O Uiga o Iesu Keriso: E Aunoa Ma Se Agasala

Ia suesue ma le agaga tatalo lenei savali ma saili ia iloa mea e faasoa atu. O le a mafai faapefea e le malamalama i le soifuaga ma le matafaioi a le Faaola ona faateleina lou faatuatua ia te Ia ma faamanuiaina ai i latou o loo e tausia e ala i le faiaoga asiasi? Mo nisi faamatalaga, alu i le reliefsociety.lds.org.

Ata

O lo tatou Faaola, o Iesu Keriso, sa na o le pau lea o le tagata e mafai ona faia se togiola mo tagata. “Na faataatia ma le loto i ai e Iesu Keriso, le Tamai Mamoe e aunoa ma se pona, o ia lava i luga o le fata faitaulaga ma totogi le tau o a tatou agasala,” na saunoa ai Peresitene Dieter F. Uchtdorf, Fesoasoani Lua i le Au Peresitene Sili.¹ O le malamalama o Iesu Keriso sa aunoa ma se agasala e mafai ona fesoasoani ia i tatou e faateleina ai lo tatou faatuatua ia te Ia ma taumafai e tausi Ana poloaiga, salamo, ma ia mama.

“O Iesu … se tagata o le tino ma le agaga, ae le gauai atu o Ia i tofotofoga (tagai i le Mosaea 15:5),” na saunoa mai ai Elder D. Todd Christofferson o le Korama a Aposetolo e Toasefululua. “E mafai ona tatou liliu atu ia te Ia … aua e malamalama o Ia. E malamalama o Ia i le tauiviga, ma na te silafia le auala e manumalo ai i le tauiviga. …

“… O le mana o Lana Togiola e mafai ona soloiesea ai taunuuga o agasala. Pe a tatou salamo, o Lana togisala o le alofa tunoa e tauamiotonuina ma faamamaina ai i tatou (tagai i le 3 Nifae 27:16–20). E pei tatou te lei faia, e pei tatou te lei gauai atu i faaosoosoga.

“Ao tatou taumafai i aso taitasi ma vaiaso taitasi e mulimuli atu i ala o Keriso, e puipuia e o tatou agaga lona malosi ma le mafai e faatoilaloina ai o tatou tagata o le lalolagi, ma o le a faatoilaloina le taua o totonu, ma o le a le toe faalavelave mai faaosoosoga.”²

Mau Faaopoopo

Mataio 5:48; Ioane 8:7; Eperu 4:15; 2 Nifae 2:5–6

Mai Tusitusiga Paia

Na totogi e le Faaola le tau o a tatou agasala e ala i Lona tofi paia o le Alo, Lona soifuaga e leai se agasala, o Ona puapuaga ma le faamaligiina o Lona toto i le Faatoaga o Ketesemane, o Lona maliu i luga o le satauro ma Lona Toetu mai le tuugamau. E ala i le Togiola a Iesu Keriso, e mafai ona tatou toe mama a o tatou salamo i a tatou agasala.

Na aoaoina e le Tupu o Peniamina lona nuu i le Togiola a Iesu Keriso ona fesili atu lea pe latou te talitonu i ana upu. “Ma sa latou alalaga uma mai i le leo e tasi, fai mai: … le Agaga … ua ia faia seliuga tele i totonu o i matou, po o i totonu o o matou loto, ua lē toe i ai so matou manao e faimea leaga, ae ia faia mea lelei e lē aunoa. …

“Ma ua matou malilie e ulu atu i sefeagaiga ma lo matou Atua e fai lona finagalo, ma usiusitai i ana poloaiga i mea uma” (Mosaea 5:1–2, 5).

Ua mafai foi ona tatou maua se “liuga tele” e pei o le nuu o le Tupu o Peniamina, o e “ua lē toe i ai so matou manao e faimea leaga, ae ia faia mea lelei e lē aunoa” (Mosaea 5:2).