Ua Oo I Lou Taimi

Saunia e Epikopo Gary E. Stevenson

Epikopo Pulefaamalumalu

Mai le “O Lau Fa Minute,” Liahona, Me 2014, 84–86.

“O le olaga lenei o le taimi lea mo tagata esaunia ai e feiloai ma le Atua.” (Alema 34:32).

I le tausaga ua mavae, sa vaavaai atu ai tagata uma o le lalolagi i tagata taaalo mai atunuu e 89 o tauva i le Taaloga Olimipeka o le Taumalulu 2014 i Sochi, Rusia. O le toasefulu o nei autaaalo o ni tagata o Le Ekalesia a Iesu Keriso o le Au Paia o Aso e Gata Ai. E toatolu i latou na maua ni pine!

Galue Malosi.

Ou te faasoa muamua atu le tala ia Noelle Pikus-Pace, o se tasi o le au taaalo o le Au Paia o Aso e Gata Ai. O le taaloga a Noelle, o le auivi. Vaai faalemafaufau i lou saoasaoa atu ma le faafesagai o ou foliga i le aisa na o ni nai inisi e va ai, ma taututuu ai i lalo o le auala aisa mapiopio i le saoasaoa e oo atu i le 90 maila (145 km) i le itula. I le Olimipeka, o Noelle sa na o le fa minute—e fa 60-sekone tuuga—e manumalo ai i lana pine.

Mo Noelle, e le o le taimi muamua lea na ia taumafai ai mo le Olimipeka. I le 2006 na gau ai lona vae ma sa le mafai ona tauva ai i le Olimipeka. I le 2010 na ia misia le manumalo i se pine i le tasi vae sefulu o se sekone. Ae na te lei faavaivai ai. Sa ia koleni mo itula, aso, vaiaso ma masina. I le Olimipeka 2014, o ana faaseega sa lelei atoatoa! Sa ia manumalo i le pine siliva!

Taumafai pea.

O Christopher Fogt, o se sui o le au lea na manumalo i le pine apamemea i le tuuga faasee e toafa tagata. E ui sa ao ona faamaamulu o ia i le maea ai o se lavea matautia i le Olimipeka o le 2010. Ae pei o Noelle, sa ia taumafai. Ma sa ia manumalo foi i se pine!

Fesoasoani i Isi

Sa faateia le lalolagi i se tagata o le Au Paia o Aso e Gata Ai mai Ausetalia, o Torah Bright, ina ua ia matauina le tamaitai faasee a Amerika o Kelly Clark, o lē sa popole ina ua leaga lana faasee muamua. Nai lo le taulai atu i ana lava faatinoga, sa fusi mai e Torah Kelly seia oo ina mafai ona toafilemu Kelly. Ona o lenei gaoioiga faatauvaa o le agalelei mai ia Torah, na tutu uma tamaitai i luga o le tulaga o le au manumalo. Na manumalo Torah i se pine siliva ao Kelly na manumalo i se apamemea. Afai e i ai se uo po o se tagata o le aiga e manaomia le faamalosiauga, fesoasoani foi ia i latou.

Lou Avanoa!

O lou olaga e faavavau e tai pei lava o aafiaga a nei au taaalo. Ona o se atalii po o se afafine o le Atua, sa e nofo faatasi ma Ia. Sa e saunia e sau i lenei lalolagi mo na o sina taimi puupuu. O lou olaga i le lalolagi e faapei o le fa minute mo Noelle. O au gaoioiga iinei o le filifilia pe e te maua le taui o le ola faavavau.

O Suesuega mo Oe

O Noelle, Christopher, ma Torah sa faia ni laasaga faapitoa ina ia avea ma ni tagata taaalo o le Olimipeka. E i ai ni suesuega faapitoa e fesoasoani ia te oe e toe foi atu ai i le Tama Faalelagi. O mea nei e pei o le papatisoga, mauaina o le meaalofa o le Agaga Paia, faauuga i le perisitua, sauniga o le malumalu, ma le taumamafa i le faamanatuga i vaiaso taitasi.

Ina ia fesoasoani ia te oe ia ausia au suesuega, e tatau ona e tatalo i aso taitasi ma suesueina tusitusiga paia ma auai i le lotu. Usitai i poloaiga, tausia feagaiga sa e osia, ma mulimuli i tulaga faatonuina a le Alii. Afai e te manaomia ona salamo, ia manatua le vavega o le Togiola. O le a le tuua lava na o oe e le Tama Faalelagi.

Ia manatua, na e saunia mo lou taimi i le lalolagi. O lou taimi lenei e faatino ai. O lou taimi lava lenei!