O Le Amataga o se Olaga Fou
I le taumafanafana o le 2011, sa sauni ai le aiga o Wundram e malaga ese mai Kuatemala e agai atu i le Iunaite Setete ina ia mafai ai ona tulitulilmatagauina e Carlos Wundram, o se fomai, ni aoaoga maualuluga atu.
Na fai mai o ia, “A o matou sauni e o, sa i ai se mea na taofia a’u.” Sa lagona foi e lona faletua o Adriana, ia lava lagona e tasi, o lea sa la tatalo faatasi ai ma maua ai se faamautinoaga i o laua loto e le tatau ona latou o.
Sa la’ua faaleaogaina a latou fuafuaga—ma sa tuua ai i laua e manatunatu po o le a se finagalo o le Atua mo i latou. O le fa o masina mulimuli ane o le a latou iloa ai.
Sa avea Carlos ma se tagata o le Ekalesia a’o 14 ona tausaga, ae na le toe toaga i le vaitaimi na amata ai ana aoaoga i le iunivesite i le 21 o ona tausaga.
O Adriana, e ui lava e le o ia o se tagata o le ekalesia, ae ua leva ona fia faaipoipo i se tagata o le Au Paia o Aso e Gata Ai. Sa faaipoipo sana uo lelei, o se tagata o le Ekalesia, i se faifeautalai ua maea le misiona o le na agamalu, agalelei ma mataala. Sa manao foi Adriana i se tane faapena.
Ina ua faatoa amata le la feoaiga, sa le’i talanoa Adriana ma Carlos e uiga i lana tapuaiga, ae sa ia faaalia le tele o uiga auaumama o le toalua o lana uo. Sa le’i fia pule atu ia te ia. Ina ua uma ona la faaipoipo ma maua se fanau, sa ia talisapaia lona faataeeleina o pepe ma sui [o latou] napekini!
A o faasolo tutupu ae le la fanau e toatolu, “sa amata ona ma mafaufau e tatau ona matou faalatalata atili atu i le Atua,” o le tala mai lea a Carlos. La te le’i maua le mea sa laua sailia i le ekalesia Kerisiano sa latou auai ai mo se taimi, ae na faaauau pea ona i ai lagona e tatau ona latou latalata atu i le Atua.
Ina ua uma ona faaleaogaina a latou fuafuaga e me’i atu i le Iunaite Setete, na tonu i le au Wundrams e toe faaleleia ni vaega o le latou fale, e aofia ai le faatauina mai o ni faamalama fou. Sa vave ona latou fiafia i le alii na alu atu e faapipii faamalama o José Mena. I se tasi aso na ta’ua ai i le latou talanoaga ia mea e tau i tapuaiga. Sa ia fai mai, o ia o se tagata o Le Ekalesia a Iesu Keriso o le au Paia o Aso e Gata Ai, ma sa tali atu Carlos e faapena foi o ia, ae ua fai si leva e le’i toe auai atu i le lotu.
O le isi taimi na sau ai Uso Mena e galue i faamalama, sa ia aumaia se Tusi a Mamona ma se kopi o le Liahona mo tagata taitoatasi o le aiga. O le faitauina o le mekasini, na amata ai ona lagona e Carlos ia lagona masani faaleagaga. Ona valaaulia ai lea o i latou e Uso Mena e auai atu i le tatalaga o le Malumalu o Quetzaltenango Kuatemala mo maimoaga.
Ina ua latou ulu atu i le malumalu, na amata ona tuufesili tamaiti o le au Wundram, “Tama, o a ni mea tatou te faia ina ia avea ai ma ni tagata o lenei Ekalesia?” A o latou tuumuli atu, sa tutu ai lava le la atalii laitiiti o Rodrigo, e 10 tausaga, ma faatasi ai ma le fesoasoani a lona tina, i le faatumuina o se kata e talosagaina ai se asiasiga mai faifeautalai.
Sa feiloai le aiga ma faifeautalai. “Ou te le’i manao e faamalosia lo‘u aiga ina ia papatiso,” o le tala lea a Carlos. “Ae sa latou matuai lagonaina le Agaga mo i latou lava.”
Na papatisoina Adriana ma tamaiti ia Tesema 2011, i ni nai aso a o lei faapaiaina le Malumalu o Quetzaltenango. “O le faamanuiaga silisili na tuuina mai e le Atua ia te au o le, sa ou papatisoina i latou,” o le tala lea a Carlos. E le’i leva ona atoa le tausaga mulimuli ane, ae faamauina le aiga i le malumalu, o se aafiaga faafiafiaina mo i latou uma.
O Le Avanoa e Faamauina Ai
Ina ua faaipoipo Ana Victoria Hernández, sa le o se tagata o le Ekalesia, ia Belbin Calderón, o ia o se tagata o le ekalesia, ae sa le auai atu ona sa faigaluega i Aso Sa. Fai mai Belbin na toe faafoi mai o ia e se lagona malosi. Na ia ta’ua, “Sa ou musu mai la‘u galuega ona sa ou manao e toe foi mai i le lotu.” Ina ua toe toaga mai o ia, na matauina e lona faletua ua faasolo ina sili atu ona lotomaualalo, ma sa faateleina le lotogatasi i lo latou aiga.
