Fomai po o le Alii Faifeautalai?

Mukandila Danny Kalala, Laipiria

Ata na tusia e Bradley H. Clark

Ina ua uma la’u aoga maualuga, sa ou iloaina na tatau ona ou faatali pe a ma se lua ni tausaga ona faatoa ou auauna atu lea i se misiona. Sa ou filifili loa e amata la‘u aoga i le kolisi, o le faitauina e mafai ona uma la’u aoga faafomai i totonu o le pe a o le ono tausaga pe afai ou te tuuto atoa atu i ai. Sa ou fuafua e auauna atu i se misiona mulimuli ane ai.

Ina ua maea le aoga faafomai i le 24 o o’u tausaga, sa amata ona ou faigaluega faamasani i se falemai laitiiti, lea na faalauteleina ai o’u avanoa faigaluega. I le taimi lenei, sa tulai mai ai se faafitauli: pe e tatau moni ona ou faia se misiona, pe tatau ona ou faigaluega pea? O o‘u matua, o lo’u uso matua (na le’i leva ona foi mai lana misiona), o lau epikopo, ma se fesoasoani i le au peresitene o le misiona i le lotoifale sa latou apoapoai uma mai ia ou auauna atu.

Sa ou talitonu sa sa’o i latou, ae sa faigata ona tolopo la‘u matata faamanuiaina faafomai. Sa ou tatalo ma anapogi mo musumusuga. Sa ou sailiili foi i lo‘u faamanuiaga faapeteriaka, lea o loo fautuaina mai ai ou te auauna atu i se misiona talai ma o se taunuuga sa folafola mai ai ni faamanuiaga.

I se tasi aso, a o o’u i ai i se auala mo femalagaaiga lautele e agai atu i le fale mai le nofoaga o loo o’u faigaluega faamasani ai, sa ma fetaui ai ma le peteriaka o le siteki. Sa ma o ese faatasi i le nofoaga e tasi ma, o le fia iloa, na amata ai ona ou savali i le itu lava lea e tasi. Sa ia iloaina o a’u o se tagata o le Ekalesia.

A o ma savavali faatasi, sa ia fesili mai po o le a se mea sa ou fuafua e fai i lo‘u olaga. Sa ou faamatala atu o a’u o se fomai ma na atuatuvale i le filifiliiga i le va o la‘u galuega ma se misiona. Na ia fai mai ia te au i se leo mausali e auauna atu i le Alii e ala i le alu i se misiona, ma faaopoopo mai, o le taunuuga o le a faamanuiaina a’u. Ia te au, o lana tali na foliga mai na sau mai le Alii.

Sa vave ona oo mai i lo’u mafaufau le mau lenei, “Ae ia outou muai saili le malo o le Atua ma lana amiotonu; ma o le a faaopoopo atu ia te outou nei mea uma” (3 Nifae 13:33).

Sa ou mautinoa na tali mai le Alii ia te au. E aunoa ma se toe faatali, sa ou filifili ai e tolopo la‘u matata faalegaluega ae auauna atu i se misiona talai. Sa manatu o’u uso a fomai o le a galo ia te a’u ia faatinoga faafomai ona o le aluese mai mo le lua tausaga. Sa latou ulagia a’u ae sa ou taofimau pea i la‘u faaiuga.

O le tuua o lo’u faalagiga “Fomai”, sa ou auauna atu ai i le Misiona a le Malo Temokarasi o Congo Kinshasa.

O le lima tausaga mulimuli ane, sa ou faia ai se lisi o faamanuiaga tetele na mulimuli mai i la‘u auaunaga. O le mea aupito taua, sa ou maua se toalua—o se tagata faamaoni o le Ekalesia ma o lo’u olioli sili lea. E toalua le ma fanau ua i ai nei. Ua faamauina lo matou aiga mo le faavavau. I le malumalu ua fai i ma’ua ma sui i le faataunuuina o sauniga mo o ma’ua tuaa ua maliliu. Ua i ai sa’u galuega tumau, ua mafai ai ona ola tutoatasi lo’u aiga. Ua na o ni nai faamanuiaga nei ua matou maua mai le Alii.

Ou te iloa e le mafai lava ona pepelo le Tama Faalelagi ma e iu lava ina Ia faataunuuina Ana folafolaga ia i tatou a’o tuu atu o tatou faatuatuaga ia te Ia ma tausi Ana poloaiga.