Tusigāmanatu o le Konafesi o Oketopa 2014

“O le mea ua fai atu ai A‘u o le Alii ua Ou fai atu ai; … pe i lo‘u lava leo po o i le leo o au auauna, ua tutusa lava” (MF&F 1:38).

A o e suesueina le konafesi aoao ia Oketopa 2014, e mafai ona e faaaogaina nei itulau (ma Tusigāmanatu o le Konafesi i lomiga i le lumanai) e fesoasoani ai ia te oe e suesue ma faaaoga aoaoga talu ai nei a perofeta soifua ma aposetolo ma isi taitai o le Ekalesia.

O Tali mo Oe

E tuuina mai i konafesi taitasi, e perofeta ma taitai ni tali musuia i fesili atonu o i ai a tagata o le Ekalesia. E mafai ona faaaoga lau lomiga o Novema 2014 pe asiasi i le conference.lds.org e sue ai tali i fesili nei:

• E faapefea ona mafai ona sili atu lo tatou malamalama i le taua o le faamanatuga? Tagai i le Cheryl A. Esplin, “O Le Faamanatuga—o se Toefaafouina o le Agaga,” 12.

• O le a le sootaga i le va o le faitalia, faamasinoga tonu, alofa mutimutivale, salamo, ma le Togiola a le Faaola? Tagai i le D. Todd Christofferson, “Saoloto e Faavavau, e Galue mo i latou Lava,” 16.

• Aisea e avea ai le aiga o le avanoa lelei mo le aoaoina o le talalelei a Iesu Keriso? Tagai Tad R. Callister, “O Matua: O Uluai Faiaoga o Le Talalelei Mo a Latou Fanau,” 32.

• E faapefea ona galulue faatasi matua e fausia se aiga e faavavau? Tagai L. Tom Perry, “Mauaina o le Filemu Tumau ma le Fausiaina o Aiga e Faavavau,” 43.

Alu ma Fai

Na fautuaina mai e Elder Neil L. Andersen o le Korama a Aposetolo e Toasefululua ni auala se lua e mafai ai e le autalavou ona “maua se molimau patino i le Perofeta o Iosefa Samita”:

“Muamua, saili ni mau i le Tusi a Mamona e te lagona ma iloa e matua moni lava. Ona faasoa atu lea i le aiga ma uo … , ma faailoa atu o Iosefa sa avea ma se meafaigaluega i aao o le Atua. Ma le isi, faitau le molimau a le Perofeta o Iosefa Samita i le Penina Tau Tele. … Mafaufau e pu‘eina le molimau a Iosefa Samita i lou lava leo, ma faalogologo soo i ai, ma faasoa atu ma au uo.”

Mai le “Iosefa Samita,” Liahona, Nov. 2014, 30.

O Mai Ia Ina Matamata

Aisea e faasoa ai e le Au Paia o Aso e Gata Ai le talalelei?

“O soo tuuto o Iesu Keriso o loo avea pea ma o le a avea pea ma faifeautalai totoa ma filiga,” na saunoa ai Elder David A. Bednar o le Korama a Aposetolo e Toasefululua. “O se faifeautalai o se soo o Keriso o le e molimau atu e uiga ia te Ia o le Togiola ma folafola atu upu moni o Lana talalelei.

“O le Ekalesia a Iesu Keriso o loo avea pea ma o le a avea pea ma ekalesia faamisiona. …

“… O le faasoa atu i isi tagata o mea e aupito sili ona taua ia i tatou pe na aoga foi ia i tatou o se mea ua masani ai lava.

“O lenei mamanu e tasi ua manino faapitoa lava i tulaga o le taua sili faaleagaga ma taunuuga.”

O a mea e mafai ona tatou faia pe a faailoa mai e tagata le fiafia i le talalelei ma i le Ekalesia? Na saunoa mai Elder Bednar e mafai ona tatou mulimuli i faataitaiga a le Faaola e ala i le valaaulia o i latou e “o mai ia ina matamata” (Ioane 1:39).

Mai le “O Mai Ia Ina Matamata,” Liahona, Nov. 2014, 107, 109.

Ina ia faitau, matamata, pe faalogologo i lauga o le konafesi aoao asiasi i le conference.lds.org.

• Faaaliga

• Mulimuli i le Tulafono Faaauro