Vaai Atu i le Atua i Aso Taitasi

Saunia e Elder D. Todd Christofferson

O Le Korama a Aposetolo e Toasefululua

Mai se faeasaite a le Ofisa o Aoga a le Ekalesia na tuuina atu i le aso 9 o Ianuari, 2011.

O le tuuina mai o le tausiga i aso taitasi, e tasi le aso i le taimi, o loo taumafai ai le Atua e aoao mai ia i tatou i le faatuatua.

O loo aofia i le Tatalo a le Alii le talosaga “Ia e foai mai ia te i matou i le aso nei a matou mea e ai e tatau ma le aso” (Mataio 6:11) po o le “Ia e foai mai ia te i matou i lea aso ma lea aso a matou mea e ai e tatau ma le aso” (Luka 11:3). Ou te talitonu o le a tatou vave faailoa atu e i ai o tatou manaoga i aso taitasi, tatou te manaomia ai le fesoasoani a lo tatou Tama Faalelagi i le taulimaina. Mo nisi, o nisi aso, o se meaai moni lava—o lona uiga, o meaai e manaomia e tausi ai le ola i lena aso. E mafai foi, ona avea o se malosi faaleagaga ma faaletino e feagai ai ma se isi aso i se gasegase faaumiumi po o se togafitiga tiga ma faifai umi. I isi tulaga atonu o ni manaoga e tau le vaaia, e pei o ni mea e faatatau i tiute po o gaoioiga a se tasi i lena aso—mo se faataitaiga, aoaoina atu o se lesona po o le faiga o se suega.

Ua aoao mai e Iesu i tatou, o Ona soo, e tatau ona tatou vaai atu i le Atua i aso taitasi mo meaai—o le fesoasoani ma le tausiga—tatou te manaomia i lena aso faapitoa.

O le valaaulia a le Alii e saili atu a tatou meaai i aso taitasi i aao o lo tatou Tama Faalelagi, ua talanoa mai ai e uiga i se Atua alofa, e silafia e oo lava i manaoga laiti, i aso uma a Lana fanau ma e naunau e fesoasoani ia i latou, taitoatasi. Ua fetalai mai e mafai ona tatou ole atu i le faatuatua i lena Tagata “o le foai tele mai i tagata uma, ma le le toe tautaua; ona foaiina mai ai lea ia te ia” (Iakopo 1:5). O lona uiga, o le mea moni, e matuai faamalosiau, ae o loo i ai se mea o loo galue ii e sili atu ona taua nai lo le na ona fesoasoani i lea aso ma lea aso. A o tatou saili ma maua ai meaai faalelagi i aso taitasi, e faatupulaia lo tatou faatuatua ma faalagolago i le Atua ma Lona Alo.

O Le Vaai Atu i le Atua i Aso Taitasi mo Mea Tatou te Manaomia e Faafailele ai le Faatuatua

O le a e manatua le malaga umi a ituaiga o Isaraelu mai Aikupito ma le 40 tausaga i le vao a o lei ulu atu i lo latou nuu folafolaina. Na tatau ona fafagaina le mano o tagata e silia ma le miliona. E mautinoa lava o lena fuainumera i se nofoaga e tasi e le umi ona ola i le taaloga o le tutuli manu, ma o le latou ituaiga olaga e le faamautu i se mea e tasi i lena taimi, sa le tusa ai lea ma le faiga o ni togalaau po o ni lafumanu i soo se tele e tofu ai. Sa foia e Ieova le luitau e ala i le tuuina mai faavavega o a latou meaai i aso taitasi mai le lagi—manai. Na faatonuina e le Alii ia tagata e ala mai ia Mose, e faaputu manai i aso taitasi ia lava mo lena aso, sei vagana ai le aso e sosoo ma le Sapati, ia latou faaputuina ia lava mo aso e lua (tagai i le Esoto 16:19–29).

