Fesoasoani i se Uo Fou
Sa auai i la matou vasega i le aoga se teine fou i le ogatotonu o le tausaga. Sa ese ona foliga ma lana tautala mai isi tamaiti aoga. Sa siitia solo soo o ia ma sa faigata ona maua ni uo. Sa faanoanoa i ni mea na tutupu i lona aiga ma e sau i le aoga o loo tagi i nisi aso. Sa ou iloaina sa ou manao e taumafai e fesoasoani i lenei tamaitai, ae sa ou le mautinoa lelei po o le a se mea e tatau ona ou faia aua sa ia le fiafia e talanoa ma isi tamaiti. Sa ou tatalo e uiga i le mea e tatau ona ou faia ma na mafai ona ou lagonaina le musumusu mai o le Agaga Paia e tau lava o lou taumafai e avea ma ana uo.
Sa ou fesoasoani ia te ia i ana meaaoga, ma fai atu i ai, o lo tatou Tama Faalelagi na tuuina atu ia te ia ni taleni faapitoa mo ia e faaaoga ma faasoa atu i isi. Na ou valaaulia o ia matou te taaalo faatasi ma isi tamaiti aoga i le malologa. I ni nai masina mulimuli ane, sa ia fai mai o au lana uo muamua lava.
Sa manaomia lona toe siitia ese, ma sa ou lagonaina lava le faanoanoa. Sa ou fesili atu i le failautusi o le aoga e auina atu se tusi ia te ia i lona tuatusi fou. I le tusi, sa ou fai i la‘u uo o le a ou misia lava o ia ma o le a avea pea o ia ma au uo. Sa ou tusia ni ata a o ma taaalo faatasi ma faamanatu atu ia te ia nisi o ana taleni. Sa ou fai atu ia te ia e tatau ona ia lototele ma taumafai e faia se uo fou aua e mafai ona ia fesoasoani i se isi. Sa ou tatalo ina ia maua e ia se uo i lana aoga fou, ma ia agalelei isi tamaiti ia te ia.
Ou te iloa e alofa le Tama Faalelagi i Ana fanau uma, ma ou te faafetai e fesoasoani o Ia ia i tatou e fesoasoani ia i latou.