O Mea ua Tatou Iloa e uiga i le Muai Olaga
O upumoni autu e uiga i le olaga ae tatou te le’i o mai i le lalolagi ua faamanuiaina ai i tatou i malamalamaaga matagofie.
Ata © Junez Volmager/Dollar Photo Club
O se alii talavou na filifili e faaipoipo nai lo le faia o se misiona sa faatauanauina ina ia maua muamua sona faamanuiaga faapeteriaka. “I le taimi o le faamanuiaga, sa faatepa ai o ia i le ituaiga tagata sa i ai o ia i le muai olaga. Sa ia vaaia lona lototele ma le malosi i le faatauanauina o isi ia mulimuli ia Keriso. O le iloaina o le tagata moni na i ai o ia, e faapefea la ona ia le faia se misiona?”1 Ua na o le tasi lenei o faataitaiga o le auala e mafai e le malamalama e uiga i le muai olaga ona faia se eseesega mo i tatou.
“E fia ou tausaga?” e faigofie ona tali. O aso fanau e fuaina ai le matua o lou tino faaletino. Ae o le mea moni, tatou te matutua atu nai lo o lena. O i tatou taitoatasi “o se atalii po o se afafine agaga faapelepele o ni matua faalelagi” ua i ai “se natura paia ma faasinomaga.”2 A’o le’i foafoaina o tatou tino agaga, o i tatou taitoatasi sa i ai o ni “malamalama,” lea “sa leai se amataga, pe o le a i ai foi se mutaaga.”3
I lo tatou muai olaga, sa aoaoina i tatou i lesona e saunia ai i tatou e fesoasoani i le Tama Faalelagi i le aumaia o le faaolataga o Lana fanau (tagai i le MF&F 138:56). Sa ia i tatou foi le faitalia e mulimuli ma usiusitai ai i le Atua. O nisi o fanau a le Tama na faailogaeseina i latou e ala i lo latou “faatuatua tele ma a latou galuega lelei” ma sa muai faauuina, pe na tuuina atu i ai tofiga, e auauna atu i ni auala patino i le lalolagi (Alema 13:3). O le tagata silisili o i latou ia o e na mulimuli i lena taimi i le Tama Faalelagi o Lona atalii ulumatua agaga, o Iesu Keriso—po o Ieova, pei ona sa iloa ai o Ia iina.
Na faamalamalama mai e le Perofeta o Iosefa Samita e faapea, a’o i ai i lo tatou tulaga i le muai olaga, sa tatou i ai uma i le taimi na faamalamalama mai ai e le Atua le Tama ia Lana fuafuaga mo le faaolataga o Lana fanau. Na tatou iloa o le a manaomia se Faaola e faatoilaloina ia faafitauli e aumaia e tulaga o le olaga faaletino.4
Na fetalai lo tatou Tama oi le Lagi, “O ai ou te auina atu [e avea ma Faaola]?” Na tali atu Iesu Keriso, “O A’u lenei, auina atu au” (Aperaamo 3:27). O Ia o le “Pele ma le Filifilia [a le Tama] mai le amataga” (Mose 4:2) ma o le tulaga lava lea sa i ai o le faataunuuina o lenei matafaioi. Ae sa faasalavei ane Lusifelo ma ofo mai o ia lava ma se manatu faaalia lea na semanu e faaumatia ai ma le saolotoga o le tagata ma faaeaina ai Lusifelo i luga a’e o le nofoalii o le Atua (tagai i le Mose 4:1–4). Na fetalai mai le Tama Faalelagi, “O le a ou auina atu le muamua” (Aperaamo 3:27). Sa faatuiese Lusifelo ma na ta’ua ai o Satani.
O le fetoa’i o agaga na mafua ai se taua i le lagi O le tasi vae tolu o fanau a le Atua sa liliuese mai ia te Ia ma mulimuli atu ia Satani (tagai i le MF&F 36–37). O nei agaga faatuiese sa le’i maua ni tino faaletino, sa tutuli mai i le lalolagi, ma faaauau ai ona faasagatau i le Au Paia a le Atua (tagai i le MF&F 76:25–29). O le vaega atoa o le fanau a le Atua na totoe, sa alalaga i le fiafia ona ua mafai ona latou o mai i le lalolagi, aua sa filifilia Iesu Keriso e faatoilalo le agasala ma le oti (tagai i le Iopu 38:7).
I le muai olaga, sa tatou maua ai le malamalama o le talalelei, molimau, ma le faatuatua i le Faaola ma Lana Togiola. O nei mea na avea ma se puipuiga taua ma malosiaga i le taua i le lagi. O i latou o e na mulimuli i le Faaola na manumalo ia Satani “ona o le toto o le Tamai Mamoe, ma le upu a la latou mau” (Faaaliga 12:11). Pe a tatou aoao i le talalelei ma maua se molimau iinei i le lalolagi, o lona uiga ua tatou toe aoaoina mea sa tatou iloa ma lagonaina i lo tatou muai olaga.
E pei ona le mafai ona tatou manatua ia nai tausaga muamua o le olaga faaletino, na taofia foi lo tatou manatuaina o le muai olaga. Sa tatau ai lenei mea ina ia fesoasoani ia tatou aoao e savavali i le faatuatua ma saunia i tatou ia avea e faapei o Ia. Ae e mafai ona tatou mautinoa sa tatou iloa ma alolofa i lo tatou Tama Faalelagi. Sa tautino mai Peresitene Ezra Taft Benson (1899–1994) e faapea, “e leai se mea o le a sili atu ona faateia ai i tatou pe a tatou ui atu i le isi itu o le veli, nai lo le iloaina o lo tatou iloa lelei o lo tatou Tama ma lo tatou masani lelei i Ona fofoga.”6
Na aoao mai Peresitene Boyd K. Packer, Peresitene o le Korama a Aposetolo e Toasefululua: “E leai se auala e mafai ona fetaui ai le olaga e aunoa ma se malamalamaaga i aoaoga faavae o le muai olaga. … Pe a tatou malamalama i le aoaoga faavae o le muai olaga, ona fetaui lelei ma talafeagai ai lea o mea.”7