Rane
Tatou te manaomia se liliuga i o tatou loto, e pei ona faamatalaina i le tusi a Alema: “Ma sa latou tautino uma atu i le nuu le mea e tasi—e faapea, ua liua o latou loto; ua lē toe i ai ia te i latou se manao e fai mea leaga” (Alema 19:33; tagai foi i le Mosaea 5:2).
Na aoao mai le Alii ia i tatou, pe a tatou liua moni i Lana talalelei, o le a liliu o tatou loto mai atugaluga manatu faapito ae liliu agai atu i auaunaga ia siitia ai isi a’o latou agai i luga i le ola e faavavau. Ina ia maua lena liua, e mafai ona tatou tatalo ma galulue i le faatuatua ia avea ma tagata fou, lea e mafai ona maua e ala i le Togiola a Iesu Keriso.
E mafai ona tatou amata i le tatalo mo le faatuatua e salamo ai i le manatu faapito, ma mo le meaalofa o le agaalofa i isi e sili atu nai lo i tatou lava. E mafai ona tatou tatalo mo le mana e tuu ese ai le faamaualuga ma le lotoleaga.
O le tatalo o le ki foi lea i le mauaina o le meaalofa o le fiafia i le afioga a le Atua ma mo le alofa o Keriso (tagai i le Moronae 7:47–48). O mai faatasi le lua lea. A o tatou faitau, mafaufau loloto, ma tatalo e uiga i le afioga a le Atua, o le a oo ina tatou fiafia i ai. E tuu i ai e le Alii i o tatou loto. A o tatou lagonaina lena alofa, o le a amata ona tatou alolofa atili i le Alii. Faatasi ai ma lena mea, o le a oo mai le alofa i isi lea tatou te manaomia ina ia mafai ona faamalolosia i latou o e ua tuu e le Atua i lo tatou ala.
Mo se faataitaiga, e mafai ona tatou tatalo e iloa ai i latou ua finagalo le Alii ia aoaoina e Ana faifeautalai. E mafai e faifeautalai faamisiona ona tatalo ma le faatuatua ia iloa e ala i le Agaga le mea e aoao atu ma molimau atu ai. E mafai ona latou tatalo i le faatuatua ia faataga i latou e le Alii ia lagona Lona alofa mo tagata latou te feiloai i ai. O le a le aumaia e faifeautalai i latou uma e feiloai i ai i le vai o le papatisoga ma i le meaalofa o le Agaga Paia. Ae e mafai ona latou maua le Agaga Paia e avea ma se soa. E ala i a latou auaunaga ma le fesoasoani a le Agaga Paia, i le aluga o taimi, o le a faapea ona liua ai loto o faifeautalai.
O lena liua o le a faafouina pea lava pea a o latou ma tatou faaauau pea ma le le manatu faapito i le olaga atoa ona galulue i le faatuatua e faamalolosia isi i le talalelei a Iesu Keriso. O le liua o le a le avea o se mea e tasi e tupu po o se mea o le a na o le tasi se vaitau o le olaga e tumau ai, ae o le a avea o se faagasologa e faaauauina pea. O le olaga e mafai ona susulu atili seia oo lava i le aso e atoatoa ai, lea o le a tatou vaai ai i le Faaola ma iloa ai ua tatou avea e faapei o Ia. Na faamalamalama mai e le Alii le malaga i le ala lenei: “O le mea e mai i le Atua o le malamalama lea; ma o ia o le mauaina le malamalama, ma tumau pea i le Atua, e mauaina le malamalama atili; ma o lena malamalama o le a tupu susulu malamalama tele pea lava pea seia oo i le aso e atoatoa ai” (MF&F 50:24).
Ou te folafola atu ia te outou e mafai ona tupu lena mea ia i tatou taitoatasi.
Aoao Atu mai Lenei Savali
Sa faaaoga e Elder David A. Bednar o le Korama a Aposetolo e Toasefululua le “faataoto i kukama tuufagu [piko]” e aoao mai ai o le liua o se faagasologa e faifai pea ae le o se mea e tupu i le taimi e tasi: “O lea fuaiupu ma lea fuaiupu ma lea mataupu ma lea mataupu, e faasolosolo malie ma toetoe lava ina le matauina, o o tatou faamoemoega, o tatou mafaufauga, o a tatou upu, ma a tatou amioga e ogatusa ma le finagalo o le Atua” (“E Ao Ina Toe Fanau Mai Outou” Liahona, Me 2007, 19). Mafaufau e toe faamanatu le faataoto i kukama tuufagu ia i latou e te aoaoina. O le a se mea e mafai e i tatou taitoatasi ona faia e agai malie ai i luma i le faagasologa faifaimalie o le liua o loo talanoa uma mai ai Peresitene Eyring ma Elder Bednar?