Ua Matou Misia Sofía
E alala le tusitala i Buenos Aires, Atenitina
I le pogisa ma le tiga, sa ou tatalo mo le saogalemu o lou tuafafine.
Ata na tusia e Brandon Dorman
I le 2012 sa faamaea ai lau seminare ma le aoga maualuga, ma sa tatalaina se lalolagi fou i lo‘u olaga. Sa maoae lava le amataga o le tausaga, ae maise lava le tolauapiga o le autalavou a siteki tuufaatasi. Sa ou lagonaina le faamanuiaina ma le puipuia e lo‘u Tama Faalelagi.
I ni tausaga ua mavae, sa ou filifili ai o le a ou auauna atu i se misiona talai, ma i le 2012 sa ou fuafua ai e tuuto atu au lava ia e faasaoina tupe uma lava ou te mafaia. Faafetai i lo‘u tuafafine matua, o Sofía, sa mafai ona vave maua sau galuega i le kamupani sa ia faigaluega ai. I le aso 22 o Fepuari, sa ma o ai ma Sofia i le nofoaafi i le galuega. O se aso matagofie, ae ina ua ma taunuu, sa ou faalogoina se pao leotele, ona faafuasei lea ona pogisa.
Ina ua ou ala ae, sa ou lagonaina le tiga ma le le mautonu. Pe ua oo mai la‘u malaga i le lalolagi i se faaiuga? Sa ou manao lava ina ia ola ma aafia i ni mea faapitoa, e pei o le alu i se misiona ma le faia o se aiga. O lea sa ou tatalo ai, ma fai atu i le Tama Faalelagi e tuuina mai ia te au le avanoa e ola ma auauna ai i se misiona.
A o taoto ai i le lavelave o le nofoaafi lavea, sa ou tilotilo solo mo lo‘u tuafafine, ae sa le mafai ona ou iloa atu o ia. Na iu ina ou faalogoina tagata fuimū o fai atu i tagata uma ina ia toafilemu, ma na mafai ona ou lagonaina le faamoemoe i lo‘u loto. Sa ou tatalo mo le saogalemu o lou tuafafine aua na ou le iloa le mea o i ai o ia. A o ou tatalo, sa ou lagonaina le filemu tele. Sa ou finau malosi e onosaia le tiga na ou lagonaina, ae ua tuuina mai e le Tama Faalelagi ia te au le malosi e tatau ai.
Ina ua mavae se itula sa laveaiina au. Sa ou lagonaina le i ai o le Alii faatasi ma au i lena taimi. A o aveina au i le falemai e fai so‘u taotoga i lo’u vae, sa le mafai ona taofia lou mafaufau e uiga i lo‘u tuafafine ma tau mafaufau pe o faapefea mai o ia. Ae o taimi uma lava ou te mafaufau ai ia te ia, sa ou lagona le filemu.
O le aso na sosoo ai na tau mai ai e o‘u matua ia te au e lei faasaoina Sofía mai le faalavelave. O le tala na aumaia se tiga aupito sili ou te lei lagonaina muamua lava. Ae i le taimi lava lea, sa ou lagonaina le mafanafana ma le agaga faafetai mo feagaiga paia na osia e o‘u matua i le malumalu i le faamauina faatasi o lo matou aiga mo le faavavau.
Ina ua ou toe foi atu i le fale mai le falemai, sa faamanuiaina e le Alii lo‘u aiga e ala i a matou uo ma aiga, o e na avea ma o matou agelu, na tuuina mai ia i matou le faamafanafanaga. O le a matou faafetai pea mo lena mea. Faafetai i le mana o le perisitua, sa ou aoaoina le ala e toe savali vave ai nai lo le mea na faamoemoeina. Sa mafai ona ou savali e pei ona masani ai ina ua faatoa mavae ni nai masina.
O le talalelei e matagofie i auala uma e te vaai ai i ai. Ou te matua faafetai lava mo malumalu ma sauniga o le malumalu. Ou te iloa ua saunia e le Alii se mea paia mo lo‘u tuafafine. O le olaga e aunoa ma ia e le faigofie, ma o le a le mafai lava ona faigofie, ae e sili atu le faamautinoaga ma le filemu ua matou maua nai lo le tiga matou te lagonaina i lona alu ese atu. Matou te misia Sofía ma o matou loto atoa ma manatua o ia i aso uma. Na saunoa mai Elder Jeffrey R. Holland o le Korama a Aposetolo e Toasefululua o le lagi e aunoa ma lou aiga o le a le pei lava o se lagi (tagai i le Between Heaven and Earth [DVD, 2005]), ma ou te molimau atu e moni lena mea.
E alofa le Atua ia i tatou, ma Na te le tuua i tatou na o i tatou. Fai mai le Isaia 54:10, “O lou alofa e le mavae atu lea nai ia te oe, ma lau feagaiga e manuia ai e le luluina lea, ua fetalai mai ai Ieova o le alofa ia te oe.”