O le tuuina mai o le tausiga i aso taitasi, e tasi le aso i le taimi, sa taumafai ai Ieova e aoao mai le faatuatua i se nuu lea na silia ma le 400 tausaga o leiloa le tele o le faatuatua o o latou tama. Sa Ia aoaoina i latou e faalagolago ia te Ia, e “vaai ia te [Ia] i manatunatuga uma; aua le masalosalo, aua le fefefe” (MF&F 6:36). Sa lava mea na ia tuuina mai mo le aso e tasi i le taimi. Sei vagana ai le aso lona ono, e le mafai ona latou teuina le manai mo le faaaogaina i soo se aso po o aso e sosoo. O le mea moni, sa tatau i le fanauga a Isaraelu ona savavali faatasi ma Ia i le aso ma faatuatua o le a Ia tuuina mai ia lava ni meaai mo le aso e sosoo ai i le isi aso e sosoo ai, ma faapena ai lava. O lena ala e le mafai ai ona mamao o Ia mai o latou mafaufau ma loto.

Faalagolago i le Alii—E Mafai ona Oo mai Tali i le aluga o Taimi

O se taimi a o lei valaauina au e avea ma se Pulega Aoao, na ou feagai ai ma se luitau patino faaletamaoaiga na faifai pea mo ni nai tausaga. E i ai taimi na faamata‘uina ai e lenei luitau le manuia o lo’u aiga, ma a’u, ma sa ou manatu matou te ono feagai ma se mala tautupe. Sa ou tatalo mo se faalavefau faavavega e laveai ai i matou. E ui lava sa ou faia lena tatalo i le tele o taimi ma le faamaoni tele ma le faatauanau naunautai, i le faaiuga o le tali o le “Leai.” Mulimuli ane, sa ou aoao ai e tatalo e pei ona sa faia e le Faaola: “Ae aua le faia lo‘u loto, a o lou finagalo” (Luka 22:42). Sa ou sailia le fesoasoani a le Alii faatasi ma nai laa laiti taitasi i le ala i se taunuuga faaiu.

Sa i ai taimi na uma lelei ai lava a‘u punaoa, sa leai se mea po o se tasi foi e liliu atu i ai i lena taimi. Na sili atu ma le faatasi ia taimi na ou faapau ai i luma o lo’u Tama Faalelagi, ma aioi atu ma loimata mo Lana fesoasoani. Ma sa Ia fesoasoani mai. O nisi taimi sa le sili atu lava nai lo o se lagona o le toafilemu, o se lagona o le mautinoa o le a lelei mea uma. Atonu o le a ou le iloa pe faapefea po o le a foi le ala o le a i ai, ae na Ia tuuina mai ia ou iloa, tuusao pe le tuusao foi, o le a Ia tatalaina se ala. Atonu e suia tulaga, e mafai ona oo mai se manatu fou ma aoga i le mafaufau, e ono oso a’e foi se tupe maua e le’i mafaufauina po o isi punaoa i le taimi e tatau ai. Ae sa i ai se fofo.

E ui ina sa ou pagatia i lena taimi, ae a ou toe tepa i tua i le taimi lenei, ou te faafetai ona sa leai se fofo vave i lo‘u faafitauli. O le mea moni i le faamalosia o au e liliu atu i le Atua mo se fesoasoani e toetoe lava o aso uma i se vaitau faaumiumi o tausaga, na ou aoao moni ai i le auala e tatalo ma maua ai tali i tatalo ma ou aoao ai i se ala moni lava e maua ai le faatuatua i le Atua. Sa ou iloaina lou Faaola ma lou Tama Faalelagi i se ala ma i se tikeri lea semanu e le mafai ona tupu i se isi ala. Sa ou aoaoina o mea e ai i aso taitasi o se oloa faapelepele. Sa ou aoaoina o manai i aso nei e mafai ona moni e pei foi o le manai faaletino o talaaga faaletusi paia. Sa ou aoao e faalagolago i le Alii ma lo’u loto atoa. Sa ou aoao e savavali faatasi ma Ia i lea aso ma lea aso.

