Mauaina o le Malosii Uo Lelei
Elder Jorge F. Zeballos
O Le Fitugafulu
O uo e te filifilia e mafai ona i ai se aafiaga tele i lou olaga, e pei ona latou i ai i loʼu [olaga].
Ata na tusia e Beth Jepson
Sa ou fanau ma ola a’e i se aai laitiiti i Chile. O le 12 o o’u tausaga, o le taimi muamua lea na ou vaai ai i faifeautalai, ma sa ou fia iloa. O se tasi aso na fai mai ai se tasi o tamaitiiti o la’u vasega i le aoga ua avea i latou ma lona aiga ma ni tagata o le Ekalesia. Sa ia valaaulia au, ma sa ou auai i sauniga uma i Aso Sa ma gaoioiga i Aso Lua mo ni nai masina.
Sa fou la matou paranesi, ma taluai sa pei lava na ou auai mai i le amataga, o lea sa manatu ai tagata uma o a’u o se tagata o le ekalesia. Ina ua mavae le ono masina sa ou ta’u atu i se tasi o faifeautalai, sa le o a’u o se tagata o le ekalesia, ona sa ou manatu sa na o aiga lava sa fiafia i ai faifeautalai.
Sa taumafai faifeautalai e faaaofia ai lo‘u aiga, ae sa le mananao i ai o’u matua ma nai o’u tei. Sa la’ua valaaulia a’u e papatiso, ae taluai ona sa 12 ou tausaga, sa ou manaomia ai le faatagaga a o‘u matua. Sa ou faapea o le a fai mai lo‘u tama e tatau ona ou faatali seia 18 o’u tausaga, ae sa ia fai mai, “ua ou vaai i lo’u atalii e ala i luga i taeao uma o Aso Sa a o momoe lava ona uso ma tuafafine, fai ona ofu sili ona lelei, ma savali atu i le falesa. Afai o le a nafa lo’u atalii ma lenei faaiuga, ua avatu la‘u faatagaga.” Sa ou le talitonu i ai. Sa ou i le lagi i lena taimi. O le mea lena na ou papatiso ai i le aso na sosoo ai.
E moni, o le avea ma se tagata o le Ekalesia sa tuuina mai ai faamanuiaga faaleagaga. Ae na tuuina mai ai foi ia te au ni uo lelei. I le vaitaimi o lo’u papatisoga, sa amata o mai ai i le lotu nisi o alii talavou o la’u tupulaga, ma sa matou faia ai se vaega na sili ona vavalalata. Sa amata ona matou auai faatasi i sauniga ma gaoioiga uma.
Ina ua 17 o’u tausaga, sa ou tuua lo‘u nuu ae ou alu atu i le kolisi. E toatolu o a‘u uo na filifili e o atu i le kolisi i le aai lava lea e tasi, ma sa matou nonofo faatasi. O se faamanuiaga tele lenei mea ona sa mafai ona matou lagolagoina ma puipuia e le tasi le isi. Sa matou faamalosiau atu i le tasi ma le isi e o i le lotu. Sa matou faia foi ni afiafi faaleaiga, o le to’afa o i matou, ma o nisi taimi sa matou valaauliaina ai isi tamaiti aoga e auai i le Ekalesia. O na tausaga uma i le iunivesite, sa matou faamalosia ai le tasi ma le isi.
Ua fasefululima tausaga mulimuli ane, o loo avea pea na alii talavou ma a’u uo mamae. E ui lava ina matou nonofo i itu eseese o le lalolagi, matou te fesootai lava i taimi uma. Na faamisiona uma le toaono o i matou.
O le mafuaaga lena ou te uunaia ai outou ina ia i ai ni a outou uo lelei o le Ekalesia i lo outou talavou. Faalagolago ia te i latou ma fesoasoani ia i latou. O se uo lelei o le a naunau i taimi uma e fesoasoani atu ia te oe, o le a agavaa mo lou faatuatuaga, ma o le a le manao lava e faatiga ia te oe. Ou te le o fai atu e tatau ona atoatoa au uo, ae e tatau ona latou faaaloalo i ou tulaga faatonuina ma tulaga faatauaina. O le avea ma se uo lelei e le o taimi uma e faatatau ai i le faia o ni gaoioiga faafiafia. E aofia ai le manatu moni i le manuia o au uo, ma ia lava le lototele e ta‘u atu i au uo pe a latou faia se mea e le sa’o.
Ou te faamemelo ia te outou le autalavou a le Ekalesia. Ua tele naua le suiga o vaitau talu ona avea a’u ma se alii talavou. E matuai manaia lenei vaitau i le lalolagi, ae i le taimi lava foi lea e matautia. Ina ia e sao mai ai, e tatau ona e “piimau pea i le ai uamea” (1 Nifae 8:30) ma mulimuli i le fautuaga ma timaiga a ou matua ma taitai o le Ekalesia. O le atiina a’e o ni faauoga lelei o le a fesoasoani ia te oe e faia ai lenei mea.
O nisi o outou atonu e lagona le tuua toatasi ona ua na o oe le tagata o le Ekalesia i lau aoga po o lau vasega. Ae peitai, e le o tuua na o oe. Ua manatu lo tatou Alii o Iesu Keriso ma lo tatou Tama oi le Lagi o outou taitoatasi o se oa, ma ua La’ua naunau e fesoasoani mai ia te oe i lou olaga atoa. O au uo moni o le a lagolagoina oe i le faalatalata atili atu ia te i La’ua.
Fai mai tusitusiga paia o “lea lava mafutaga ua i ai ia te i tatou iinei o le a i ai ia te i tatou iina [i le lagi], ae o le a nao na faatasia ma le mamalu e faavavau” (MF&F 130:2). E mafai ona ou vaai faalemafaufau i le tulaga o le a i ai pe a tatou potopoto faatasi i le lalolagi a sau, e siomia i le mamalu, i le fiafia atoatoa ma a tatou uo ma o tatou aiga. O se taimi matagofie lena taimi, ma o le a faavavau.