Tulagavae o le Faamaoni
Randolph Shankula, Iuta, ISA
Ata na tusia e Bradley H. Clark
Ua fai si leva o o’u manao e pu’e ni ata o le Lotoa o le Malumalu i le Aai o Sate Leki—e aofia ai le ataata o le vaituloto, o vaipuna, ma auala savali—na lilofia i kiona fou na faatoa toulu lava na aunoa ma se tulagavae na i ai. Ina ia maua se ata o le kiona fou e aunoa ma ni tulagavae e i ai, sa ou iloaina sa tatau ona ou taunuu atu i le Lotoa o le Malumalu i le taeao po lava i le mavae ai o se po o se matagi kiona.
I se tasi afiafi ina ua uma ona valoia se po kiona, sa ou sauniunia loa. Ona e amata saluese e teufanua o le Lotoa o le Malumalu ia auala savali i le 5:00 i le taeao, o lea na ou setiina ai la’u uati faailo mo le 3:00 i le vaveao ma tapena uma a’u mea e faaaoga.
O le tietie atu i luga o auala e le’i salueseina le kiona i le taeao na sosoo ai, na ou taunuu atu i le lotoa o le Malumalu i le 4:15 i le taeao a o loo toulu pea le kiona. Sa faaauau pea ona ou tietie solo i le lotoa, e vaavaai mo se nofoaga ou te paka ai ia faigofie ai ona tapue ia ata.
O la’u taamilosaga muamua i le Lotoa o le Malumalu, sa ou matauina ai le auala savali e tau atu i le faitotoa o le Malumalu o Sate Leki, sa lilofia i le kiona fou—na aunoa ma ni tulagavae! Sa ou iloaina o le a maua la’u ata lelei atoatoa. I lo’u fiafia, sa ou toe tietie faataamilo ai i le atufalega e su’e se tulaga ou te paka ai.
A o ou agai atu i sasae i North Temple Street, sa ou manatu o le a ou maua se nofoaga e latalata atu i le auala savali. Ae peitai, ou te le’i iloaina, ua leai ni tulaga e paka ai ma ua ou toe latalata atu foi i le auala savali e agai atu i le faitotoa o le malumalu.
A o ou tu i se moli lanumumu, sa ou tilotilo atu i lo‘u itu taumatau i le kiona fou, sa le’i faalavelaveina. Ina ua ou vaai atu i lo‘u itu agavale i le Maota Autu mo Konafesi, sa ou matauina ai se olomatua na laeiina ni laei lelei o le Aso Sa, na faapi’o ane lona ulu i le kiona na toulu ifo a’o agai atu i le malumalu.
“Oi leai,” o lou mafaufau lea. “O le a ou le mauaina la’u ata!”
A o ui ane le fafine i o’u luma, sa ou faliu e tilotilo atu i le auala savali o le a le toe umi ae faaleagaina ma vaaia ai ua uma ona uia e se isi tamaitai le auala savali ma na afe atu i le faitotoa o le malumalu. Ona ou toe tepa lea i tua i le tuafafine muamua lea ua savali atu i le auala savali. Faatasi ai ma kiona na piipii faataamilo i ona seevae ma tapuvae, ma mulimuli atu i tulagavae na muamua atu, sa savali lemu o ia ma le mautinoa ma agai atu i le auala savali, ui atu i le pa, ma totonu o le faitotoa o le malumalu.
A o ou mafaufau i mea sa ou vaaia, sa ou tilotilo i le uati o la‘u taavale: 4:20 i le vaveao. O lo’u saofai ai i la’u taavale mafanafana ma tilotilo atu i tulagavae i luga o le kiona fou na toulu, sa faalotomaualaloina a’u i le faamaoni o nei tuafafine e toalua na agai atu e faatino o laua tiute atofaina.
Sa ou toe tietie faataamilo i le atufalega, paka la’u taavale, uu mai la’u meapueata, ma pue se ata o tulagavae i le kiona—o se ata na sili atu le maoae nai lo le ata na ou vaai faalemafaufau i ai.