Sa faamoemoe Belbin ia fiafia lona toalua i le talalelei, ae na te lei taumafai e tulei o ia. I se tasi Aso Sa a o tafi le pefu o le fatatusi, sa tau ai Ana Victoria i se tasi o tusi a Belbin e uiga i le talafaasolopito o le Ekalesia. O le fiailoa lava, sa amata ai ona ia faitauina. O tala e uiga i osigataulaga a paionia na matuai ootia ai o ia.
I ni nai vaiaso mulimuli ane, na taunuu ane ai le Liahona o Oketopa 2011, o se lomiga faapitoa e uiga i le Tusi a Mamona. Ona o le fiailoa lava foi, na amata faitau ai e Ana Victoria le Tusi a Mamona. Sa lei umi ae ona iloaina sa le gata ina i ai se talafaasolopito ae faapea foi ni upu a perofeta. Sa amata ona latou auai atu i sauniga faamanatuga ma lona toalua ma lana fanau.
Ona asiasi atu lea ma lona aiga i le tatalaga o le Malumalu o Quetzaltenango mo maimoaga. Sa ootia Ana Victoria ina ua ia iloaina e mafai ona faamauina lona aiga mo le faavavau. “Sa i ai se aafiaga tele o lena mea ia te a’u. Sa ou lagonaina le tatau ona faamauina ia i latou,” sa ia fai mai ai. Sa amata ona fai ana lesona a faifeautalai ma papatisoina ai i le aso 7 o Tesema, 2011. Sa auai o ia i le faapaiaga o le malumalu i le fa o aso mulimuli ane.
Sa faamauina Uso ma Tuafafine Calderón i le malumalu ma le la fanau ia Tesema 2012. Fai mai Ana Victoria, e le mafaamatalaina lona fiafia i le “iloaina e mafai ona ou faatasi ma lo‘u aiga i le faavavau.” E ta’u e Belbin le mautinoa o le latou faamauga “o le faamanuiaga silisili e mafai ona ou mafaufauina.”
Na Pa‘i Atu le Malumalu i Lona Agaga
O le fausiaina o se malumalu i Quetzaltenango, Kuatemala, ua faataunuuina ai se miti mo Mónica Elena Fuentes Álvarez de Méndez. O ia o le afafine o se paionia o le Ekalesia o le na totoina ia te ia se alofa i le talalelei ma ona faamanuiaga uma. O lona tina, o Magda Ester Álvarez, sa papatisoina i le 1953, i le ono o tausaga talu ona faatoa taunuu atu faifeautalai o le Au Paia o Aso e Gata Ai i Kuatemala.
Sa ola a’e Mónica i le Ekalesia ma mulimuli ane ai faaipoipo atu i se alii lelei, o Enio Méndez, sa le o se tagata o le ekalesia. Sa ia lagolagoina lana ava ma lona afafine i gaoioiga a le Ekalesia ma faamemelo i ona tagata, ae sa le’i fia papatiso o ia. E ui i lea, e manatua e Mónica na fai atu lona tina ia te ia, e i ai se aso o le a avea ai lona toalua ma se tagata o le ekalesia. “Sa le’i aveesea lava lo’u faatuatua,” o lana tala lea, e ui lava na te le’i iloa po o le a se mea o le a liliu mai ai o ia.
Sa fiafia lona tina i faamanuiaga o le asiasi atu faavaitaimi i le malumalu i le Aai o Kuatemala, ma sa faatumulia i le olioli i le 2006 ina ua fofogaina se malumalu mo Quetzaltenango. Ae peitai, sa tigaina Magda Álvarez i se gasegase matautia ma maliu ai i le 2008, a o le’i fausiaina le malumalu i Quetzaltenango.
Sa galulue faatasi Mónica ma lana tama teine o se talavou matua, o Mónica Esther Méndez Fuentes, o ni taiala i maimoaga taamilo i le taimi o le fale tatala mo le Malumalu o Quetzaltenango. Sa latou auai atu ma Enio i le fale tatala, ae o le mea latou te le’i iloa, sa toe foi faalua atu i ai o ia.
O le malaga ese faatasi mai i le aso mulimuli o le fale tatala, na manatunatu ai Mónica ma lana tama teine pe mata o le a sa’o valoaga a Magda Álvarez e uiga ia Enio.
O le talitonuga lava sa i ai o Enio, na taliaina lava le avea o ia ma tagata o lana ekalesia, ae avea foi lona toalua ma lona afafine ma tagata o le laua ekalesia, pe afai latou te faaaloalogia talitonuga o le tasi ma le isi. Ae o ona aafiaga i le fale tatala o le malumalu na tuuina atu ai ia te ia ni mea se tele e mafaufau i ai. “Sa amata ona ou anapogi, e aunoa ma le ta’uina atu o se mea ia i la’ua, ma tatalo foi,” o lana tala lea. Sa alu atu i mauga, lea e fiafia o ia e alu i ai e mafaufau loloto ai. “Sa ou fesili atu i le Alii, ‘O le a la se mea e tatau ona ou faia?’” O le mea moni, ua uma ona ia iloa le mea sa‘o, ae sa tatau ona ia foia ona masalosaloga.
Sa papatisoina Enio ia Aperila 2012—sa o se sauniga na o’oo’o le faagaeetia mo lona toalua ma lona afafine.
Sa faamauina le aiga o Méndez i le Malumalu o Quetzaltenango ia Oketopa 2013. Na faailoa mai e Tuafafine Méndez lo latou olioli i se sini e faavavau e ausia ma lo latou faamoemoe ia faamaoni pea seia oo i le iuga o o latou olaga.