Faafetai mo Feagaiga o le Malumalu

Saunia e Cari Florence

E alala le tusitala i Arisona, ISA.

E faapefea ona mafai e soo se mea ona faaitiitia lo‘u faanoanoa ina ua vaivai lau pepe e lei fanau mai?

Ina ua faatoa 14 vaiaso o lou maitaga i le ma tama lona tolu, sa ta‘u mai e fomai faapea o le a fanau le au le pepe ona o ni faafitauli i ona māmā. O lena tala sa matuai lofituina ai au: sa ou lagona le loto nutimomoia, fefe, ma le le mautinoa i le lumanai. I lena afiafi, na ma o ma lo‘u toalua i le malumalu ma loto mafatia ma mata e tumu i loimata. Na ma manaomia ni tali, taitaiga, ma le malosi, ma sa ma iloa o le toafilemu o le malumalu e mafai ona ma faalatalata atu ai i le Alii. Sa ma tetei i le filemu na ma lagonaina i le potu selesitila. Sa ou iloa ai e tusa lava pe o lenei pepe, sa le tatau ona tumau ai i le lalolagi, o le a lelei mea uma.

Mulimuli ane, i ou tulivae sa ou sasaa atu lo‘u loto i le Tama Faalelagi. Sa ou fai atu ia te Ia ua ou malamalama o lo ma atalii sa le tatau ona ola ae ua ou manaomia ni faamanuiaga faapitoa, pe afai e mafai. Sa ou folafola atu foi afai e le taliaina mai ou manaoga, o le a le uma ai lou faatuatua. Sa ou ole atu pe mafai ona ma nonofo ma lenei tamaitiiti mo sina taimi tau umi atu—ina ia mafai ona ola o ia, e tusa lava pe na o sina taimi puupuu, seia mafai ona siiina o ia e lo matou aiga atoa. Sa fai mai fomai afai e ala i se vavega o le a mafai ai ona atoa le iva masina o le ma pepe, o le a fanau mai o ia e lanu viole, ae sa ou tatalo ina ia fanau mai o ia e lanu piniki ina ia le fefefe le isi ma fanau tama laiti e sii lo la uso. Sa ou ole atu i le Alii ina ia tuu mai matou e manatua lo matou sootaga e faavavau pe a oti le pepe, lea na matou filifili e faaigoa ia Brycen.

A o faagasolo pea vaiaso, sa faaalia mai e fomai le tetei i le faasolo manuia o pepe Brycen ae na lapatai mai i le mautinoa o lona maliu pe a uma ona fanau mai. Sa ou lagona le lototiga le mafaamatalaina i le iloaina o le a matou le mauaina o ia, ae peitai sa ou matua fiafia lava o loo tuputupu pea o ia. O le tauaveina o lenei atalii o le a lē ola o se avega faifaipea; sa ou lagonaina le tiga i soo se taimi e fesili mai ai isi e uiga i le itupa o le ma pepe po o le aso e fanau ai ma ou te faafoliga o loo lelei mea uma. Sa ma faatauina mai se masini ina ia mafai ona ma siakiina le tata o lona fatu i aso taitasi, sa pulunaunau pea e faalogo i lena leo pele. Sa malosi lo‘u faanoanoa. O le Togiola a le Faaola na ou maua ai se uiga fou: ua iu ina ou malamalama mai le aafiaga faapea e le gata ina mafatia Iesu Keriso mo a‘u agasala ae Na te lagonaina foi faanoanoa uma, ma tiga uma. Ona o lo‘u Faaola, sa Ia tauaveina moni lava le mamafa faatasi ma au ina ia le tuua nao au.

I le 37 vaiaso sa ou siaki ai i le falemai, i le iloaina ua ou amataina aloaia le faitauina o le taimi o le olaga o Brycen. Sa taufaamata‘u ma toe matagofie. Na lipotia mai e fomai atonu e mafai ona ola i soo se taimi mai le 10 minute i ni nai aso. E ui lava i ou popolega, sa ou lagonaina le faamautinoaga a le Alii. Na fanau Brycen Cade Florence i le aso 27 o Ianuari, 2012. Sa ou tagi masusu i le taimi na fanau mai ai o ia—lanu piniki, matua aulelei, matua atoatoa.

Sa faanatinati atu le ma fanau tama i totonu o le potu e vaai ma sii lo la uso; na aumaia se tagata pueata e pueina le taimi lea. Sa ola Brycen i le na o le 72 minute, o le mea moni na lava le taimi mo i matou taitoatasi e sii ai ma alofa ia te ia. Na o le pau lea o le taimi sa matou faatasi uma ai o se aiga i lenei lalolagi, ae o mea uma na sa matou moemiti i ai. Sa le mafai ona aveesea tama mai lo laua uso, i le sogi atu ia te ia, usuina o pese ia te ia, ma aioi mai e sii ia te ia. Sa lava le umi na ola ai o ia e maua mai ai se faamanuiaga mai lona tama, o se mea sa faamoemoe ma tatalo i ai lo‘u toalua.

I le avea ai ma se aiga e i ai sa matou molimau e faapea “ O le fuafuaga paia o le fiafia, ua mafai ai ona faaauau fegalegaleaiga faaleaiga i tala atu o le tuugamau.” ma o sauniga ma feagaiga o le malumalu e faatagaina le “toe faatasia ai aiga e faavavau” (“O Le Aiga: O Se Folafolaga i le Lalolagi,” Liahona, Nov. 2010, 129). Ia i matou, o le mauaina o se aiga e faavavau o mea uma ia. O le vaega e sili ona matagofie o le talalelei e faapea o le oti o le a le tuueseeseina i tatou; o le a faaauau pea a tatou malaga faatasi.

E ala mai i lenei tofotofoga, ua ou iloa ai o le Atua o loo i ai i mea uma. E popole o ia ia i tatou taitoatasi. E ui o le a oo mai tofotofoga ma faigata, e mafai e le Atua ona faafaigofie ona tauave. Ua sili atu nei lou loto faafetai mo lo’u faamauga i le malumalu i lou toalua ma o le ma fanau na fananau i le feagaiga. Ona o le fuafuaga matagofie a le Atua mo o tatou aiga, e aofia ai le taulaga le iu a le Faaola, e mafai ona matou toe faatasi. E masani ona ou mafaufau pe o le a faapefea ona ou gafatia lenei tofotofoga faigata e aunoa ma le iloaina o lena upumoni e faavavau. E sili atu lou loto faafetai ona o le molimau ua ou maua ona o le olaga puupuu o Brycen—ua sili atu le faapupulaina atoatoa e le Atua o o‘u mata ma lou loto i Ana faamanuiaga.