Galue i Faafitauli Tetele i Taumafaiga Laiti, i Aso Taitasi

O le talosagaina o le Atua mo a tatou mea e ai i aso taitasi, ae le o a tatou mea e ai faalevaiaso, faalemasina, po o le tausaga, o se auala foi tatou te taulai atu ai i itu laiti, ma faigofie atu ona taulima o se faafitauli. O le taulimaina o se faafitauli tele lava, atonu e tatau ai ona tatou galulue i taumafaiga laiti, i aso taitasi. O nisi taimi e pau lava le mea e mafai ona tatou taulimaina o se aso e tasi (po o se vaega foi o se aso e tasi) i le taimi. Sei ou tuuina atu se faataitaiga e le mai tusitusiga paia.

I le vaitau o le 1950 sa manuia ai lo‘u tina mai se taotoga ogaoga o le kanesa, ae e ui i le faigata o lena mea, na sosoo le taotoga ma le tele o togafitiga tiga e faaaoga ai le leisa, lea e ono ta’ua i aso nei o tulaga amata faafomai. Sa ia ta’ua e faapea, na aoao mai e lona tina ia te ia se mea i lena taimi lea na fesoasoani ia te ia talu mai lava lena taimi: “sa ou matuai ma‘i tigaina ma vaivai, ma sa ou fai atu ia te ia i se tasi aso, ‘Oi, Tina, e le mafai ona ou onosaia le isi 16 o na togafitiga.’ Sa fai mai o ia, ‘E mafai ona e alu nei?’ ‘Ioe.’ ‘Ia, lau pele, e na o le pau lava lena o le mea e tatau ona e faia nei.’ Sa fesoasoani ia te au i le tele o taimi pe a ou manatua e taulima le aso e tasi po o le mea e tasi i le taimi.”

A o e talosaga atu i le tatalo mo lau mea e ai i aso taitasi, ia e mafaufau loloto i ou manaoga—i le mea e te le o maua ma le mea e tatau ona e puipui mai ai. A o e alu e moe, mafaufau i mea na manuia ma mea sa le manuia o le aso, ma mea o le a faaleleia teisi ai le aso e sosoo ai. Ma faafetai i lou Tama Faalelagi mo le manai na Ia tuuina mai i lou ala na tausi ai oe i le aso. O lou tomanatu o le a faateleina ai lou faatuatua ia te Ia a o e vaaia Lona aao o fesoasoani ia te oe ia e onosaia ai nisi o mea ma ia suia ai isi mea. O le a mafai ona e olioli i se isi aso e tasi, se isi laasaga e tasi e agai atu i le ola e faavavau.

O Iesu Keriso o le Areto o le Ola

E ui i mea uma, ia manatua ua tatou maua o Ia o le ituaiga ma le faatusa lea o le manai, o le areto lava lea o le Ola, le Togiola.

“Ua fetalai atu Iesu ia te i latou, o A’u nei le areto o le ola: o lē sau ia te a’u, e le laina lava ia, o lē faatuatua foi ia te au, e le toe fia inu lava ia. …

“E moni, e moni, ou te fai atu ia te outou, o lē faatuatua mai ia te au, ua ia te ia le ola e faavavau.

“O a‘u o le areto o le ola” (Ioane 6:35, 47–48).

Ou te tuuina atu la‘u molimau i le soifua moni o le Areto o le Ola, o Iesu Keriso, ma le mana e le iu ma le o’oo’o o Lana Togiola. I le iuga, o Lana Togiola, o Lona alofa tunoa, o la tatou mea e ai lea i aso taitasi. E tatau ona tatou saili ia te Ia i aso uma, e fai Lona finagalo i aso taitasi, ia tasi ma Ia, e pei ona tasi o Ia ma le Tama (tagai i le Ioane 17:20–23). Ou te faamanuia atu ia te outou, a o outou sailia mai ia te Ia, o le a foai mai e lo outou Tama Faalelagi a outou mea e ai i aso taitasi.