Talaaga Otooto Talavou Matutua
Foe Malolosi, Molimau Malolosi i Farani Polenisia
Ua iloa e se tasi ulugalii talavou i Farani Polenisia o le talalelei ma le la taaloga e fiafia i ai e i ai ni mea e tutusa ai.
I le ogatotonu o le Vasa Pasefika o loo taooto ai ni motu e 118 na fatuina mai i maugamu mai lalo po o motu amu. E faatumulia i niu, penina lanu uliuli ma fugalaau o Tiare, o nei motu o ni aiga i le tusa ma le 275,000 tagata Tahiti (e pei ona taua ai tagata e nonofo i Farani Polenisia).
O Gerry Huuti, o se tagata liliu mai e 29 tausaga le matua, o se tasi o na tagata. E fiafia tele o ia i le taaloga a le atunuu, o le va‘a, po o tuuga paopao, lea sa avea ma se vaega taua o lona olaga talu mai le 16 o ona tausaga. E lima tausaga talu ona amata ona alo, ae feiloai o ia ia Laydreane—se siamupini alovaa ma o se tagata o le Ekalesia. Faafetai i ana faataitaiga, sa papatisoina Gerry ma faia se misiona i Niu Kaletonia, a o auauna atu Laydreane i Tahiti. Na la faaipoipo i le ono vaiaso talu ona foi mai Gerry i le fale.
O le taimi nei, o le mavae ai o ni nai tausaga ma ua toatasi le atalii, o loo auai pea Gerry i tuuga va‘a—ae na te lagolagoina lona aiga e ala i le fausiaina o foe mo tuuga va‘a. “O la‘u pisinisi, e i tafatafa lava o lo‘u fale,” o lana faamatalaga lea. “Ou te alu ma vaavaai mo ni laau e tatipi ma faapipii faatasi e fausia ai foe.” E foliga mai e faigofie, ae o nei foe laupapa matagofie taitasi e lima aso atoa e fai ai. Ma faatasi ai ma le tusa ma le 20,000 tagata alo foe i ‘le motu o le au Huutis o Tahiti, e manaomia lava foe i taimi uma.
E ui lava o Gerry ma Laydreane e taufai pisi i valaauga o le Ekalesia, la te faaavanoa lava le taimi e o ai i le malumalu. “Ona o lo ma auai i le malumalu, ua sili atu ai ona lelei lo ma sootaga,” o le tala lea a Gerry. “Ua faamanuiaina foi i maua i le itu tau galuega. O le faatauina atu o foe na o oe atonu e lelei lava, ae afai e te faia faatasi ma le Alii, e sili atu ona lelei.” E taua tele i le au Huutis lena fesoasoani faalelagi. O Gerry ma lona faletua e malolosi foi a la molimau i le sefuluai. “Ma te le popole lava o le Tama Faalelagi o le a faamanuiaina i maua,” o le tala lea a Gerry. “Afai e te totogi lau sefuluai, o le a iu ina sili atu mea e te maua nai lo mea ua e maua.”
Mo le au Huutis, o le va‘a e sili atu nai lo le na o se taaloga. O mataupu faavae o le faapaiaga ma le tuuto lea e manaomia ina ia avea ai ma ni alo vaa lelei ua fesoasoani ia Gerry ma Laydreane ia sili atu ona tuuto i le talalelei. “I le va‘a, o le faaletino e matua taua tele,” o le tala lea a Gerry, “ae e le o le mea aupito sili lea ona taua. O le mea e sili atu ona taua o le mafaufau—o le naunau ina ia faauma lau tuuga. Pe afai e te alo mo le fa-ma-le-afa itula, o lou tino e mafai ona ta‘u atu ia te oe e le mafai ona e faia, ae e ta’u atu e lou mafaufau ia oe e te mafaia. I le talalelei, o le naunautaiga e sili ona taua. O nisi taimi e te lotovaivai, ae o le faatuatua e mafai ona fesoasoani ia te oe ia manuia i le mulimuli i le fuafuaga a le Atua mo lou olaga. E mafai ona tatou aoao pea lava pea se mea mai va‘a e faatatau i le talalelei.”