E I ai Lava i Taimi Uma le Taimi e Tatalo Ai
E alala le tusitala i Bavaria, Siamani.
Sa matua faigata lava le aoga. Faamata ea e faasolo lelei ia mea uma?
“Ou te tootuli e tatalo i aso uma. Ou te talanoa ia Tama Faalelagi” (“Ou te Tatalo i le Faatuatua,” Tusipese a Tamaiti, 14).
“Fini, sau ia. Ua oo i le taimi e o ai!” O le tala lea a Ioane.
Sa faatalitali ma le le onosai le uso o Fini, o Ioane i le faitotoa i luma. Sa le’i manao o ia e tuai i le aoga.
Sa faauu Fini. Sa le’i fia alu o ia i le aoga. Sa faatoa siitia atu lona aiga i se fale fou. O lona tausaga muamua lea i le aoga, ma e le’i i ai lava ni ana uo ua maua i le aoga. Sa ia misia lava ana uo tuai.
“Ou te fefe!” Na fai mai ai Fini ma tamoe atu i lona tina. “Aisea e tatau ai ona ou alu i le aoga?”
Sa fusi Fini e lona tina. “O le a sologa lelei. Fai se ta tatalo,” na ia fai atu ai. “E i ai lava i taimi uma le taimi e tatalo ai.”
Sa latou tootuli i lalo ma ole atu i le Tama Faalelagi e fesoasoani ia Fini. Ona o loa lea o Fini ma lona uso i le aoga. Sa feololo lava le aso.
O taeao uma na sosoo mai ai, na tootuli ai Fini ma faia se tatalo ma ole atu i le Tama Faalelagi mo se fesoasoani.
Sa faasolosolo malie lava ina sili atu le lelei o mea. Sa maua se uo a Fini, ma sa le’i toe fefe o ia. Ina ua mavae se taimi, na amata ona fiafia Fini e aoga.
I se tasi aso, sa savavali atu ai Fini ma lona uso i le aoga, ma sa lagona e Fini le fiafia. Sa ia matauina le susulu o le la. Sa mafaufau o ia i mea fiafia uma sa ia aoaoina. “Na faafuasei ona tu o ia.
“E i ai se mea ua galo ia te a’u!” na ia fai atu ai ia Ioane. Sa toe tamoe Fini i le latou fale.
Na vaaia le popole o lona tina ina ua momo’e atu o ia i totonu.
“O le a le mea ua tupu?” o lana fesili lea.
“Ua galo ona ou tatalo!” O le tala lea a Fini. Sa tootuli o ia i lalo. Sa manao o ia e faafetai atu i le Tama Faalelagi mo le fesoasoani ia te ia.
Ina ua uma ona faaiu lana tatalo, sa ia fusi atu i lona tina. “E i ai lava i taimi uma le taimi e tatalo ai!” o lana tala lea.
Sa ataata Fini. Na ataata lona tina. Ma a’o tamoe Fini ia oo atu i lona uso, sa mafaufau o ia, atonu na ataata foi le Tama Faalelagi.